Hatutan.com, (13 Fevereiru 2025), Díli- Reprezentante Santa Sé iha Timor-Leste, Mgr. Marco Sprizzi, Kinta (13/02/2025),  hala’o enkontru despedida ho Primeiru-Ministru Kay Rala Xanana Gusmão no husu atu Igreja no Estadu kontínua servisu hamutuk hodi servi povu ho dignu.

Lee Mós: Santa Sé Agradese no Orgullu ho Povu Timor-Leste Durante Vizita Papa Francisco

Mgr, Marco Sprizzi. Foto/Elio dos Santos da Costa

Reprezentante Santa Sé iha Timor-Leste Marco Sprizzi ba jornalista sira iha Palásiu Governu Díli hateten Ohin hanesan enkontru ida ho forma despedida ho Primeiru-Ministru Kay Rala Xanana Gusmão, hafoin tinan-neen ha’u nia misaun iha Timor-Leste hanesan Representante Santo Padre iha ne’e.

Nia afirma agora Santu Padre nomeia nia hanesan Prezidente da Autoridade de Traballu Santa Sé nian, signifika hanesan ministru iha Vatikanu.

“Ha’u mai atu despede, kumprimenta no agradese ho Primeiru-Ministru iha tempu ikus ha’u nia misaun iha Timor-Leste, liu-liu ba relasionamentu entre Igreja ho estadu Timor-Leste ne’ebé metin liután hafoin vizita Papa Francisco iha Timor-Leste. Tamba ne’e ohin iha enkontru amizade ho Primeiru-Ministru Kay Rala Xanana Gusmão ne’e ko’alia hikas kona-ba vizita Papa Francisco ne’ebé estraordináriu tebes,” Marco Sprizzi hateten.

Reprezenta Santa Sé ne’e partilla buat sira ne’e hotu ho Primeiru-Ministru ho forma ida amigavel, ho konsiderasaun no iha vizaun ida ba futuru hodi kontinua konstrusaun estadu no nasaun ne’ebé kontinua servisu sira Igreja nian hodi forma ema ho domin, iha konsiénsia, sai profisionál ho servisu diak para estadu sai nabilan liutan ho roman fiar nian, tamba povu ida-ne’e ho alvu espesiál ho espiritualidade ne’ebé povu seluk laiha.

Nia subliña Seidauk iha komunikasaun espesiál entre Vatikanu no estadu Timor-Leste maibé Santa Se servisu hela atu iha semana sira mai ne’e bele iha ona susessor ka reprezentante Santa Se ofisiál atu halo servisu iha Timor.

“Tinan-neen ne’ebé nakonu ho maravilloza, tinan-neen ne’ebé halo povu Timor-Leste hela metin iha ha’u nia fuan, no tinan-neen ne’ebé ha’u esperimenta Maromak nia grasa, ho amizade no karinu husi povu Timorense bainhira vizita Munisipiu sira, Parokiá sira, no too ba aldeia no suku sira inklui kapela sira iha área remota sira. Timoroan sira sei nafatin iha ha’u nia fuan, no ita hamutuk realiza ona buat barak no buat sira ne’e hela metin iha uma kreda Timor, ita realiza ona uma ba Nunsiatura, iha universidade katólika, no buat seluk ne’ebé mos marka iha istória ho vizita Papa Francisco nian, tamba ne’e buat sira ne’e hotu hanesan esperiénsia domin nian ho povu Timorense. No ha’u sei la haluha povu Timor no povu ida ne’e sei hela metin iha ha’u nia fuan.” Nia afirma.

Ohin mos diskute asuntu oin-oin, espesialmente vizaun sira ne’ebé Primeiru-Ministru iha liga ho asuntu ekonómiku, sosial ne’ebé iha kolaborasaun ho Igreja no konkorda ho Primeiru-Ministru katak igreja iha papel importante atu ajuda joven sira iha nasaun ne’e, hodi halo forma diferente ba iha luta, uluk joven sira luta ba independénsia no ohin loron foin-sa’e sira tenke luta ba dezenvolvimentu laos deit ba ekonómia ne’ebé importante maibé dezenvolvimentu sosiál para iha justisa, igualdade, kuidadu ba ema hotu, atu Timor sai ezemplu ba ema hotu iha mundu tomak.

Tamba ne’e hotu-hotu servisu ho sentidu ida, iha armonia nia laran, no Igreja bele ajuda foin-sa’e sira iha dalan sira ne’e.

Xanana agradese dedikasaun Marco Sprizzi iha Timor-Leste

Reprezenta Santa Sé mai Timor-Leste Mgr Marco Sprizzi hateten Prinsipálmente iha konversa ho Primeiru-Ministru presija iha kooperasaun ka parseria iha edukasaun, liu-liu iha eskola sira no universidade sira atu nune’e bele iha dalan ida uniku ho espesialidade Timor nian. Timor tenke iha dalan rasik ho identidade rasik, hodi guarda nia kultura rasik ne’ebé úniku no importante.

“Primeiru-Ministru agradese ba servisu sira ne’ebé halo hamutuk. Kongratula mos ha’u kona-bá karreira ne’ebé simu iha Vatikanu, no husu atu partilla nafatin ho Timor iha ida-idak nia parte,” Marco Sprizzi hatuir.

Mensajen mak ne’e Timor-Leste tenke iha konfiansa ba an rasik, ho rekursu ne’ebé iha, no riku-soin bo’ot liu Timor-Leste nian mak povu ida-ne’e.

Timor-Leste bele iha gas natural, mina, biodiversidade no buat furak oin-oin maibé riku-soin boot liu mak povu. Tamba ne’e iha konfiansa ba povu ida ne’e ba futuru.

Jubileu Aniversáriu Kristu nian

Mgr. Marco Sprizzi hateten Jubileu boot liu ne’ebé organiza kada tinan 25, hanesan aniversáriu Kristu nian.

“Kada tinan 25 Igreja Katólika organiza Jubileu atu simu grasa, bensan no Jubileu tinan ne’e ho tema “Peregrinos da Esperança,” Marco Sprizzi tenik.

Nia hatutan Timor-Leste hanesan país joven, pais ne’ebé ho potensialidade bo’ot bele sai mos hanesan nasaun ne’ebé konfiante liu, ne’ebé ho signifikadu iha esperansa ba uma kreda. Timor-Leste bele sai país ida ne’ebé fó testemuña ba mundu tomak kona-bá esperansa.

Jornalista: Vito Salvadór