Hatutan.com, (04 Outubru 2021), Díli-Vítima dezastre naturaís, 04 fulan-Abríl 2021, hamutuk uma-kain 135 kontinua sai hanesan Internal Displaced Peoples (IDPs). Sira hela iha lona-okos hodi hein desizaun emerjénsia hosi Governu  no sira presiza fila ba hela fatin ka hela iha uma adekuadu molok udan monu-rai.

Vítima inundasaun, 04 fulan-Abríl 2021, kontinua hela iha lona-okos iha Manleuana, Díli. Foto/Hatutan.com

Husi numeru uma-kain 135 ne’e, iha ona uma-kain 60 maka prontu koopera ho Governu atu fila ba sira-nia hela-fatin no balun ne’ebé uma laiha Díli  hakrak fila ba sira-nia knua ka munisípiu.  

Vítima inundasaun lubun ne’e agora aguenta hela iha fatin IDPs Maneluana, Sentru Formasaun Dom Bosco, Comoro no balun iha Uma Formasaun Canosiano sira-nian iha Hera. 

Koordenadór  IDPs iha Kampu Real Madrid, Maneluana, Díli, José Abrão Tani, hateten, membru Governu lubun ona maka ba vizita hodi haree sira-nia kondisaun moris hanesan IDPs, maibé to’o agora seidauk iha serteza atu Governu atu lori-sai sira hosi lona-okos.

Uma-kain 48 ho abitante 264 hosi Aldeia Lisibutak ho Aldeia Lemokari, Suku Manleuana, kontinua hela iha lona-okos no sofre liu ba bee-moos no nesesidade bázika seluk.

IDPs sira-ne’e rekoñese katak kada fulan  Governu fó subsídiu alimentár, maibé la sufisiente tamba maioria família la serbisu no laiha rendimentu no sira-nia saúde iha risku laran tenke aguenta toba iha lona-okos.

“Bainhira Governu mai haree ami dehan, atu muda ami ba bairru-foun halo ami kontente. Maibé bairru-foun ida-ne’e to’o agora ami la haree no la rona ona. Ami terus bee-moos laiha, udan ami toba la-di’ak, no ami nia kondisaun agora susar tebetebes,” José Abrão Tani hateten ba Hatutan.com  iha kampu IDPs, Manleuana Díli, Segunda (04/10/2021).

Nia hatutan, populasaun iha kampu IDps  Manleuana prontu koopera ho Governu hodi fila ba hela fatin, importante Governu tenke kumpre promesa hodi labele abandona populasaun  nafatin hela iha lona-okos.

Dadus jerál hosi Governu nian hatudu katak komunidade hamutuk 135 maka to’o oras-ne’e sei hela iha lona-okos.

Husi totál uma-kain 60-resin mak deside fila ba uma no Governu komprometidu atu apoiu sira ho material konstrusaun hodi bele hadi’a ka konstrui hikas sira-nia hela fatin ne’ebé hetan estragus totál.

“Governu buka no tenta ona atu fó solusaun ba vítima inundasaun, 04 fulan-Abríl ho kondisaun ida bele akomoda sira iha fatin ida ne’ebé Governu sei prepara liuhusi sentru akollamentu ida,” Vise-Primeiru-Ministru, José Reis lia-tun  ba jornalista sira hafoin hasoru-malu ho Primeiru-Ministru (PM), Taur Matan Ruak,  iha  Farol, Díli.

Sentru akollamentu ne’ebé Governu sei kria ho kondisaun multifunsaun, atu nune’e, Governu bele uza fatin refere la’ós ba de’it sentru akollamentu, maibé bele mós ba atividade seluk ne’ebé iha ligasaun ho dezastre naturaís.

Oras ne’e, José Reis, informa progresu ba harii sentru akollamentu multifunsaun iha hela faze levantamentu ba rai tanba ne’e Sekretaria Estadu Protesaun Sivíl sei haree no halo koordenasaun serbisu ho Ministériu Administrasaun Estatál (MAE), Ministériu Justisa (MJ) ho Sekretáriu Estadu Terras no  Propriedade  (SETP) atu bele identifika fatin no rai hodi bele harii sentru akollamentu ne’e.

Hosi sorin seluk, Sekretáriu Estadu Protesaun Sivíl, Joaquim Gusmão dos Reis, hateten, sira-nia parte prontu atu harii sentru akollamentu nasionál ne’e iha ne’ebé de’it, bele iha Díli no mós iha munisípiu seluk no importante mak Governu liuhusi Ministériu Justisa tenke iha desizaun ida kona-bá estatutu rai, atu nune’e, bele hahú ona ho serbisu balun iha terrenu.

Ba vítima inundasaun ne’ebé deside fila ba hela fatin anteriór ka fila ba munisípiu, Governu sei fasilita hodi apoiu vítima ho materiál konstrusaun atu bele hakbiit no rekupera hikas sira-nia kondisaun.

 “Ba família vítima sira ne’ebé deside mantein iha fatin IDPs, ami sei halo mediasaun hodi buka meius temporáriu atu fó alojamentu,”  Joaquim Gusmão dos Reis hateten.

To’o agora governu seidauk iha data serteza atu liberta vítima inundasaun sira husi lona-okos ka kampu IDPs tanba parte rua seidauk iha konkordánsia maske porsentu 40 husi refujiadu-sira konkorda ona atu fila ba sira-nia hela fatin. (bit)