Hatutan.com, (17 Marsu 2022), Díli—Polísia Nasionál Timor-Leste (PNTL), Komandu Munisípiu Díli, liuhosi Eskuadra Na’in-Feto, iha Kuarta 16 Marsu 2022, detein ona autór na’in-rua ne’ebé deskonfia halo distúrbiu iha sede Partidu Congresso Nacional de Reconstrução Timorense (CNRT), iha Bairro dos Grilhos, Díli.

Komandante PNTL Munisípiu Díli, Superintendente Xefe Polísia, Henrique da Costa. Foto/Hatutan.com.

“Loos duni, iha sidadaun na’in-rua ne’ebé maka ita-nia patrulla sira foti, no agora daudaun prosesa iha eskuadra Na’in-Feto. Agora sei iha hela prosesu no depois ita bele hetan informasaun klara hosi investigasaun. Ita detein oras 72 hodi halo prosesu, tanba ida ne’e flagante delito,” Komandante PNTL Munisípiu Díli, Superintendente Xefe Polísia, Henrique da Costa hateten ba jornalista sira, hafoin serimónia formatura jerál iha Kuartel Jerál PNTL, Caicoli, Díli, Kinta (17/03/2022).

Notisia iha Relasaun:Kampaña loron-tolu ikus iha Dili, PNTL Halo Apreensaun ba Motór 300

Bainhira kompleta detensaun durante oras 72 iha sela Eskuadra Na’in-Feto, PNTL sei komunika ho parte Prokuradór Jerál Repúblika (PJR), nune’e bele hetan orientasaun atu haree nia prosesu kontinuasaun.

“Ema na’in-rua, maibé ha’u seidauk hetan ninia inisiál kompletu no mós motorizada rua. Entaun, evidénsia mós agora iha hela eskuadra Na’in-Feto nune’e kontinua prosesu,” Henrique da Costa, hateten.

Hosi kazu insidente iha sede partidu CNRT nian ne’e, rezulta militante ida mak sai vitima, tanba hetan kanek iha parte ulun-fatuk, iha ne’ebé tuda ho fatuk hosi militante FRETILIN nian nain-rua, hatais hela ho kamizola hosi kandidatua PR, Francisco Guterres “Lú Olo” nian iha Estrada ibun besik sede CNRT, bairro dos Grilhos, Dili.

Ejize Investigasaun

Iha sorin seluk, ekipa portavós hosi kandidatu Prezidente Repúblika, José Manuel Ramos Horta, Dionísio Babo Soares ejize ba Komandu PNTL atu halo investigasaun kle’an ba kazu ne’e, tanba deskonfia iha ema balun ne’ebé orienta ema seluk, konsumu ai-moruk pil (anjing gila) hodi halo provokasaun hasoru militante CNRT.

Dionísio Babo konsidera aktu provokasaun ida-ne’e, bele hamosu perturbasaun ba órden públiku no alastra mós konsekuénsia seluk ne’ebé labele espera.

“Ami mós nota katak iha alegasaun ema balun uza medida ne’ebé presiza investigasaun kle’an, tanba alegasaun sira ne’e mai hosi kraik ne’ebé hateten katak, iha uzu de pil, ne’ebé hanesan fali uluk akontese iha 1999,” Dionísio Babo Soares hateten ba jornalista sira, liuhosi konferénsia imprénsa iha Sede Nasionál Kandidatu PR, José Ramos Horta, Hudi-laran, Díli.

Tanba ne’e, parte CNRT lamenta tebetebes no alegasaun sira ne’e sériu ne’ebé tenke halo investigasaun kle’an.

Iha Kuarta 16 Marsu, hafoin kampaña enseramentu hosi kandidatu Prezidente Repúblika ho númeru sorteiu 6, Francisco Guterres Lú Olo, iha Tasi-tolu iha tuku 18:00 liu oras lorokraik, iha apoiante balun ho motór halao kovoi utiliza faru kandidatu Lú Olo nian, liu hosi Bairro dos Grilhos  hodi halo distúrbiu iha Sede Partidu CNRT nian.

Jornalista: Rogério Pereira Cárceres