Hatutan.com, (16 Fevereiru 2022), Dili—Komandu Polísia Nasionál Timor-Leste (PNTL), hahú halo preparasaun atu asegura kampaña to’o eleisaun Prezidensiál iha 19 Marsu tinan ne’e.

Superintendente Xefe Polísia, José Soares. Foto/Hatutan.com.

Iha preparasaun ne’e, komandu PNTL planeia ona hodi aluga karreta unidade 32, atu bele distribui ba komandu munisípiu sira, tanba karreta barak mak oras ne’e kondisaun aat ona.

Notisia iha Relasaun:Rezultadu Sorteiu Kandidatu Prezidente Repúblika 2022 to’o 2027

Komandante Administrasaun Jerál PNTL, Superindente Xefe Polísia, José Soares hateten, preparativu sira ne’ebé halo, tuir Orsamentu Jerál Estadu (OJE) 2022 nian, ne’ebé hetan apoiu másimu hosi Governu.

Iha 2022, komandu PNTL planeia mós sei sosa duni viatura operasionál ba PNTL, ho unidade hamutuk 90 atu halo preparasaun seguransa ba eleisaun nian. Maibé, infelizmente, karreta sira ne’e seidauk bele to’o, tanba tuir prosesu tenderizasaun nian, tenke prienxe kritéria.

“Iha alternativu seluk, maka ita koloka ona orsamentu ba iha aluga karreta 32. Ne’e orsamentu ne’ebé mak koloka iha orsamentu PNTL ninian,” Superindente Xefe Polísia, José Soares, hateten ba jornalista sira hafoin sorumutuk entre estrutura komandu PNTL no komandante Unidade no munisipiu sira iha Timor Plaza, Dili, Kuarta (16/02/2022).

Prosesu preparasaun sira kona-bá aluga karreta 32 ne’e, parte komandu PNTL rasik, enkamiña ona ba gabinete Vise Ministru Interiór (MI), António Armindo, nune’e parte aprovizionamentu, bele halo kontratu ho kompañia sira.

Alende ne’e, komandu PNTL mós hetan tán apoiu karreta hosi Ministériu Finansas (MF), liuhosi Diresaun Patrimóniu Estadu nian, hamutuk unidade 36.

“68 unidades viaturas mak sei apoiu ba iha komandu distritál sira, munisipiu ida sei hetan karreta aluga tolu,” Superindente Xefe Polisia, José Soares, informa tán.

Kona-bá kombustível, PNTL mós hetan resforsa orsamentu hamutuk $1.000, hosi governu, hodi sosa tán kombustível.

Kona-bá karreta hamutuk unidade 90 ne’ebé komandu PNTL planeia atu sosa, no oras ne’e iha ona prosesu tenderizasaun nia laran, tuir planu, bainhira to’o iha TL, sei distribui hotu ba iha eskuadra tuan no foun sira hotu iha territóriu nasionál.

“Maibé, tanba ita tenke tuir rekezitus aprovizionamentu ninian, entaun ita labele hetan viatura sira ne’e sedu, parese iha maiu ou juñu ba leten. Ida ne’e mak kona-bá vaituras ninian,” Komandante José Soares, hateten tán.

Sosa Ekipamentu Kontrolu Órden Públika

Komandu PNTL iha mós ekipamentu sira seluk, atu kontrola órden públika nian mak hanesan, kompra gásgan, oinsá mak membru sira uza hodi bele atua situasaun iha terrenu, bainhira mosu disturbasaun ruma.

Iha tinan kotuk, komandu PNTL, apoia ona fardamentu ka uniforme terrenu ninian ka PDL ba membru sira, fahe ona mós kapa udan nian ba kada individu hetan ida.

Komandu sei distribui mós lampada (lampra) ba membru sira, atu fasilita halo servisu iha loron eleisaun ninian.

Iha periudu kampaña eleitórál, hosi parte lojistika PNTL nian, sei fornese ai-hán ba membru sira hodi asegura di’ak liután seguransa ba kandidatu sira nia kampaña bele la’o ho di’ak.

“Nune’e mós ita sei fornese ransu de kombate ba sira, individu ida-idak, ne’e to’o iha loron eleisaun ne’e mak foin fahe atu nune’e bainhira sira halo seguransa ba iha sentru de votasaun, sira labele preukupa fali ho sira nia kabun, maibé hahan prontidaun,” Komandante José Soares, hateten.

Apoiu Ekipamentu Báziku

Iha 2021, komandu PNTL mós sosa ona ekipamentu báziku ba seguransa nian mak hanesan, alzema (borgol), Stik, hodi distribui no fasilita membru sira hodi garante seguransa iha kampaña eleitóral to’o iha loron eleisaun.

“Ita sosa, la ba individu, maibé ne’e inventáriu. Agora, komandante sira asegura iha sira nia komandu para bainhira halo servisu iha terrenu, bele utiliza, tuir regras ne’ebé mak estabelese, tenke proporsionál, tenke legál, depois nesesáriu duni, no nia rasik mós hatene katak ida ne’e, rekursu hotu ne’ebé mak nia iha ne’e, tuir nia etapa, ikus mak nia foin ba rekursu ida ikus liu ninian,” komadante José Soares, fó hanoin.

Jornalista: Rogério Pereira Cárceres