Hatutan.com, (29 Agostu 2023), Díli—Governu liuhosi Ministériu Interiór (MI) sei halo revizaun bá estutu Polísia Nasionál Timor-Leste (PNTL) no husu Komandu atu reativa saláriu mensál bá membru na’in-158 ne’ebé molok ne’e Governu anteriór aplika ona reforma hodi fila bá vida sivíl.

“Ita husu ona bá PNTL atu reativa sira-nia saláriu nune’e ami sei lori diploma legál bá Konsellu Ministru, atu aprova lai revizaun estatutu ne’e rasik ho tán diploma legál sira seluk, depois ita hahú ona prosesu sira seluk,” Ministru Interiór, Francisco Guterres hateten hafoin partisipa sorumutu Konsellu Ministru extraordinária iha Palásiu Governu, Díli, Tersa (29/08/23).

Lee Mós: Governu Rezolve Uluk Saláriu Membru PNTL Reformadu Na’in-158

Oras ne’e daudaun Lei Orgánika MI nian iha ona Konsellu Ministru no sei halo diskusaun iha ohin duni bainhira hetan ona aprovasaun maka foin bele halo revizaun bá estatutu ho diploma legál sira seluk.

“Ha’u haruka tiha ona diploma bá Komandu Jerál atu reativa sira ninia saláriu,” Ministru Francisco Guterres hateten.

Iha ámbitu serimónia posse bá membru IX Governu Konstitusionál iha Sabádu (01/07/2023), Primeiru Ministru (PM), José Alexandre Kay Rala Xanana Gusmão, hateten iha diskursu katak, sei haree fila-fali prossesu illegál bá apozentasaun forsada hasoru membru PNTL Na’in-158.

“Haree fali lalais prosesu ilegál bá apozentasaun forsada, ne’ebé afeta ajentes PNTL barak tebes,” PM Xanana hateten.

Orgánika Ministériu nian

Kona-bá Orgánika Ministériu nian ne’e iha instituisaun hirak ne’ebé mak sei tutela hanesan instituisaun seguransa PNTL, Sekretária Estadu bá Protesaun Sílvil (SEPS), Autoridade Protesaun Sívil (APC-Sigla Português), Servisu Migrasaun (SM) ho tán diresaun Prevensaun bá Konflitus, Seguransa Sívil. Tanba ne’e, laiha nesesidade atu kria foun tán.

“Ha’u haree, laiha nesesidades barak, atu harii foun. Maibé, ita hadi’a di’ak liután funsaun sira ne’ebé eziste atu servisu di’ak liután. Instituisaun sira ne’e mai kleur ona, no  importante maka iha Lei Orgánika, define klaru liután sira-nian papél no fó tán servisu barak tán bá sira hodi halo servisu di’ak liután no fó mós kompeténsia balun atu sira bele dezempeña funsaun di’ak liután,” Ministru Interior, Francisco Guterres esplika.

Lee Mós: IX Governu Sei Dignifika Membru PNTL Reformadu 158

Jornalista: Rogério Pereira Cárceres