Hatutan.com, (01 Novembru 2021), Díli—Estadu Timor-Leste liuhosi Prezidente Repúblika (PR), Francisco Guterres “Lú Olo”, kondekora Colar Órdem Timor-Leste, títulu póstumu ba Bispu Dom Basílio do Nascimento.

Notísia iha Relasaun : Igreja Katedrál Baucau, Fatin Deskansa Ikus Dom Basílio Nian

Kondekorasaun ne’e Estadu fó tanba rekoñese Dom Basílio ninia kontribuisaun iha luta libertasaun nasionál no lidera Igreja iha tempu okupasaun Indonézia no hafoin independénsia to’o ohin loron husik-iis.

Kondekorasaun  ho Colar Ordem Timor-Leste, títulu póstumu ba Dom Basílio do Nascimento nu’udár rekoñesimentu hosi Estadu ba ninia serbisu nunka kolen ba afirmasaun identidade Timoroan liuhosi hasa’e valores no prinsípiu moris Katóliku iha Timor-Leste.

Estadu rekoñese kontribuisaun Dom Basílio nian iha luta ba auto-determinasaun Povu Timor-Leste tanba  Saudozu ne’e kontribui ba luta libertasaun nasionál liuhosi enkontru sekreta ho lider Frente Armada.

Dom Basílio do Nascimento lidera Igreja iha tempu okupasaun Indonézia nian la’ós buat fasil ho konflitu oioin entre Katóliku sira.  Nune’e mós la fasil atu lidera Igreja iha períodu hanesan ohin loron, ne’ebé nakonu ho dezafiu modernidade.

“Kondekorasaun ne’e nu’udár símbolu ne’ebé hatudu sentimentu agradesimentu hosi Estadu ba espíritu no esforsu ne’ebé labele nega manifesta durante tempu luta no prosesu konstrusaun Estadu hafoin Timor-Leste hetan ninia independénsia.” Sita komunikadu ne’ebé fó-sai hosi Palásiu Prezidensiál Nicolau Lobato, Díli, Segunda (01/11/2021).

Dekretu-Lei númeru 20/2009, 6 Maiu, mak kria Ordem de Timor-Leste, atu hatudu rekoñesimentu Timor-Leste nian ba sidadaun nasionál no estranjeiru,  iha sira-nia serbisu kontribuisaun ba benefísiu Timor-Leste, Timoroan ka umanidade.

Igreja Katóliku sempre asume ho dignidade sofrimentu Povu tomak ninian, hamriik iha Povu nia sorin defende direitu báziku sira.

Konstituisaun rekoñese papél Igreja nian iha luta libertasaun nasionál no hafoin restaurasaun independénsia.

Estadu Timor-Leste rekoñese no valoriza indivíduu no instituisaun sira, iha rai-laran no tasi-balun, inklui membru kleru tanba sira-nia kontribuisaun ba luta libertasaun Povu no iha prosesu dezenvolvimentu.

Dom Basílio do Nascimento iis-kotu, iha loron 30 fulan-Outubru 2021, iha  Ospitál Nasionál Guido Valadares (HNGV) ho moras kardíaku, hafoin hetan atakasaun iha Covalima.

Jornalista: Cipriano Colo