Hatutan.com, (22 Dezembru 2025), Díli-Prosesu rekrutamentu ba kadete sira Polísia Nasionál Timor-Leste (PNTL) tinan 2025 nian besik konklui  tuir nia  kalendáriu ka timeline.

Lee Mós: Kadete PNTL Na’in-12.851 Tuir Ezame Kulturál

Kadete PNTL 2025 kontinua rona instrusaun. Foto/Juvinal Cabral dos Santos

Daudaun ne’e, Komisaun Juri Rekrutamentu PNTL 2025 hein hela rezultadu teste fiziku ho entrevista nian husi Minusípiu Viqueque ho Rejiaun Administrativu Espesiál Oé-Cusse Ambeno (RAEOA) ne’ebé sei remata iha loron 30 fulan-Dezembru ne’e, hodi kontinua kedas hakat ba faze ikus teste saúde.

Portavós Komisaun Juri bá  Rekrutamentu  PNTL 2025, Superintendente Polísia António da Luz, informa, iha teste saúde ne’e hanesan faze eliminatóriu. Katak sira ne’ebé saúde di’ak sei pasa no hirak ne’ebé saúde ladi’ak sei elemina ka la pasa.

Iha faze rekrutamentu teste fiziku nian, konklui ona husi munisípiu hotu-hotu, hela deit mak RAEOA ho Munisipiu Viqueque, ne’ebé sei remata iha loron 30 fulan-Dezembru kontinua teste bá saúde.

Ba jornalista sira, Segunda (22/12/2025), Superintendente Polísia António da Luz, hateten kona-bá prosesu rekrutamentu PNTL bá tinan 2025 prosesu physical test nian konklui ona iha loron 04 fulan-Novembru liubá, agora dadauk kontinua bá teste fiziku ho entrevista sei hela Munisípiu rua; RAOEA ho Viqueque.

“Valor ne’e depende ba ema idaidak nia esforsu tanba iha kandidatu hanesan ita boot sira hatene, kandidatu kuaze 12000-esin ne’ebe mak partisipa selesaun ida ne’e,” Superintendente Polísia António da Luz hateten iha Comoro.

Kadetes foun sira nia prosesu teste fiziku ho entrevista, depois ida ne’e mak akumulasaun ba valór sira. Tanba teste haat prova kultural, prova fiziku, entrevista no physical  test. Prova haat ne’e sei tau hamutuk para hetan valor ikus  hira depois dividir ba 4, fahe fali ba teste haat ne’e foin hetan rezultadu ikus mak 60 ba leten. Sé mak la atinji valór ida ne’e mak sira sei la passa.

“Prosesu tuir mai ita sei fó sai ba sira ne’ebé mak valór termina tiha ona, no sira sei tuir selesaun tuir mai mak saúde, tuir informasaun katak tanba ita presiza nain 400. Entaun ita presiza 400 ne’e hetan selesaun ikus iha prova mediku nian pois mak ita haree sira passa iha prova médiku ne’e mak prepara sira no partisipa ba iha formasaun baziku nian,” portavós Rekrutamentu PNTL 2025 ne’e esplika.

Komisaun rekrutamentu ne’e esplika, prova iha saúde ne’e mak eliminatoriu,  prova haat  kultural, fiziku, entrevista no physical test mak akumulativu. Sé mak saúde la di’ak  ne’e prova médiku sei haree sira nia kondisaun hotu sei tuir prova médiku nian.

Jornalista: Juvinal Cabral dos Santos