Hatutan.com, (09 Janeiru 2023), Díli—Kazu insidente sona kanek vítima iha área Bidau, besik Ponte BJ Habibie iha Sábadu (07/01/2023), to’o oras-ne’e seidauk bele fó ninia deklarasaun ruma bá autoridade polisiál, tanba sei hala’o tratamentu saúde iha Hospital Nasionál Guido Valadares (HNGV), Bidau Díli.

Rezultadu Ray-X hosi vítima Damazo Correia Guterres ne’ebé hetan sona hosi ema deskoñesidu iha área Bidau, besik Ponte BJ Habibie iha Sábadu (07/01/2023). Foto/Espesiál.

Maski vítima seidauk fó informasaun, maibé Polísia Nasionál Timor Leste (PNTL) liuhosi ninia ekipa sekreta sira, daudaun ne’e buka halibur hela informasaun iha terrenu, nune’e hetan lalais autór prinsipál sira to’o kaptura hodi hatán bá nia aktu krime ne’ebé halo, tuir Lei.

Lee Mós: Kazu Omisídiu iha Delta-Elemloi, PNTL Identifika Ona Paradeiru Autór Prinsipál

“Iha kazu área ponte BJ Habibie, ita seidauk rekolla informasaun barak tanba vítima nia kondisaun seidauk bele fó informasaun no laiha sasin ruma liga bá iha ne’ebá. Maibé ita iha meiu seluk no ida ne’e segredu justisa, la presiza publika. Ita sei hein vítima, bainhira bele ko’alia, ne’e mak ita foin bele hetan kronolojia hosi akontesimentu hosi nia rasik atu bele junta prosesu sira ne’e,” Komandante PNTL Munisípiu Díli, Superintendente Xefe Natercia Eufrasia Martins Soares, hateten hafoin fó orientasaun serbísu bá membru sira iha Komandu PNTL Munisípiu Díli, Segunda (09/01/2023).

Maski nune’e PNTL aselera ninia prosesu ne’ebé la’o hela, membru sira halo hela prosesu ida-ne’e tuir prosedimentu krime ne’ebé mak iha.

Antes ne’e, Hatutan.com asesu dadus balun hosi parte HNGV katak, iha 07 Janeiru 2023, iha tuku 21:45 Otl, akontese vítima Damazo Correia Guterres ema sona iha área Bidau Lesidere, besik ponte BJ Habibie.

Hafoin hetan sona, vítima sa’e rasik ninia motór hodi bá duni to’o iha HNGV atu hetan tratamentu saúde.

Tuir informasaun katak, vítima fila hosi Metiaut mak ema deskoñesidu sona iha parte kotuk laran ho tudik.

Vítima ne’e ho naran kompletu Damazo Correia Guterres, moris iha 11 Dezembru 1993, ho naturalidade Basarawai, Haeconi, Bagia, Baucau.  

Damazo sei klosan hela iha aldeia Becusse sentru, suku Becora, Postu administrativu Kristu Rei, munisipiu Díli.

Fotografia Ne’ebé Virál, Hoax

Foto Hoax.

Superintendente Xefe Polísia, Natercia Eufrasia Martins Soares mós konfirma katak, kazu sona tán joven mane ida iha área eis merkadu Díli ne’e la loos tanba depois de halo verfikasaun, Polisia detekta katak akontesimentu ne’e kazu antigu no la’ós mós iha territóriu Timor-Leste.

Iha domingu (08/01/2023), haleu tuku 23: 05 kalan otl, fotográfia  ida espalla no virál loos iha média sosiál, tantu facebook ho WatsApp katak, iha tán akontesimentu kazu insidente ida iha área CCD, ema deskoñesidu ho kro’at ka katana hakanek tán vítima ida iha ninia liman parte karuk.

“Kona-bá fotografia ida virál iha média, liu-liu média sosial facebook ne’e, ita nia membru sira buka tuir kedan, halo komunikasaun ho ospitál sira no sira la simu pasiente ho istória ida tuir imajen ka fotografia iha média. Signifika, foto ne’e antigu mak ema foti no posting fali,” Natercia Eufrasia Martins Soares, klarifika.

Komandu PNTL husu bá komunidade atu labele utiliza foto ruma, halo istória falsu, fó sai iha média sosiál, atu halo ta’uk komunidade. Bainhira polisia deteta ida-ne’e, sei kaptura no prosesa tuir Lei.

Jornalista: Rogério Pereira Cárceres