Hatutan.com, (11 Marsu 2024), Díli- Instituto Nacional de Combate ao HIV- SIDA, Instituto Publico (INCSIDA,IP) rejista ema ho HIV/SIDA daudaun ne’e iha Timor-Leste hamutuk na’in-2006.

Lee Mós: Servisu Sex Komersiál Eziste, INKSIDA Esforsu Legaliza no Lokaliza

Imajen Ilustrasaun Google.

“Dadus ne’ebé INCSIDA rejista ne’e ema ne’ebé afetadu bá HIV/SIDAe hamutuk 2006 no halo hela tratamentu iha Ospitál Nasionál Guido Valadares (HNGV), balun iha Klínika Bairo Pite, Vera Cruz inklui mós sentru saúde sira iha sidade Dili no iha munisípiu mos iha ona tratamentu ba ema ne’ebé afeta HIV/SIDA, ” Diretór bá Promosaun, Prevensaun no Komunikasaun INCSIDA,I.P,   Silvestre da Costa Sarmento informa iha ámbitu vizita   Vise-Primeiru Ministru, Ministru Koordenadór bá Asuntu Sosiá, Ministru  Dezenvolvimentu Rural n o Abitasaun Komunitária, Mariano Assanami Sabino bá Edifísiu INCSIDA,I.P iha Díli, Segunda (11/03/2024).  

Atu kombate no prevene HIV/SIDA, INCSIDA,I.P kontinua hala’o sosializasaun no  kampaña nasionál bá kombate HIV/SIDA iha munisípiu sira, ba estudante universitáriu sira iha universidade sira hotu no mós bá estudante sekundáriu sira hotu, inklui parseiru sira hotu INCSIDA nian.

Sidadaun sira ne’ebé afeta bá virus HIV/SIDA la’ós hotu-hotu konsentra iha fatin tratamentu Tibar, maibé sira balun hela iha uma ho kondisaun di’ak hela, maibé nafatin bá halo tratamentu regular no intensivu.

INCSIDA,I.P  hamutuk ho parseiru sira kontinua buka tuir no akonsella sidadaun sira ne’ebé afeta HIV/SIDA no lakohi halo tratamentu no sai husi sistema kontrolu ne’ebé INCSIDA no Ministériu Saúde halo.

Biban ne’e Vise-Primeiru Ministru, Ministru Koordenadór bá Asuntu Sosiál, Ministru Dezenvolvimentu Rural no Abitasaun Komunitária, Mariano Assanami Sabino, afirma presiza iha kampaña nasionál ida másimu bá prevensaun no kombate HIV/SIDA iha Timor-Leste

“Fó apresiasaun ba Prezidente INCSIDA,I.P  ho staf sira hotu ne’ebé durante ne’e esforsu ona bá halo servisu ida importante áa atu halo prevensaun no seluk mak atu halo asaun kurativu, fó korajen no mós konsiénsia para ema hotu ne’ebé da’et ka afeta ona virus HIV/SIDA bele ba konsulta, hemu ai-moruk no halo tratamentu ho didi’ak,” Mariano Assanami Sabino hateten.

Nia konsidera uniku dalan bá kombate HIV/SIDA husi komunidade sira mak halo kampaña bá prevensaun. Moras ne’e fasil los da’et tamba ne’e ema hotu tenke ho kuidadu, áa sira ne’ebé kona ona labele hanoin katak kona ne’e atu mate ona, lae. Tratamentu kontinua no nafatin iha espíritu ka esperansa katak sei bele kura ho di’ak.

INCSIDA nu’udár instituisaun Estadu nian no kada tinan sira hetan finansiamentu áa atividade hotu husi Orsamentu Jerál Estadu tamba ne’e kada tinan INCSIDA sempre aprezenta planu orsamentu bá iha Ministériu Finansas para ba hetan aprovasaun iha Parlamentu Nasionál.

Jornalista: Vito Salvadór