Hatutan.com, (27 Janeiru 2024), Paris- Prezidente Repúblika (PR), José Ramos-Horta, husu Prezidente Asembleia Nasionál Repúblika Fransa (PANRF), Yaël Braun-Pivet, kontinua  apoiu bá kooperasaun bilaterál Timor-Leste ho Fransa  no halais prosesu instalasaun embaixada Fransa iha Timor-Leste.

Lee Mós: Ramos-Horta ho Emanuel Macron Kompromete Kombate Pobreza no Sub Nutrisaun Infantíl

Prezidente Repúblika Timor-Leste, José Ramos-Horta halo enkontru ho Prezidente Asembleia Nasionál Repúblika Fransa, Yaël Braun-Pivet, iha Asembleia Nasionál Paris, Kinta (25/01/2024). Foto/Vito Salvadór

Prezidente Repúblika José Ramos-Horta hato’o kestaun ne’e bainhira halo sorumutuk ho Prezidente Asembleia Nasionál Repúblika Fransa,  Yaël Braun-Pivet, iha Asembleia Nasionál iha Paris, Fransa, Kinta (25/01/2024).

Jornalista Hatutan.com, Vito Salvadór ne’ebé akompaña vizita Xefe Estadu Timor-Leste hosi Paris-Fransa, informa, durante sorumutuk Xefe Estadu Timor-Leste halo sumáriu badak hodi husu bá Prezidente Asembleia Nasionál atu apoia inisiativa atu loke Embaixada Repúblika Fransa iha Dili, Timor-Leste.

 Xefe Estadu mós halo aprezentasaun badak kona-bá Timor-Leste nia istória durante postu independénsia, liuliu kona-bá prosesu rekonsiliasaun interna no esterna, nune’e mós kona-bá situasaun polítika, ekonómika no sosiál Timor-Leste nian.

Ramos-Horta ko’alia mos ho Prezidente Asembleia Nasionál Repúblika Fransa kona-bá adezaun Timor-Leste nian ba iha Organizasaun Mundiál Komérsiu (OMK), ne’ebé prevista atu ofisializa iha loron 26 fulan-Fevereiru 2024, no adezaun Timor-Leste nian ba organizasaun rejionál ASEAN ne’ebé sei hala’o iha tinan 2025.

Lider na’in-rua kontinua hakle’an diskusaun kona-áa tópiku sira ne’ebé iha interese bá malu, liuliu iha ámbitu implementasaun Planu Estratéjiku Fransa nian bá Rejiaun Indo-Pasífiku, no impaktu hosi konflitu sira iha mundu tomak, sai aat liután no lori dezafiu sira bá kombate kiak, má-nutrisaun no inseguransa ai-han.

Iha okaziaun Xefe Estadu Ramos-Horta ko’alia kona-bá oportunidade investimentu iha Timor-Leste iha ámbitu dezenvolvimentu infraestrutura liuliu otél no sentru konvensaun ho seluk-seluk tan.

Xefe Estadu repete fila fali aprezentasaun sira kona-bá kampu gás naturál Greater Sunrise, liu-liu konstrusaun kadoras gás no indústria ida Asosiadu petrokímika sira, entre sira seluk, no konvida emprezáriu no investidór sira iha rai-Fransa (Sofitel, seluk tan), tuir ezemplu hosi parseria públiku no privadu sira ne’ebé estabelese ona ho kompañia sira iha rai-Fransa hanesan Grupu Bollore iha Portu Tibar no Alcatel, iha instalasaun rede optika kabe submariña ne’ebé sei liga Timor-Leste bá Austrália.

Prezidente Asembleia Nasionál Repúblika Fransa, Yael Braun-Pivet, iha nia pájina ofisiál iha Instagram, hakerek: “Ha’u hetan onra hodi simu ohin Prezidente Timor-Leste, José Ramos-Horta, pesoa ida ho konviksaun luta bá dame, defende valór demokrasia, estadu direitu no igualdade ne’ebé hanesan. Ita-nia Kooperasaun tenke hametin liután.” ***