Hatutan.com, (01 Agostu 2024), Díli—Autoridade ka órgaun Polísia Kriminál balun, Kuarta (31/07/2024), partisipa ka rejistu notísia krime bá Ministériu Públiku (MP).

Lee Mós: Diretór Nasionál PCIC Vicente e Brito Rekoñese Nia Oan-mane Uza Pistola Treinu Tiru

Edifísiu Sentrál PCIC. Foto/Elio dos Santos da Costa

Autoridade balun iha órgaun Polísia Kriminál partisipa ka rejistu iha Notísia Krime bá MP kontra Diretór Nasionál PCIC, Vicente Fernandes e Brito ho nia membru sira iha Departementu Armamentu Seguransa (DAS) no mós Diretor Nasionál  PCIC nia oan mane ho inisial VFB  rejistu ho Numeru Prosesu  Krime, NUK:0198/24.PNSIK tanba deskonfia  parte sira fasilita arma no ronin ka pistola GLOCK-19 ba Diretór Nasionál PCIC nia oan mane VFB hodi treinu no utiliza tiru iha Karega du Tiru PCIC nian iha Kaitehu-Liquiça.

Krime ne’ebé MP akuza bá Diretór Nasionál  PCIC, Vicente Fernandes e Brito ho nia membru sira no mós nia oan mane maka abusu podér, pekulatu, pekulatu bá uju, ho arma proibida.

Iha Kinta (01/08/2024), hale’u tuku 10.05 Otl, Hatutan.com hakat bá edifísiu sentrál PCIC iha Caicoli, Díli, atu hasoru malu ho Diretór Nasionál PCIC, Vicente Fernandes e Brito, atu konfirma informasaun ne’e, maibé bainhira to’o iha  Gabinete Diretór Nasional PCIC nian ne’e informa objetu atu hala’o entrevista ho Diretór Nasionál PCIC, maibé Sekretária Diretór Nasionál PCIC nian bá informa tiha bá Diretór Nasionál PCIC sobre pedidu entrevista ne’e, maibé la konsege tanba tuir informasaun ne’ebé hato’o husi Sekretaria Diretór Nasionál PCIC nian katak atualmente Diretór Nasionál PCIC okupadu hela ho servisu importante balun no labele ko’alia.

Iha ámbitu serimónia aniversáriu estabelesimentu PCIC bá dala-10 ne’ebé selebra iha Salaun Multiusos, Bebora-Díli, Tersa 14 fulan-Maiu 2024, Diretór Nasionál PCIC, Vicente Fernandes e Brito bá jornalista sira, rekoñese nia oan mane utiliza pistola treinu tiru hamutuk ho membru  PCIC sira iha área Kaitehu, Suku Tibar, Postu Administrativu Bazartete, Munisípiu Liquiça.

Diretór Nasionál PCIC, Vicente Fernandes dehan, treinamentu ida-ne’e, sira realiza kada tinan, hala’o dala-rua. Iha tempu ne’ebá, sira konvida mós parte hosi Servisu Nasioná Intelijénsia (SNI) nian bá hotu.

Jornalista Hatutan.com iha gabinete rekretaria Diretór Nasionál PCIC, Kinta (01/08/2024). Foto/Elio dos Santos da Costa

“Ha’u nia oan mós iha ne’ebá hotu, ha’u nia oan dehan, Apa, ha’u hakarak bá rona kilat tarutu, tanba ha’u nunka rona. Entaun, nia bá, buat ne’e tarutu. Depois sira dada tiha nia bá iha ne’ebá, tiru tiha, tres metrus, mais, ho bala treinu,” Diretór Nacional PCIC, Vicente Fernandes e Brito, hateten.

Diretór PCIC Vicente Fernandes e Brito dehan, partisipante iha treinamentu tiru anuál ne’e, la’os PCIC mesak, maibé, partisipa mós hosi eis vise-Ministru Justisa, José Edmundo Caetano, iha mandu VIII Governu Konstitusionál, juiz sira, prokuradór sira, atuál Ministru Justisa, Sergio Hornai, ne’ebé uluk sei hanesan Komisáriu iha Comissão Anti Corrupção (CAC).

“Mas, ami bolu bainaka. Ha’u nian, ha’u figura públika, diretór nasionál PCIC, ha’u nia oan. Sé momentu la tama reforma, ha’u nia oan, buat ne’e aman hela. Ha’u hatene sá, ha’u prokuradór ha’u nia feeling. Ita-boot (jornalista) sira ne’e, ha’u haree ida-idak ne’e ha’u hatene hotu kedas. Ha’u hatene, hosi ne’ebá ha’u hatene hotu. Tanba ha’u informasaun ne’e kompletu iha ha’u nia liman,” Diretór Nasionál Vicente e Brito hateten.

Diretor PCIC ne’e mós hatene, tanba kazu ne’e divulga dala-barak iha públiku, kona-bá nia oan-mane mós envolve tiru iha atividade treinamentu ne’ebé PCIC rasik mak oraganiza. Tuir nia, dala-ruma mós tanba públiku hanoin katak durante ne’e nia servisu iha PCIC ne’e mak nia oan tiru de’it. Laiha tán buat seluk. Maibé, diretór PCIC konsidera buat hirak ne’e hanesan pensamentu ida ne’ebé mak subjetiva. Biar nune’e, nia prontu iha kualker oras, atu ema lori nia bá Ministériu Públiku hodi presta nia deklarasaun hanesan arguidu.

Jornalista: Vito Salvadór