Hatutan.com, (28 Janeiru 2026), Díli– Ministériu Públiku aprezenta ba Tribunál Judisiál Primeira Instánsia Díli (TJPID)  kona-bá kazu projetu fornesimentu kombustível no manutensaun karreta iha Rádiu Televizaun Timor-Leste Empreza Públiku (RTTL,E.P).

Lee Mós: Konsellu Ministru Ezonera Prezidente Konsellu Administrasaun RTTL,E.P Elizeu Isaac Fernandes

Karreta sira RTTL,E.P nian la bele halo operasaun tanba laiha ona kombustivel. Foto/Dok. Marcelino Tomae

Informasaun ne’ebé Hatutan.com asesu husi fontes importante sira iha Ministériu Públiku,   Segunda (26/01/2026), haktuir katak,  iha fulan-Dezembru tinan 2025, MP submete on aba Tribunál kazu  projetu fornesimentu kombustível no manutensaun karreta iha RTTL,E.P  ne’ebé deskonfia iha indikasaun krime partisipasaun ekonómia no administrasaun danoza.

“Kazu RTTL ne’e Ministériu Públiku hato’o ona bá tribunal. Sé  ha’u la sala iha fulan-Dezembru tinan kotuk (2025, red),” fontes MP ne’ebé husu atu la bele publika nia identidade ne’e hateten.

Fontes MP ne’e informa katak Kazu Fornesimentu Kombustivel no Manutensaun karreta, iha RTTL.E.P ne’e, Ministériu Públiku konstitui bá krime partisipasaun ekonómia no administrasaun danoza.

Nia afirma tan katak,  Ministériu Públiku aprezenta ona akuzasaun,   maibé tribunál seidauk halo distribuisaun bá juis  sé maka atu kaer.

“Imi bá husu bá tribunál, tanba sira maka hatene, tanba Ministériu Públiku  hato’o bá tiha ona,” fontes ne’e hateten.

Hatutan.com  tenta atu halo konfirmasaun bá Juiza Administradóra  Tribunál Judisiál Primeira Instánsia Díli,  Edita Palmira dos  Reis, maibé lakohi fó komentáriu.

Iha  Sesta,  03  fulan-Outubru tinan 2025,   dirijente masímu iha RTTL,E.P, arguidu  EIF ba hatan ona iha Miministeriu Públiku  kona-bá kazu   ho NUK: 0015/25.CACTL kona-bá  fornesimentu kombustivel no servisu manutensaun karreta iha RTTL, E.P ne’ebé deskonfia abuzu poder no korrupsaun.

Iha Kuarta, 01 fulan-Outubru tinan 2025, Ministeriu Públiku  (MP) hasai ona notifikasaun ba dirijente sira iha RTTL,E.P hodi presta deklarasaun iha MP relativa ho kazu fornesimentu kombustivel no servisu manutensaun karreta ba RTTL,E.P ne’e rasik.

Iha Tersa 14 fulan-Outubru 2025, dirijente RTTL,E.P na’in-tolu, presta deklarasaun iha Ministériu Públiku (MP) bá kazu projetu fornesimentu kombustivél  no manutensaun karreta iha instituisaun média estatál ne’e.

Iha  loron hanesan mós na’in bá empreza Mãe da Graça Unipesoal Lda,  presta  deklarasaun  iha Ministériu Públiku (MP) liga ho kazu fornesitmentu kobustivél iha Rádiu Televizaun Timor-Leste Empreza Públiku (RTTL,E.P).

Fó hanoin fila katak Prezidente Konsellu Administrasaun RTTL,E.P tempu ne’ebá, Elizeu Isaac Fernandes, deskonfia halo abuzu podér no hamosu prejuízu ba Estadu iha foti desizaun ba projetu  servisu fornesimentu kombustivel ho servisu manutensaun karreta iha RTTL,E.P.

Prezidente Konsellu Administrasaun RTTL,E.P, Elizeu Isaac Fernandes, uza nia kompeténsia hodi hatún despaxu fó projetu servisu fornesimentu kombustivel ho servisu manutensaun karreta ba kompañia rua (2) ne’ebé la prienxe rekizitu iha selesaun dokumentu no aprezenta presu boot ka la razoavel.

Tuir dokumentu  relatóriu avaliasaun servisu fornesimentu kombustivel ho klasifikasaun importante no númeru referénsia 07/Ekipa Juri/RTTL,E.P/IV/2025 ne’ebe          Hatutan.com  asesu hatudu, katak ekipa juri ho nia kompozisaun ema na’in-tolu mak hanesan;

-Marcelino Osorio (prezidente juri)

-Lenia de Fátima Moreira (juri)

-Melchior Tino Ribeiro Rodrigues (juri).

Sira halo enkontru iha loron 25 fulan-Abríl 2025, deside  kompañia Aitula Fuel’s Unipessoal, Lda, hodi fornese kombustivel ba RTTL,E.P ho razaun presu razoavel no dokumentu ne’ebé kompañia submete kompletu tuir  rekizitu ne’ebé RTTL,E.P mensiona.

Tabela avaliasaun dokumentu ba projetu servisu fornesimentu kombustivel ho nia kustu ka presu US$40,000.00, hatudu kompañia Aitula Fuel’s Unipessoal, Lda hetan valor 130 no aprezenta montante orsamentu ki’ik US$34,39 kompara ho kompañia Mãe da Graça Unipessoal, Lda, ne’ebé prezidente  Konsellu Administrativu RTTL,E.P, Elizeu Isaac Fernandes, indika hodi manan fali servisu fornesimentu kombustivel ba RTTL,E.P ho kustu $35,78 no hetan valor iha avaliasaun dokumentu 115 de’it.

Iha dokumentu karta akompañamentu ne’ebé Diretora Nasionál Administrasaun no Finansas RTTL,E.P, Noviana de Fátima Nahak, asina iha loron 29 fulan-Abríl 2025, hato’o ba Diretór Ezekutivu RTTL,E.P, João Guterres da Silva, reiteira tan katak bazeia ba rezultadu enkontru ekipa juri iha loron 25 fulan-Abríl 2025, hodi foti desizaun ba servisu fornesimentu kombustivel deside ba Aitula Fuel’s Unipessoal, Lda mak sai nu’udár manan na’in, ho razaun presu ne’ebé razoavel no dokumentu ne’ebé kompañia submete ho kompletu.

Iha fali loron 30 fulan-Abríl 2025, Diretór Ezekutivu RTTL,E.P, João Guterres da Silva, hato’o pedidu aprovasaun relatóriu avaliasaun servisu fornesimentu kombustivel ho númeru referénsia 31/D.E/RTTL,E.P/IV/2025, ba Prezidente Konsellu Administrasaun RTTL,E.P, Elizeu Isaac Fernandes,  atu aprova pedidu relatóriu avaliasaun servisu fornesimentu kombustivel.

Iha loron 13 fulan-Maiu 2025, Prezente Konsellu Administrasaun RTTL,E.P, Elizeu Isaac Fernandes,  hatún despaxu husu favór Diresaun Nasionál Administrasaun no Finansas (DNAF) trata asuntu ne’e fó oportunidade ba kompañia Mãe da Graça Unipessoal, Lda, ho razaun iha esperiénsia servisu hamutuk ne’ebé ho kometimentu ba servisu kualkér tempu.

Iha fali dokumentu seluk kona-bá servisu fornesimentu manutensaun karreta RTTL,E.P nian ho montante orsamentu US$20,000.00, ekipa juri ho nia kompozisaun  juri mak hanesan, Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri) halo enkontru hodi foti desizaun ba servisu fornesimentu manutensaun ba karreta  deside ba kompañia Fe Loog Unipessoal, Lda hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete ho kompletu tuir rekizitu ne’ebé RTTL,E.P husu.

Iha avaliasaun dokumentu ba projetu fornesimentu manutensaun ba karreta RTTL,E.P, kompañia Fe Loog Unipessoal, Lda hetan valor 130 no kompañia Fastep, Lda ne’ebé Prezidente RTTL,E.P Elizeu Isaac Fernandes, indika hetan de’it valor 110 tanba rekizitu sira hanesan TIN laiha no estatutu kompañia nian laiha.

Iha loron 29 fulan-Abríl 2025, Diretora Nasionál Administrasaun no Finansas RTTL,E.P, Noviana de Fátima Nahak submete karta akompañamentu ba Diretór Ezekutivu RTTL,E.P, João Guterres da Silva, ho númeru referénsia 98/DNAF-RTTL,EP/IV/2025, hodi solisita ba Diretór Ezekutivu RTTL,E.P, João Guterres da Silva,  atu bele hetan aprovasaun ba relatóriu ida ne’ebé ekipa juri deside kompañia Fe Loog Unipessoal, Lda maka manan hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete kompletu.

Iha loron 13 fulan-Maiu 2025, prezidente RTTL,E.P, Elizeu Isaac Fernandes hatún despaxu husu favor ba DNAF atu trata asuntu ne’e no fó oportunidade ba kompañia Fastep, Lda tanba bazeia bá esperiénsia servisu hamutuk  ne’ebé profisionál no prontu ba RTTL,E.P

Jornalista: Marcelino Tomae