Hatutan.com, (10 Dezembru 2021), Díli—Prezidente Repúblika (PR), Francisco Guterres Lú Olo, iha ninia mensajen gravadu ba Loron Internasionál Hasoru Korrupsaun, 09 Dezembru, husu hotu-hotu hamutuk hateten la’e ba korrupsaun.

Prezidente Repúblika, Francisco Guterres Lú Olo. Foto/Média PR.

“Bainhira la muda mentalidade, bainhira ita la luta hasoru korrupsaun, dezenvolvimentu sei la la’o. Korrupsaun mosu ho nonook iha sosiedade nia leet. Korrupsaun sei halo moralidade sai dodok, hafraku instituisaun sira, harahun demokrasia, hamate justisa no ikusmai halakon moris-di’ak no pás sosiál. Ita abitua ho dezafiu, no ha’u fiar katak, hamutuk ita hateten la’e ba korrupsaun,” Prezidente Repúblika iha ninia mensajen gravadu, ne’ebé Hatutan.com asesu iha Palásiu Prezidensiál Nicolau Lobato, Díli, (10/12/2021).

Notísia iha Relasaun:PNTL ho CAC Iha Ona “Konsensu” Operasaun Konjunta Kombate Korrupsaun

Prezidente Repúblika haree korrupsaun nu’udár fenómenu ida ne’ebé akontese iha mundu tomak no sai hanesan moras aat ida ne’ebé harahun sosiedade no hamonu Estadu, hodi halo prejuízu boot la’ós de’it iha aspetu finanseiru, maibé liuliu hosi aspetu morál.

Haree ba kompleksidade korrupsaun nu’udár asuntu kompleksu tebes tanba mosu iha forma oioin ne’ebé la fásil atu luta hasoru, tanba ne’e presiza esforsu hosi ema hotu-hotu nian atu kombate korrupsaun.

Prezidente Repúblika halo analojia katak, korrupsaun hanesan moras todan ida ne’ebé kona no bele da’et ema hotu-hotu.

Luta hasoru korrupsaun labele husik ba loron seluk. Husik ba loron aban, moras aat ne’e sei da’et no buras ba beibeik. Hanesan ho moras bainbain.

“Ita ida-idak iha direitu no devér atu hateten La’e ba Korrupsaun,” Xefe Estadu hameno ba ema hotu.

Prevensaun no kombate hasoru korrupsaun só hetan susesu, bainhira sosiedade tomak, organizasaun públiku no privada, média no sidadaun hotu-hotu halo esforsu nafatin no tuba rai metin iha luta hasoru korrupsaun.

Liuhosi Parlamentu Nasionál (PN), Timor-Leste (TL) asina no ratifika ona Konvensaun Nasaun Unidas hasoru korrupsaun.

Estadu Timor-Leste rasik iha Kódigu Penál no Lei númeru 7/2020, nu’udár medida prevensaun no kombate korrupsaun no sai instrumentu legál ne’ebé uza iha luta kontra korrupsaun.

Rekursu ne’ebé Timor-Leste iha barak tebes. Tanba ne’e, tenke uza rekursu ne’e hodi benefisia Povu tomak.

Ukun-na’in sira halo polítika hodi serbi ba interese Povu, hahalok no lala’ok tenke defende ema ki’ak no kbiit la’ek sira.

Prezidente Repúblika fó énfaze ba seguransa jurídika. Seguransa jurídika sei loke dalan ba investimentu hodi kria empregu.

Maibé, bainhira laiha seguransa jurídika investidór sira sei la mai kuda nia osan iha Timor-Leste. Prezidente Repúblika hateten bainhira iha korrupsaun signifika laiha seguransa.

Timor-Leste nia índise Persepsaun Korrupsaun tama iha pozisaun ladún di’ak ne’ebé prejudika tebes dezenvolviementu nasionál.

“Korrupsaun harahun dezenvolvimentu, fó prejuízu ba ita-nia Povu no ita-nia Estadu,” Prezidente Repúblika hateten.

Tanba ne’e, atu kombate korrupsaun tenke serbisu hamutuk no iha hanoin ida de’it katak, kombate ida ne’e permanente.

Jornalista: Rogério Cárceres