Hatutan.com, (26 Setembru 2022), Díli—Iha tinan foun 2023, Prezidente Repúblika, José Ramos-Horta, lansa programa modernizasaun ekonomia iha Timor-Leste.

Lee Mós : Ramos-Horta ho Primeira Ministra Nova Zelándia  Diskute Asuntu Pás Mundiál

Prezidente Repúblika, José Ramos-Horta, hala’o enkontru ho Billionáriu Amerikanu, nu’udár mós na’in bá Open Society Foundation, George Soros ho nia oan Alex Soros iha Estadu Unidus Amérika, Sábadu (24/09/2022). Foto/GPR

Programa ne’e Xefe Estadu sei lansa hamutuk ho Governu, Parlamentu Nasionál ho apoiu hosi lider nasionál, partidu polítiku no organizasaun  La’ós Governu nian ka ONG sira.

Sita hosi komunikadu imprensa hosi Palásiu Prezidensiál ne’ebé Hatutan.com asesu, Segunda (26/09/2022), katak programa modernizasaun ekonomia ne’e, sei suporta direita hosi Bilionáriu Amerikanu  hanesan na’in bá Open Society Foundation, George Soros ho nia oan Alex Soros iha Estadu Unidus Amérika (EUA).

Advertisement

Xefe Estadu rasik husu ona bá sira, hodi halo estudu modernu, atu ajuda prosesu dezenvolvimentu iha Timor-Leste.

“George Soros hakarak apoia Timor-Leste bá oin, ha’u husu ba sira favor, imi halo dokumentu ida hanesan dalan ida bá modernizasaun Timor-Leste nia ekonomia, ha’u hakarak lansa programa ne’e iha tinan 2023 hamutuk ho maun Boot Xanana, partidu hotu iha parlamentu, ita haree oinsá maka rai ne’e atu la’o bá oin,” Prezidente Repúblika José Ramos-Horta hosi Nova Iorke.

Antes ne’e, Ramos-Horta hala’o ona enkontru ho reprezentante Lideransa Fundasaun Open Society Foundation, George Soros nia ekipa iha Díli hodi ko’alia kona-bá programa ne’ebé atu dezenvolve iha Timor.

Timor-Leste tenke avansa bá oin ho prosesu dezenvolvimentu infraestrutura, ekonomia ne’ebé modernu ho teknolojia ne’ebé di’ak. Tanba programa ne’e hola parte iha dijitalizasaun bá ekonomia tomak Timor-Leste nian.

Programa modernizasaun ekonomia ne’e sei la’o tuir Planu Estratéjiku Dezenvolvimentu Nasional (PEDN) 2011-2030 ne’ebé antes ne’e Governu anteriór kria no sosializa ona bá povu tomak, maibé tuir Ramos-Horta katak, planu hirak ne’e sei haree fila fali.

Advertisement

“Ita tenke estuda didi’ak Planu Estratéjiku Dezenvolvimentu Nasionál (PEDN), planu ne’e sei válidu ka lae?, parte (programa ka planu) parte hira ona maka Governu iha tinan sanulu (10) liubá ka mai ne’e ezekuta ona planu estratéjiku ne’e ka presiza hadi’a,” Ramos-Horta hateten.

Atu moderniza ekonomia Timor-Leste, Horta sei servisu hamutuk ho Governu Timor-Leste atu mantein polítika Timor-Leste hodi dada kadoras hosi tasi Timor mai rai-maran Timor-Leste.

“Polítika Timor-Leste nian maka dada kadoras mai Timor-Leste,” Ramos-Horta afirma.

Atu mantein polítika dada kadoras ne’e mai Timor-Leste, Horta dehan, lider nasionál, Kay Rala Xanana Gusmão mós halo ona enkontru ho Ministru Negósiu Estranjeiru Austrália, Penny Wong iha Nova Iorke hodi re-afirma pozisaun Timor-Leste nian.

 Jornalista : Vito Salvadór

Advertisement

Advertisement