Hatutan.com, (05 Juñu 2024), Díli –Baltazar Moniz, Timoroan ida triste tebes ho atendimentu iha Diresaun Jerál Servisu Rejistu Notariadu (DGSRN, sigla portugés) tanba nia trata kedas ona pasaporte iha fulan-Fevereiru to’o  Tersa horiseik, 04 fulan-Juñu 2024 seidauk bele foti pasaporte ne’e.  

Lee Mós: TL Sei Selebra Akordu ho Vietname Kona-bá Izensaun Vistu bá Titulár Pasaporte Ordináriu, Diplomátiku no Servisu

Baltazar Moniz hatudu resivu ne’ebé nia selu iha banku hodi trata pasaporte iha fulan-Fevereiru to’o agora seidauk hetan pasaporte. Foto/Lazaro Pereira Quefi

“Pasaporte ida ne’e ha’u mai trata kleur ona tanba ne’e husu ba DGSRN atu bele aselera prosesu ne’e. iha rekizitu ne’ebé aplikavel katak ami sira trata pasaporte ho kustu administrasaun $50 ne’e han tempu loron 10 bele foti ona, maibé ha’u nian ne’e ha’u trata dezde kedas fulan-Fevereiru to’o loron ohin seidauk sai de’it,” Baltazar Moniz hateten ba jornalista sira iha edifísiu DGSRN, Díli,  Tersa (04/06/2024).

Se mákina impresaun pasaporte  mak avaria ka kaderneta pasaporte mak hotu, entaun la bele autoriza de’it hirak ne’ebé trata pasaporte urjente ho folin $75 no $100 ne’e hapara hotu atu nune’e iha justisa ne’ebé iguál ba ema hotu.

“Ha’u trata ida presu $50 nian ne’e iha fulan-Fevereiru mai hasai foto iha loron 30 fulan-Abríl 2024 to’o agora fulan-Juñu ona seidauk iha nafatin. Tanba ne’e ha’u husu atu halo $50 ka $100 mós tenke tuir prosesu legal ninia data ne’e. Iha balu sira nian foin tama iha semana ida liubá sira ne’e bele prosesu nusa mak ami nian labele. Ha’u mai dala rua ks dala tolu ona. Ami mai iha loket ne’e de’it ema dehan seidauk iha ami fila fali de’it,” Baltazar Moniz hateten ho hirus.

Iha fatin hanesan bolseiru FDCH Faviana da  Silva Amaral ne’ebé kontinua nia  estadu mestradu iha Portugal haktuir atendimentu iha DGSRN  falla tanba prosesu atu trata pasaporte ne’e la iha legalidade.

“Ha’u mai atu buka-hatene  pasaporte no ha’u halo pagamentu iha inísiu loron 8  fulan-Maiu 2024 no sira fó ba ha’u durante loron 10 nia laran para atu mai foti ha’u nia pasaporte, mas bainhira  to’o loron 10 ha’u to’o iha ne’e sira fó razaun dehan katak mákina avaria, mákina la sufisiente hodi trata pasaporte. Entaun  sira husu ha’u nia resibu ho ha’u nia númeru kontaktu la’ós ha’u mesak inklui ha’u nia maluk sira seluk, ami hein semana tolu ona la kontaktu. Ohin, ha’u rasik hakarak mai cek diretamente la iha resposta pozitivu. Ha’u nia preokupasaun mak ne’e ha’u nu’udar bolseiru ida ne’ebé mak atu ba kontinua estudu iha Portugal no ha’u presiza halo autentikasaun ba ha’u nia dokumentu sira ne’e. Agora rezultadu la iha ne’e mak susar tebes,” Faviana da Silva Amaral hateten.

Faviana da  Silva Amaral. Foto/Lazaro Pereira Quefi

“Ha’u rasik hasoru ona dirijente balu iha ne’e no sira nia resposta mak husu fila fali pergunta mai ha’u mak ne’e ita boot mai ho tratamentu tipu  urjente liu  ka tipu tratamentu normal entaun ha’u hatán dehan ha’u trata ho tipu normal. Problema ne’e prejudika tebes tanba iha segunda agora ami tenke halo autentikasaun ba dokumentu sira maibé agora dokumentu la kompletu ne’e oinsá, ida ne’e mak ha’u hakarak sujere ba parte relevante atu toma lalais responsabilidade.”

Tuir regulamentu ka prosedimentu ne’ebé aplikavel iha DGSRN  katak trata pasaporte  ho kustu administrativu $50 ne’e  ba loron 10,   kustu $75  ba loron-tolu (3) no  kustu $100 ba oras 24.

Bainhira jornalista sira koko atu entrevista ho Diretór Nasionál Servisu Rejistu Notariadu João Fernando Martins Borges ligadu ho asuntu ne’e maibé  okupadu ho servisu tanba iha reuniaun ida ho Ministériu Justisa, Sergio Hornai.

Jornalista Estajiáriu: Lazaro Pereira Quefi