Hatutan.com, (28 Maiu 2024), Díli-Polísia Nasionál Timor-Leste (PNTL) Munisípiu Díli detein suspeitu ho inisiál  IcLc iha sela detensaun Polísia iha Caicoli tanba uza kro’at atu hanesan katana ka samurai, hodi hakanek nia ria na’in-rua iha área Kampung Baru, Aldeia 04 de Setembro, Suku Comoro, Munisípiu Díli.

Lee Mós: PNTL Kaptura Membru IKS.PTL Na’in-sia Treinu Ilegál

Komandante PNTL Munisípiu Díli, Superintendente Xefe Polísia Orlando Gomes. Foto/Elio dos Santos da Costa

Komandante PNTL Munisípiu Díli, Superintendente Xefe Polísia Orlando Gomes, informa kronolojia akontesimentu katak, iha Segunda (27/04/2024), tuku 00:00 kalan, vítima na’in-rua ho naran Nilton Lemos “Ameta” (idade 26) ho Livanio Corte Real “Luka” (idade 23) sai hosi sira-nian uma Mascarinhas hodi bá iha suspeitu nia uma ne’ebé lokaliza iha área Aldeia 04 de Setembro, ho objetivu atu lori fila sira nian sobriñu ne’ebé mak nu’udár suspeitu IcLc nia oan mane tanba kaben ho vítima sira-ninian feton.

Razaun vítima sira hakarak bá foti fila sira-nian sobriñu ne’e tanba bainhira moris mai, vítima sira nia inan-aman mak haree ka tau-matan to’o labarik mane ne’e boot, mak Suspeitu lori bá suspeitu ninia uma tanba ne’e maka lezadu sira bá tuir.

Bainhira vítima sira to’o iha suspeitu IcLc nia uma, suspeitu na’in-rua husu lisensa hodi tama bá suspeitu nia portaun laran. Maibé, suspeitu hatete bá lezadu sira katak, ria sira mai iha ne’e atu halo saida. Nune’e, vítima sira mós hatán bá suspeitu katak, sira bá atu lori sira-ninian sobriñu fila bá uma no fundamenta katak sobriñu la tama eskola kleur ona. Maibé, suspeitu rejeita nafatin no duni ria na’in-rua atu sai hosi ninia uma ne’e.

Tanba ne’e maka, vítima sira mós sente la di’ak hodi ko’alia bá suspeitu dehan ó hanesan aman ida ne’ebé laiha responsabilidade no hasai lia-fuan balun la monu bá iha suspeitu nia laran. Ho ida ne’e maka suspeitu sente emosaun ka nervoza sai hosi uma-laran bá lori kedas ho katana hodi taa bá lezadu Livánio nia kotuk laran rezulta kanek no baku malu ho vítima sira.

La to’o iha ne’e, suspeitu IcLc mós hakilar hosi nia uma-laran, hodi bolu ajuda tán joven viziñu sira ne’e atu tama bá oho tiha vítima na’in-rua depois mak nia bá hatán. Nune’e, iha Segunda kalan, tuku 12:11 ne’e, Patrullamentu Eskuadra Dom Aleixo ekipa bravo simu informasaun hosi Centro Comunicação Comando Munisípio de Díli (Delta Base) katak, akontese Kazu Arma Brancas iha área Kampung Baru ,Aldeia 04 de Setembro, Suku Comoro.

Ho informasaun ne’e, Patrullamentu Eskuadra Dom Aleixo nia ekipa bravo,  responde kedas, hodi tun bá iha lokál krime nian halo kapturasaun bá suspeitu IcLc no asegura mós vítima na’in-rua, lori kedan iha Eskuadra Dom Aleixo hodi submete bá iha prosesu.

“Ho suspeitu nia hakilar ne’e mak joven sira iha bairru  laran sai bá hodi baku lesuk lezadu na’in-rua no joven sira lori blok riba bá lezadu ho naran Nilton nia matan fukun parte karuk hodi rezulta kanek no ran sai barak, kona lezadu Nilton nia ulun parte karuk hodi rezulta lezadu nia ulun bubu no lezadu sente moras maka’as. Relasiona ho kazu ne’e ekipa resepsaun bravo, entrega kedan ba iha ekipa Sub-SIC Eskuadra Dom Aleixo hodi kontinua prepara autos Flagrante Delito hodi enkamiña ba premeiru interrogatóriu,” Komandante Orlando Gomes hatete bá jornalista sira iha Komandu Polísia Munisípiu Dili, Tersa (28/05/2024).

Komandante Orlando Gomes dehan, hahalok krime ne’ebé Suspeitu IcLc komete ne’e kategoria bá krime Arma Branka ne’ebé regula iha Rezolusaun Governu nian Númeru 15/2017.

Dadaun ne’e suspeitu kumpre hela detensaun iha Sela Komandu Díli, durante oras 72 molok submete bá Ministériu Públiku (MP). Vítima Nilton Lemos “Ameta” (idade 26) ho Livanio Corte Real “Luka” (idade 23), oras ne’e mós hala’o hela tratamentu bá sira-nian saúde iha Hospital Nacional Guido Valadares (HNGV), Bidau-Dili no Polísia mós rekolla hotu ona sira-ninian deklarasaun bá kazu insidente ne’e.

Jornalista: Rogério Pereira Cárceres