Hatutan.com, (05 Marsu 2025), Díli- Ekipa konjunta Araña Leste, Araña Oeste junta hamutuk ho Forsa Polísia (FP) ne’ebé halo vijilánsia iha área fronteira terrestre kaptura Timoroan ida ho inisiál HL idade 30 ne’ebé halo tranzasaun ilegal iha área fronteira entre Timor-Leste ho Repúblika Indonézia.

Timoroan ne’ebé ekipa konjunta sira kaptura tanba envolve iha atividade tranzasaun ilegál iha área fronteira terrestre Timor-Lesho ho Indonézia. Foto/Espesiál

Komunikadu ne’ebé Hatutan.com asesu husi Gabinete Média Ministériu Interiór,Kkuarta (05/03/2025) relata  ekipa konjunta Araña Leste, Araña Oeste junta hamutuk ho FP (Forsa Polisia), halo vijilánsia iha área fronteira no konsege deteta karreta ida ho marka Fortuner kor malahuk, xapa matrikula  A.27-310, halo tranzasaun ilegal iha área fronteira entre Indonézia no Timor-Leste.

Ekipa servisu identifika sindikatu sira ne’e envolve sidadaun timoroan no mós sidadaun Indonézia ne’ebe tama mai ho ró hatún sasán iha Aldeia Miguir, Suku Aidabaleten, Postu Administrativu Atabae, Munisípiu Bobonaro no kontinua halo negósiu liu hosi dalan ilegal hodi tula sasán kontra bandu tama mai territóriu nasional.

“Ekipa servisu halo akompañamentu kedas hosi fronteira tama to’o iha Dili no konsege halo aprensaun ba kareta refere no asegura mos joven mane ida ho naran HL (30), inklui evidensia tabaku karon 11, iha Aldeia 4 de Setembru, Suku Comoro, Postu Administrativu Dom Aleixo, Munisipio Dili.” Hatutan.com sita komunikadu.

Bazeia ba informasaun ne’ebe rekolla katak karreta ne’e Timoroan ida ho nia motorista ida naran  inisiál JMDS, (35), hosi Munisípiu Bobonaro maka aluga hodi ba tula sasán ne’ebe tama hosi fronteira Indonézia nian mai iha área Manduki atu lori liubá kliente sira iha Dili no mós munisípiu seluk tan.

Ho deklarasaun hirak ne’e, ekipa servisu halo kedas liña koordenasaun ho servisu sekreta Marítima no Fronteira hodi halo vijilánsia makas iha fronteira hodi kontribui ba seguransa publika nune’e bele halo prevensaun ba atividade negósiu ilegal hanesan fa’an no sosa mina-rai ilegál , gazolina, gazóleu no animál ne’ebé maka sempre akontese iha liña fronteira.

Enkuantu objetu hirak ne’e ekipa servisu prienxe ona auto aprensaun no entrega kedas ba Servisu Investigasaun Kriminal Nasional, hodi halo auto partisipasaun ba Ministériu Públiku.

Jornalista: Elio dos Santos