Hatutan.com, (05 Abríl 2024), Díli-Komandu FALINTIL-Forsa Defeza Timor-Leste (F-FDTL) liuhosi Xefe Estadu Maior Jenerál F-FDTL, Tenente Jenerál Domingos Raúl “Falur Rate Laek”, Sesta (05/04/2024), iha Kuartél Jenerál F-FDTL,  lansa eventu ezersísiu Matebian ne’ebé partisipa direta hosi membru na’in-200 resin hosi Komponente Terrestre.

Lee Mós: F-FDTL Manán Esperiénsia Hosi Ezersísiu “Harii Hamutuk”

Membru F-FDTL ho Komponente Terrestre Na’in-200 Partisipa Ezersísiu Matebian. Foto/Mídia F-FDTL

Eventu ne’e sei hala’o iha Suku Era-Ulo, Postu Administrativu Letefoho, Munisípiu Ermera, durante semana ida resin, hahú hosi loron 01 to’o loron 12 fulan-Abríl, tinan ne’e.

Iha diskursu abertura, Tenente Jenerál Falur Rate Laek, hateten, ezersísiu Matebian hanesan plataforma importante no folin-boot tebes bá formasaun profisionál no bá interasaun entre pesoál militár hosi Komponente Terrestre.

Falur tenik ezersisiu ne’e sei ajuda militár sira atu halo interasaun regulár iha atividade oioin ne’ebé sei dezenvolve iha terrenu.

Nia dehan tan, la iha dúvida katak tipu ezersísiu hirak-ne’e halibur hamutuk membru sira atu dezenvolve interoperabilidade. Uza sira-nia meius disponível, sei koko efikásia hosi sira-nia plataforma ka armamentu sira no sira-nia variedade ho forma efetivu.

“Profisionalizmu hosi ita bo’ot sira importante tebes tanba ekipamentu sira-ne’e sei funsiona ho di’ak depende bá ema ne’ebe uza meius hirak ne’e. Ezersísiu Matebian iha nia implikasaun iha nível oioin no estratéjiku iha ámbitu seguransa no defeza, hanesan mós instrumentu ida hosi medida harii konfiansa entre Forsa Komponente Terrestre,” Tenente Jenerál Falur Rate Laek, hateten.

Durante ezersísiu sei rekere militár sira hodi hatán bá senáriu fiktivu oin-oin ne’ebé mak bele akontese iha vida reál, signifika katak táktika hotu ne’ebé sei uza relevante tebes, nune’e, Tenente Jenerál  Falur husu bá  militar 200-resin, inklui militár feto na’in-29  aprende ho máximu tuir sira-nia kbi’it hosi sira-nia komandante sira ne’ebé iha experiénsia bo’ot, atua ona iha rai-laran no rai-liur hodi tranzmite tutan bá militár foun sira.

Ezersísiu Matebian konsidera nu’udár instrumentu importante ida-ne’ebé forsa armada sira implementa no válida sira-nia konseitu, prosedimentu, sistema no táktika operasaun.

Membru F-FDTL partisipa abertura Ezersísiu Matebian. Foto/Mídia F-FDTL

“Medidas hari’i Interoperabilidade hosi atividades hirak ne’e, no liuhosi formasaun rutina entre forsa armada no kooperasaun prátika entre ita bo’ot sira mak xáve bá susesu,” Falur Rate Laek fó hanoin.

Komandante F-FDTL ne’e husu bá nia militár sira hotu, tau iha konsiderasaun sira-nia situasaun seguransa nasionál, tanba ezersísiu ida-ne’e sei kontribui ho forma desiziva no determinante bá misaun prinsipál Forsa Armada, no mós kontribui diretamente bá komunidade en-jeral, liu-liu bá tinan ida-ne’e iha fatin Era-Ulo, Ermera.

Haktuir bá orientasaun hosi Komandante Komponente Terrestre katak, durante ezersísiu hosi loron 1 to’o loron 12 fulan-Abrál, atividade ida-ne’ebé inklui mak CIMIC, ne’ebé hetan apoiu hosi Ofisiais Médiku hosi Ospitál Rejionál Eduardo Ximenes Baucau, no SAMES bá disponibilizasaun ai-moruk.

Jornalista: Rogério Pereira Cárceres