Hatutan.com, (24 Novembru 2022), Ataúro—Ministru Transporte no Komunikasaun (MTK), José Agostinho da Silva konsidera konektevidade Marítima no aero ba Munisípiu Ataúro importante tanba illa ne’e sai fatin destinasaun turístika potensiál bainhira turista sira hakarak vizita Timor Leste (TL).

Ambiente loron matan sa’e iha dadeer-san hateke hosi Illa Ataúro. Foto/Lirio da Fonseca.

MTK rekoñese katak setór hotu-hotu atu dezenvolve rai ida ne’e konektividade ne’e importante, bele ko’alia turizmu no turista, maibé konektividade falla laiha infraestrutura Aeroportu, Portu no mós laiha ro ahi, laiha aviaun, laiha transporte terrestre, estrada no mós transporte ne’e impossível.

Lee Mós: Reuniaun KM Iha Ataúro, Prezidente Repúblika “Ejize” Governu Rezolve Imediata Problema Prinsipál Iha Munisípiu Ne’e

“Atu dezenvolve seitór Turizmu hodi bele fasilita populasaun hosi sira nia fatin ba merkadu atu fa’an produtu lokál entaun iha ligasaun hotu ba konektividade ne’ebé hanesan pilár ida ne’ebé importante tenke dezenvolve,” José Agostinho hateten Iha Suku Beloi, Kinta (24/11/2022).

Papél governu iha prosesu transformasaun postu administrativu Ataúro sai munisípiu, governu iha ona planu estratéjiku no munisipiu ne’e iha fundu espesiál dezenvolvementu rasik no ekipa interministeriál sira hotu servisu hamutuk atu haree mós ida ne’e.

Orsamentu ba Portu no Aeroportu Ataúro ho montante ne’ebé signifikante atu dezenvolve seitór sira importante tanba Estatutu Ataúro espesiál no governu sentrál mak fó apoiu.

Fundu Espesiál dezenvolvementu Ataúro (FEDA) ne’ebé governu sentrál tau atu asegura dezenvolvimentu Ataúro.

Agora oinsá mak Ministériu hotu-hotu koordena atu fasilita prosesu sira ne’e bele la’o lalais liliu infraestrutura Portu no Aeroportu, la’ós dezenvolve tiha husik hela, maibé tenke iha jestór sira, rekursu umanus ne’ebé iha kapasidade kualifikadu atu bele jere infraestrutura sira ne’e ho di’ak.

Kona-ba bainhira loos mak Portu no Aeroportu ne’e iha Atauro ne’e hahú, MTK hateten, la’ós tur-tur ba halo konstrusaun fiziku, tenke halo estudu viabilidade ida hodi elabora planu mestre ida ne’ebé sai hanesan mata dalan atu bele konstrui obra ne’e.

“Oras ne’e daudauk estudu viabilidade ne’e finaliza ona, péritu sira hosi Japaun, sira halo estudu ba Portu hotu-hotu iha nivél territóriu inklui Atauro, sira foin mak konklui sira nia estudu viabilidade, dadus sira ne’e rekolla hotu ona,” nia informa.

Semana kotuk tékniku sira hosi Japaun foin halo despedida ho MTK, sira ba fali Japaun no fulan Janeiru sira sei fila fali mai nune’e sira elebora planu mestre ba konstrusaun Portu rejionais hotu-hotu Atauro, Kairabela, Com, Lore, Beasu, Betano, Suai Loro no mós portu sira seluk tan.

Antes ne’e Prezidente Repúblika, José Ramos-Horta mós preokupa ho kondisaun pista ba aviaun inklui mos portu Atauro.

Xefe Estadu husu atu governu bele haree didiak posibilidade hodi hadia tiha portu Atauru no pista aviaun nian, klinika saúde nian ne’ebé diak liu kompletu ho ekipamentu, atu bele fo atendimentu ba komunidade sira ho diak.

Jornalista: Vito Salvadór