Hatutan.com, (21 Marsu 2024), Díli-Komandu FALINTIL-Forsa Defeza Timor-Leste (F-FDTL) liuhosi Komisaun Rekrutamentu Rejime Espesiál bá Futuru Ofisiál Espesialista, konklui ona prosesu selesaun no teste bá timoroan (feto ho mane) hamutuk na’in-5,565 ne’ebé molok ne’e submete sira-nia dokumentu hodi konkorre iha vaga ne’ebé Ministériu Defeza ho Komandu F-FDTL fó sai.  

Lee Mós: Ministériu Defeza ho F-FDTL Loke Rekrutamentu iha Rejime Espesiál bá Ema Na’in-87

F-FDTL Komponente Navál nia membru na’in 211, konklui formasaun militár iha área Fuzileiru ho Espesiálidade nian, iha baze komponente navál, Hera, Kinta (26/10/2023). Foto/Tomé da Silva.

Liuhosi konferénsia imprensa iha auditóriu Kuartél Jenerál F-FDTL,  Kinta (21/03/2024),  Segundu Koordenadór bá Komisaun Rekrutamentu Rejime Espesiál bá Futuru Ofisiál Espesialista, Koronel Alberto Pereira dos Santos,  informa kandidatu sira ne’ebé naran rejistu iha sistema ema hamutuk 5,565,  maibé kandidatu ne’ebé sira submete kandidatura hamutuk ema 2.530, kompostu hosi mane 2.117 no feto 413.

Prosesu Avaliasaun 

Primeiru, faze Avaliasaun Informasaun Pesoál, komisaun halo verifikasaun bá dokumentu Identifikasaun Pesoál Kandidatu inklui inan-aman nian, iha faze ne’e mós halo Verifikasaun Rejistu Kriminál sira. Kandidatu ne’ebé para iha faze ida ne’e, hamutuk na’in-556 kompostu hosi mane 492 no feto 64.

Segundu, faze Abilitasaun Literária, komisaun konvida espesialista externa ne’ebé mai hosi Universidade no Instituisaun relevante sira bazeia bá área espesialidade ne’ebé publika ona. Iha faze ida ne’e, panelista sira avalia kurríkulu vitae (CV, sigla ingles), rezumu, sertifikadu abilitasaun literária sira, inklui transkrisaun nota kandidatu sira nian. Kandidatu ne’ebé pasa iha faze ida ne’e hamutuk 208 kompostu hosi mane 182 no feto 26.

Terseiru, faze teste saúde no fíziku. Komisaun servisu hamutuk ho HNGV, Klibur Domin, CICNL no Kompañia Sanitária F-FDTL hodi halo teste saúde no fíziku. Kandidatu ne’ebé pasa iha faze ida-ne’e, hamutuk 140, kompostu hosi mane 121 no feto 19.

Kuatru, faze entrevista, komisaun konvida Espesialista Externa ne’ebé mai hosi Universidade no Instituisaun relevante sira, bazeia bá Área Espesialidade ne’ebé públika ona iha faze ida ne’e, Panelista sira hasoru diretamente kandidatu sira hodi halo entrevista, bazeia bá dokumentu ne’ebé panelista sira avalia antes.

Komisaun Rekrutamentu Rejime Espesiál bá Futuru Ofisiál Espesialista halo konférensia imprensa, Kinta (21/03/2024). Foto/Espesiál

“Kandidatu ne’ebé pasa iha faze ida-ne’e na’in-87 kompostu hosi mane 72 no feto 15,” Koronel Alberto Pereira dos Santos,  infroma.

Hosi lista kandidatu admitidu hamutuk ema 87 ne’e, iha mós lista kandidatu rezervadu, hamutuk ema na’in-11, kompostu hosi mane 10 ho feto 1, ne’ebé sei substitui  kandidatu admitidu sira bainhira la komparese ka la marka prezensa iha loron inkorporasaun ka kandidatu sira ne’ebé desiste durante instrusaun iha períodu semana rua nia laran. Prosesu substituisaun sei halo aleatoriamente ka tuir pozisaun 1, 2, 3,..etc.

“Husu bá kandidatu admitidu sira atu komparese ka marka prezensa iha kuartél jenerál das F-FDTL nian iha loron sábadu, 23 de Marsu  2024, tuku 09:00 Otl,” Coronel Alberto Pereira fó hanoin.

Komisaun Rekrutamentu Rejime Espesiál bá Futuru Ofisiál Espesialista  2023 ida ne’e, nia Prezidente maka Contra-Almirante “CMD”, atuál Ministru Defeza, Pedro Klamar Fuik, no Xefe Estadu Maiór F-FDTL, Tenente Jenerál Domingos Raúl “Falur Rate Laek”.

Jornalista: Rogério Pereira Cárceres