Hatutan.com (23 Outubru 2021), Vatikanu—Momentu ne’ebé emosionál tebes, akontese bainhira labarik mane oan ida ho kondisaun moras mentál, teki-teki sa’e ba palku leten fatin ne’ebé Papa Francisco tuur bá, hodi husu solideo ka sapeo kiik iha Papa Francisco nia ulun.

Paolo Junior (tinan 10) ne’ebé ho moras mental husu Solideo Papa Francisco iha Vatikanu, Kuarta 20 Outubru 2021. Foto/Reuters.

Sapeo kiik ne’e hanaran Zucchetto. Naran seluk Pileola ka solideo. Iha lian Indonézia, bai-bain ema koñese liu solideo.  Funsaun hosi solideo atu satan netik Amu Papa nia ulun hosi klima malirin.

Papa responde ho kalma no kaer-liman ho Paolo Junior ne’ebé ho idade sanulu (10), Paolo hatudu ba solideo ne’ebé Amu Papa uza no husu atu nia bele uza.

Reuters no mós usmail24.com  fó-sai iha kuarta, 20 Outubru 2021, katak, momentu emosionál ne’e akontese ho espontaneamente bainhira Papa Francisco lidera audiénsia públika iha aula Paulo VI iha Vatikanu.

Iha momentu ne’ebá, Papa konvida Paolo atu tuur hamutuk iha nia sorin kuana ho kadeira ne’ebé entrega hosi Xefe família Papál, Mgr Leonardo Sapienza.

Bainhira labarik mane ne’e tuur iha kadeira Mgr Leonardo Sapienza, hahú basa-liman ho entuziasmu, diverte tebes Papa Francisco, no Papa rasik louva tebes labarik mane ne’e, tanba nia maneira ‘hakbesik no la’o sa’e ba palku hanesan iha nia uma rasik’.

Paolo Junior ikus mai simu duni sapeo mutin hanesan ho Papa nian molok fila ba tuur hikas ho nia família, iha momentu ne’e kedan ambiente iha aula Paulo VI, barullu tanba ema hotu basa-liman ba Paolo Junior.

“Ha’u fó obrigadu ba labarik mane ne’e liuliu ba lisaun ne’ebé nia hanorin ona mai ita hotu,” Papa Francisco hateten iha audiénsia ne’e  nia rohan, hodi elojia ho espontaniedade no liberdade hosi labarik sira-nian.

Papa Francisco haku’ak Paolo Junior (tinan 10) ne’ebé ho moras mentál husu Solideo iha Vatikanu, Kuarta 20 Outubru 2021. Foto/Reuters.

Papa Francisco ne’ebé ho idade 84 ne’e husu atu tau atensaun ba defisiénsia ne’ebé Paolo Junior iha.

“Nai Maromak sei tulun nia iha nia limitasaun hirak-ne’e, iha nia kresimentu-sira tanba nia fó mai ita testamuña ne’ebé mai hosi fuan,” Papa hateten.

Líder másimu Igreja Katólika ne’e subliña katak, labarik-sira laiha tradutór automátika hosi fuan ba moris, maibé fuan sempre book aan la’o ba oin.

Papa Francisco lolo-liman atu bele kaer-liman ho labarik ne’ebé hakbesik ba nia, hafoin entrega solideo hanesan prémiu hosi Papa. Labarik ne’e haku’ak Papa bainhira hasoru hikas malu iha audiénsia públika ne’e nia rohan.

Papa ko’alia barak iha audiénsia ne’e kona-bá problema liberdade no fó-hanoin hikas ba sarani sira, katak, Apostolu Saun Paulo hanorin kona-bá liberdade katak, labele tau de’it importánsia ba an rasik.

“Liberdade ne’ebé guia hosi domin, úniku dalan ne’ebé liberta ita an rasik no ema seluk,” Papa Francisco, subliña.

Jornalista: Vito Salvadór