Hatutan.com, (30 Janeiru 2023), Díli—Governu ezekuta ona Orsamentu Jerál Estadu (OJE) tinan 2023 iha fulan Janeiru hamutuk millaun $40.

Ministru Finansas (MF), Rui Augusto Gomes atualiza ona progresu ezekusaun ne’e bá Primeiru Ministru (PM), Taur Matan Ruak iha enkontru semanál ne’ebé hala’o iha Palásiu Governu, Segunda (30/01/2023).

Lee Mós: Xefe Estadu Promulga OJE 2023 Billiaun $2,16

Advertisement

“Ami ko’alia kona-bá asuntu lubun ida mak hanesan ezekusaun orsamentál, dala barak imi rona dehan sei la ezekuta, maibé iha fulan-Janeiru nia laran ita konsege ezekuta ona por volta millaun $40 inklui saláriu, transferénsia ba Veteranus, viajen ba rai-li’ur ho viajen lokál. Signifika sistema ne’e funsiona hela, la’o hela,” Rui Gomes hatete, hafoin enkontru ho Primeiru Ministru.

Segunda kestaun ne’ebé Rui Gomes hato’o ba Primeiru-Ministru maka, ko’alia kona-bá asinatura akordu ho Austrália ne’ebé sei akontese iha semana oin antes Xefe Governu dezloka ba Kamberra, Austrália.

Akordu ida-ne’e kona-bá 20 milloins grant ne’ebé TL sei simu hosi Austrália hanesan doasaun ida atu apoia TL nia projetu programa bolsa da mãe jerasaun foun inklui Programa Nasionál Dezenvolvimentu Suku (PNDS), ho mós traballadór sira sazonal works.

Terseira kestaun, Ministru Finansas ho Taur Matan Ruak ko’alia kona-bá inflasaun ka kestaun sira ne’ebé daudaun ne’e hanesan sai tema sentrál bá iha debate iha fatin-fatin, no Ministru Finansas esplika mós bá Primeiru-Ministru katak, tuir loloos saída mak akontese ne’e mak espekulasaun la’ós inflasaun.

“Se ita haree inflasaun, hahú kedan hosi novembru 2020, fulan-marsu 2020 to’o kedan jullu 2022 nia atinje ne’e iha 2022, 2,8%. Hahú hosi ne’ebá nia komesa tun ou seja mezmu iha operasionaliza tiha ona Portu Tibar, inflasaun ne’e nia tendénsia tun. Hahú kedan hosi fulan-jullu, ita hatene katak Portu Tibar hetan em funsaun iha fulan-setembru nia laran no ofisiálmente ita inaugura iha Outubru,” nia esplika.

Advertisement

Ho ida-ne’e maka haree ba ninia impaktu, inflasaun ladún boot no espera katak ida-ne’e mós hamenus preokupasaun públiku kona-bá inflasaun ne’ebé akontese daudaun.

Prezidente Repúblika (PR), José Ramos-Horta promulga proposta Orsamentu Jerál Estadu (OJE) tinan 2023 ho montante $2.155.715.306.

Montante ne’e kompostu hosi Orsamentu Administrasaun Sentrál $1.800.000.000, Orsamentu Seguransa Sosiál $235,715.306 no Rejiaun Administrativa Espesiál Oecusse Ambeno (RAEOA) $120.000.000.

Jornalista: Rogério Pereira Cárceres

Advertisement