Hatutan.com, (17 Janeiru 2026), Díli– Sekretáriu Estadu Komunikasaun Sosiál  (SEKOMS), Expedito Dias Ximenes,  rekoñese prezidente Konsellu Administrasaun Rádiu Televizaun Timor-Leste, Empreza Públiku (RTTL,E.P), Elizeu Isaac Fernandes hala’o knaar inkompativel tanba assume kna’ar dirijente partidu CNRT nu’udár Primeiru Vise-Sekretáriu Ezekutivu OJP- CNRT Munisípiu Díli. 

Lee Mós: Asume Kargu Polítika iha OJP-CNRT Díli, AJAR Konsidera Elizeu Isaac Fernandes Hafoer Ona RTTL,E.P

Sekretáriu Estadu Komunikasaun Sosiál (SECOMS), Expedito Dias Ximenes. Foto/Dok

Ho knaar foun Elizeu Isaac Fernandes nian iha partidu CNRT ne’e, konsidera inkompatibilidade  tuir Dekretu-Lei nú.42/2008, 20 Novembru no nia alterasaun dahuluk iha loron 24 fulan-Outubru 2024, kona-bá transforma Rádiu Televizaun Timor-Leste, Empreza Públika no primeiru anexu maka Estatutu RTTL,E.P.

Dekreitu-lei 42/2008, artigu 13 (Estatutu ba membru Konsellu Administrasaun) numéru 1 aliña b-c,  define kona-bá Prezidente Konsellu Administrasaun Rádiu Televizaun Timor-Leste Empreza Públiku (RTTL,E.P), labele sai dirijente iha partidu polítika. Nune’e, iha aliña c difene mós Prezidente Konsellu Administrasaun  RTTL,E.P la bele sai titular iha kargu politíku. 

Iha fali númeru 4  haktuir mós katak Prezidente Konsellu Administrasaun  RTTL,E.P  durante nia mandatu, la bele okupa  kargu ka profisaun seluk, exetu ba knaar sira hanorin nian iha tempu parsiál.

 SEKOMS  Expedito Dias Ximenes  bá Jornalista iha konferénsia Imprensa iha El-Legendáriu, Díli, Sábadu (17/01/2026), rekoñese depois  polémika ne’ebé nia akompaña  husi média sosiál kona-bá   Prezidente Konsellu Administrasaun RTTL,E.P, Elizeu  Isaac Fernandes halo kna’ar inkompativilidade no husi deklarasaun oioin hosi entidade relevante sira, asosiasaun jornalista sira, Konsellu Imprensa, inklui Primeiru-Ministru (PM), Kay Rala Xanana Gusmão kona-bá saida mak akontese ho prezidente Konsellu Administrasaun RTTL,E.P, Elizeu Isaac Fernandes.

Expedito Dias Ximenes ne’ebé foin fila husi akompaña xefe redasaun no jestór Média Timor-Leste nian ba halo estudu komparativu iha Rádiu Relevizaun Repúblika Indonézia (RRI)-Bali no BaliTV (BTV), haktuir banhira Konsellu Ministru nomeia  Elizeu Isaac Fernandes bá lideransa RTTL,E.P kuaze tinan ida liubá, baze bá  nia kapasidade intelektuál no nia profisional ne’ebé iha.Maibé,  seidauk hela fulan ida atu kompleta  tinan ida, Elizeu Isaac Fernandes  iha  loron 27 fulan-Dezembru tinan 2025 simu  posse hanesan  Primeiru Vise- Sekretáriu Ezekutivu Organizasaun Juventude Partidu CNRT (OJP- CNRT)  Munisípiu Díli.

“Ha’u rasik laiha koñesimentu kona-bá Elizeu Isaac Fernandes nia posse  nu’udár dirijente partidu CNRT hanesan Primeiru Vise- Sekretáriu Ezekutivu OJP- CNRT  Munisípiu Díli. Ha’u hakfodak  bainhira jornalista ida husu kona-bá pozisaun ne’ebé Elizeu  hetan iha fulan-Dezembru tinan 2025, ha’u hateten katak ha’u sei verika lai,  hodi haree  verasidade loos ka lae. Maibé, depois  nia akompaña husi média sosiál, órgaun komunikasaun sosiál, hatudu katak loos no prova  duni, Prezidente RTTL,E.P Elizeu   hola parte iha OJP-CNRT Munisípiu Díli,” antigun Xefe-Redasaun jornál NOVAS iha tempú Governadór Timor-Timur, Abilio Osorio Soares ne’e hateten.

Expedito Dias Ximenes esplika kaer bá artigu 13 husi Dekreitu-Lei 42/2008 ne’ebé transforma RTTL ba Empreza Públiku, kona-bá estatutu membru iha Konsellu Administrasaun, ne’e hateten, membru Konsellu Administrasaun RTTL,E.P labele  envolve iha dirijente polítiku, no funsionariu públiku ka ajente administrasaun públiku.

“Sé  nia (Elizeu Isaac Fernandes, red) sai membru Konsellu Administrasaun RTTL,E.P,  nia labele sai dirijente iha partidu polítiku,” Expedito Ximenes hateten.

Nia afirma, tanba iha ona deklarasaun oin-oin,  komentáriu barak ho liafuan inkompatibilidade tanba ne’e haree bá artigu 13, dekreitu lei 42/2028 ne’e, se bainhira  ema ida asume hela kargu iha  membru ka Prezidente RTTL,E.P, labele asume.

“Agora sei irmaun, Elizeu Isaac Fernandes,   asume ona kargu partidu, asume ona dirijente iha partidu ida,   maka automatikamnte  ita  hanaran inkompatibilidade, katak  labele asume tan kargu iha fatin seluk,”  Expedito afirma tan.

Iha loron 21 fulan-Janeiru tinan 2026, iha Reuniaun Konsellu Ministru nian, SEKOMS Expedito Dias Ximenes kompromete hodi bazeia ba orientasaun Primeiru-MInistru nian atu SEKOM lori kestaun inkompatiblidade prezidente RTTLE.P nian Konsellu Ministru. 

“Primeiru-Ministru hateten katak ami hein  SEKOMS  mai hato’o iha Konsellu Ministru, maka ami bele hola desizaun,  loos ka lae? Tanba ne’e, ha’u  fila  husi servisu ida iha rai li’ur, Sesta (16/01/2026), ha’u hasoru Prirmeiru-Ministru  hodi hato’o kona-bá situasaun RTTL, E.P,”  Expedito hateten.

Nia dehan tanba diskusaun  no imprensaun barak iha públiku,  tanba ne’e nia esplika  ona Primeiru-Ministru, katak prova duni Prezidente RTTL ,E.P Elizeu Isaac Fernandes halo kna’ar inkompativilidade.

Molok ne’e, Primeiru-Ministru Kay Rala Xanana Gusmão,   hatan ba Hatutan.com, hafoin hasoru malu ho Prezidente Repúblika, José Ramos-Horta  iha Palásiu Prezidensiál, Kinta (15/01/2026), hateten  nia parte hein  SEKOMS,  Expedito Dias Ximenes aprenzenta bá Konsellu Ministru, hasai (ezonera) Elizeu Isaac Fernandes husi RTTL,E.P.

“Tanba RTTL,E.P ne’e tutela ba SEKOMS ka iha SEKOMS nia okos, no ha’u dehan tenke liu-husi SEKOMS lori bá Konsellu Ministru, ami hasai. Sé SEKOMS lori mai Konsellu Ministru, ha’u taka tiha ha’u nia matan lori mai ha’u asina,” Primeiru-Ministru Kay Rala Xanana Gusmão hateten hodi responde Hatutan.com hafoin hasoru malu ho Prezidente Repúblika, José Ramos-Horta iha Palásiu Governu,

Primeiru-Ministru nu’udár Prezidente partidu CNRT hamutuk ho nia Sekretáriu Jerál Francisco Kalbuadi Lay, iha loron 27 fulan-Dezembru tinan 2025, fó posse ba estrutura Organizasaun Juventude Partidu CNRT (OJP-CNRT) Munisípiu Díli, iha ne’ebé husi estrutura ne’e, prezidente Konsellu Administrasaun RTTL,E.P, Elizeu Isaac Fernandes hetan fiar assume knaar nu’udár Primeiru  Vise-Sekretáriu Ezekutivu OJP-CNRT Minisipiu Díli.

Primeiru-Ministru Kay Rala Xanana Gusmão hato’o agradese bá  média Hatutan.com, ne’ebé  aprezenta ona asuntu ne’e no nia promete iha Kuarta, 21 fulan-Janeiru 2026 nia hein SEKOMS Expedito Dias Ximenes iha reuniaun Konsellu Ministru.

“Ha’u agradese ita-boot (Jornalista Hatutan.com, red) informa bá ida-ne’e,  maibé ema nia oan ida naran SEKOMS ne’e laiha ne’e,  informa bá nia (SEKOMS-red),  favór ida, ha’u Kuarta-feira, semana oin,  ha’u hein,” PM Xanana afirma.

 Jornalista: Marcelino Tomae