Hatutan.com, (09 Marsu 2023), Díli- Klubu segunda divizaun Lica-Lica Lemorai FC rekolla pontu tolu (3) dahuluk iha Liga Timorense époka 2022-2023 hafoin “kebra” Santa Cruz FC ho skor 2-1.

Lee Mós : AS Marca Kontinua Lidera Tabela Klasifikasaun Segunda Divizaun Hafoin Halakon Kablaki FC 2-1

Lica-Lica Lemorai FC ho Santa Cruz FC. Foto/Elio dos Santos da Costa

Ho pontu tolu ne’ebé klubu Lica-Lica Lemorai FC rekolla ne’e lori klubu estimadu Munisípiu Viqueque ne’e hakur liu zona okos tabela klasifikasaun segunda divizaun no Santa Cruz FC obrigadu tenke hela mesak iha zona okos ho pontus zero.

Ekipa rua hahú jogu hanesan bai-bain, halo pasajen iha meiu kampu ho bola badak no hahú joga sa’e hodi halo kontra atake ba malu. Laiha ekipa ida mak hatudu liu nia superioridade iha jogu iha kampu laran Estadiu Munisipál Díli, Kinta loraik (9/3/2023).

Ekipa Santa Cruz FC lansa uluk atake ba nia adversáriu Lica-Lica Lemorai FC liuhosi Jogadór avansadu Luís Figo (10) ne’ebé sempre tenta atu halo atake liuhosi liña direita adversáriu nian.

Esforsu ne’ebé Santa Cruz FC halo iha duni rezultadu iha minutu 11, Jogadór Lica-Lica Lemorai FC Elias Gomes (4) halo auto golu hafoin falla antesipa bola ne’ebé Jogadór Santa Cruz FC Luís Figo (10) suta nune’e bola tama ba rede laran, ho golu ne’ebé akontese halo Santa Cruz FC lidera uluk ho skor 1-0.

Ekipa rua mantein disiplina, no kada ekipa sempre halo jogu ho kalma, nune’e laiha falta ruma ne’ebé lori risku bá Jogadór sira iha kampu laran no árbitru ne’ebé lidera jogu ne’e la hasai kartaun kinur.

Lica-Lica Lemorai FC sempre halo kontra atake liuhosi pasajen bola as, maibé adversáriu sempre halo antesipasaun ho di’ak. Santa Cruz FC nafatin tenta halo jogu  hosi táktika ne’ebé iha atu bele aumenta tan golu ruma maibé sei nafatin falla.

Jogadór avansadu Santa Cruz FC Juvêncio Menezes (9) hetan bola oportunidade dala rua tuituir malu, iha minutu 40 no 45+1, maibé falla halo golu maske mesak ho baliza. Ekipa rua mantein ho skor 1-0 too primeira parte termina.

Lica-Lica Lemorai FC “Kebra” Santa Cruz FC ho skor 2-1 iha jogu Liga Timorense époka 2022-2023 iha Estadiu Munisipál Díli, Sesta (9/3/2023). Foto/Elio dos Santos da Costa

Hakat bá segunda parte, ekipa Lica-Lica Lemorai FC kontinua halo jogu nakloke no sempre halo presaun bá Santa Cruz FC hodi buka oportunidade atu halo golu.

Jogadór Lica-Lica Lemorai FC Ruben Borges (11) hetan kartaun kinur hafoin halo erru iha kampu laran. Tama báminutu 52 Lica-Lica Lemorai FC halo substituisaun bá Jogadór iha liña defeza sentral hodi hasai Josefino Gusmão (5) ne’ebé sofre aleija no hatama Emildio Casimiro (3).

Ho substituisaun ne’e liña defeza Lica-Lica Lemorai FC solidu liután hodi asegura atake ne’ebé Santa Cruz FC halo. Lica-Lica Lemorai FC kontinua halo substituisaun iha minutu 57 hodi hasai Jogadór Libório Pereira (22) ne’ebé mos sofre aleija iha ain no hatama Andre Sarmento (7) hodi hasae efetividade iha liña avansadu.

Andre Sarmento (7) nia prezensa iha kampu laran lori dunik rezultadu, tama ba minutu 60 Jogadór avansadu refere marka golu ida hodi muda skor ba 1-1.

Hafoin golu ne’e, ekipa Lica-Lica Lemorai FC kontinua halo presaun bá Santa Cruz FC no lansa ataka tuituir malu bá iha adversáriu.

Lica-Lica Lemorai FC halo tan substituisaun ba Jogadór iha liña klaran iha minutu 62 hodi hasai Joanico Noronha (15) no hatama Tonzo Madeira (14), atu bele halo jogu ida atakante no asegura liña hodi halo golu.

Haree bá ameasa ne’ebé iha ekipa Santa Cruz FC hahú halo tranzisaun bá táktika hodi hasai Jogadór Diamantino Lopes (8) ne’ebé joga iha meiu kampu no defeza sentral Ivan Lay (5) hodi hatama Barnabé Soares (18) no Apolinário da Silva (27) iha minutu 65.

Liu de’it minutu rua no tama bá minutu 67 Santa Cruz FC kontinua halo substituisaun iha liña avansadu hodi hasai Luís Figo (10) no hatama Moise Kouame (11) atu bele hadi’a efetividade iha liña avansadu.

Minutu 70, Jogadór Lica-Lica Lemorai FC sira hahú halo tranzisaun hodi halo kontra atake aproveita fallansu ne’ebé Jogadór Santa Cruz FC halo iha liña defeza ho nune’e Jogadór Lica-Lica Lemorai FC Inácio Magno (6) lansa kedas bola bá baliza aproveita oportunidade ne’ebé iha no bola konsege tama bá rede Santa Cruz FC nian no skor muda ba 2-1.

Ekipa rua mantein halo esforsu no kada ekipa kontinua halo mudansa ba táktika, Santa Cruz FC hahú halo esforsu atu bele halo empata bá jogu ne’e no Lica-Lica Lemorai FC halo jogu ida defensivu liu atu asegura vitória ne’ebé iha.

 Jogadór Santa Cruz FC Moise Koame (11) simu kartaun kinur iha minutu 80, hafoin kartaun kinur ne’ebé iha, ekipa Santa Cruz FC kontinua hasai Jogadór Paulo Godinho (19) iha liña médiu no hatama avansadu Ronaldonho Freitas (33) iha minutu 82.

Ekipa  Lica-Lica Lemorai FC halo tan substituisaun hodi hasai Inácio Magno (6) no Nelson da Costa (23) no hatama Helder Soares (21) no Oldegar Xavier (18) iha minutu 90 atu bele halo jogu iha klaran no bele xave vitória ne’ebé iha.

Too tempu segunda parte remata, sinál jogu termina ekipa rua laiha ida mak aumenta tan golu, ho nune’e ekipa Lica-Lica Lemorai FC mak sai manan na’in bá jogu loraik ne’e no rekolla pontu tolu importante hodi sai husi zona okos tabela klasifikasaun segunda divizaun époka 2022-2023.

Asistente treinadór Santa Cruz FC, Arsenio Afonso hateten iha primeira parte nia ekipa lidera uluk ho skor 1-0, maibé iha jogu minutu 90 mak determina nune’e hafoin jogu remata rezultadu hatudu Santa Cruz FC derrota.

Nia afirma maske derrota maibé jogu la’ós termina ona iha ne’e tamba ne’e sei halo esforsu bá jogu sira tuir mai.

Treinadór Lica-Lica Lemorai FC, Nelson Soares hato’o parabéns ba Jogadór Lica-Lica Lemorai FC sira hotu, maske Lica-Lica sofre uluk golu iha primeira parte maibé konsege hadi’a no iha segunda parte konsege marka golu rua bá ekipa nia vitória.

Jornalista: Vito Salvadór