Hatutan.com, (21 Abríl 2022), Díli—Maski rezultadu ofisiál hosi Tribunál Rekursu (TR), seidauk anúnsia kona-bá prezidente repúblika eleitu, maibé Primeiru Ministru (PM) Taur Matan Ruak, informa ona ba Xefe Estadu atuál Francisco Guterres Lú Olo kona-bá preprasaun sira governu nian, ba serimónia posse José Manuel Ramos Horta ba períudu 2022-2027.

Primeiru Ministru (PM) Taur Matan Ruak hasorumalu ho Xefe Estadu atuál Francisco Guterres Lú Olo iha Kinta (21/04/2022). Foto/Média PR.

“Ohin, enkontru semanál ho Prezidente Repúblika hodi haree ba preparativu tomada de posse, Prezidente eleitu. Preparasaun la’o hela, Ministériu Administrasaun Estatál mak halo iha Tasi-tolu. Ita espera katak, preparativu sei la’o di’ak to’o loron ne’ebé tomada de posse akontese no governu halo esforsu hotu, atu ida ne’e akontese,” Taur Matan Ruak hateten ba jornalista sira hafoin enkontru semanál ho PR Lú Olo, iha Palásiu Prezidente, Ai-tarak Laran, Kinta (21/04/2022).

Lee mós: José Ramos Horta Eleitu ba Prezidente Repúblika Períudu 2022-2027

Hatán kona-bá deklarasaun polítika durante iha palku kampaña polítika eleisaun prezidensiál segunda volta, Taur Matan Ruak afirma, kampaña hotu ona no agora ba oin hanesan ema estadista ida presiza ko’alia ba malu kona-bá Estadu.

“Agora ne’e ita ko’alia hanesan Estadu, estadista. Tanba ne’e preparativus enkuantu laiha alterasoins. Preparativus ne’e baibain cinco a cinco anos Prezidente eleitu sira, eleitu ona, governu sempre halo preparativus ba tomada de posse,” Taur Matan Ruak hateten.

Durante sorumutu ho Xefe Estadu Lú Olo, Taur mós informa kona-bá situasaun seguransa iha rai-laran durante eleisaun segunda volta, la’o ho hakmatek.

Jornalista: Rogério Pereira Cárceres