Hatutan.com, (15 Maiu 2024), Díli—Governu liu hosi reuniaun Konsellu Ministrus (KM) aprova projetu Rezolusaun Governu ne’ebé aprezenta hosi Ministra Finansas (MF), Santina José Rodrigues F. Viegas Cardoso kona-bá reforma sistema kontabilístiku.

Reuniaun Konsellu Ministru. Foto/Tome da Silva.

“Objetivu hosi reforma ida-ne’e atu garante fiabilidade no modernizasaun iha inskrisaun, klasifikasaun no rejistu ba reseita no despeza sira, atu bele promove transparénsia iha finansas públika no privada sira no mós promove dezenvolvimentu ekonómiku,” Hatutan.com sita komunikadu, kuarta (15/05/2024).

Lee Mós: PN Servisu Hamutuk ho Uniaun Europeia Haree Jestaun Finansas Públika iha Timor-Leste

Objetivu prinsipál sira inklui, iha prazu fulan 12, kria padraun kontabilístiku foun ida no planu kontas ne’ebé bele aplika ba setór públiku no privadu, hodi aliña ho norma internasionál sira, no implementasaun sistema integradu ida ne’ebé inklui no asegura relasaun entre kontabilidade orsamentál, bazeia ba klasifikadór orsamentál no kontabilidade finanseira, tuir planu kontas.

Sistema ne’e mós tenke simples, fasil no adekuadu atu utiliza ba nesesidade, kapasidade no rekursu ba setór públiku no privadu nasionál.

Iha prazu másimu fulan 24, sei kria mós Konsellu Kontabilístiku Nasionál ida hodi emite norma no rekomendasaun sira.

Iha prazu médiu ne’e, sei kria rejime sertifikasaun ida hodi garante kualidade profisionál ne’ebé responsavel ba kontabilidade no asosiasaun profisionál ida ba profisionais kontabilidade no auditoria nian.

Jornalista: Rogério Pereira Cárceres