Hatutan.com, (01 Juñu 2022), Díli—Ministru Transporte no Komunikasaun (MTK), José Agostinho da Silva, planeia ona atu harii “Halte” ka parajen ba transporte públiku hamutuk 60 iha iha sidade Díli.

MTK haree katak durante ne’e transporte públiku liu-liu mikrolete sira, bainhira transporta pasajeiru la estasiona tuir regra hodi hamosu enggarafeamentu ne’ebé prezudika ema barak.

Lee Mós: Governu Hahú Diskute Atu Harii Estaleiru Nasionál

“Ministériu iha planu oinsá mak ita bele estabelese buat ida halte bus ne’e atu transporte públiku sira ne’e hatun no hasa’e pasajeiru iha ne’ebá. Kuandu ida-ne’e laiha, ita regula la hetan. Depende ba pasajeiru nia tuku besi ka nia dehan para, para ona. Mais ida-ne’e, ministériu iha planu, estabelese 60 halte bus iha Dili laran,” José Agostinho da Silva hateten ba Hatutan.com, hafoin partisipa sorumutu Konsellu Ministru ordináriu iha MF, Ai-tarak Laran, Díli, Kuarta (01/06/2022).

Agora daudaun parte ministériu seidauk bele regulariza transporte públiku iha Díli, tanba seidauk iha Halte Bus.

MTK sei koordena mós ho Ministériu do Planu e Ordenamentu do Territóriu (MPOT), liuhosi ministru José Reis atu bele haree kona-bá ninia área sira montajen nian iha fatin ne’ebé, nune’e Timor-Leste nia imajen sidade Dili bele sai di’ak.

Oráriu ba Kontentór Sira

Iha tempu sira ikus-ikus ne’e, mosu preokupasaun públiku kona-bá situasaun engarafeamentu iha sidade Dili ne’ebé kauza hosi kareta kontentór sira, tanba halo operasaun la tuir oráriu.

Antes ne’e, iha ona despaixu konjunta ida ne’ebé mak prosesu sira ba regularizasaun nian, implementa hosi Komandu Polísia Nasionál Timor-Leste (PNTL), liuhosi Unidade Polísia Tránzitu (Poltrans), hamutuk ho Diresaun Nasionál Transporte Terrestre (DNTT), oinsá mak koordena, regulariza kontentór sira ninia movimentu, nune’e labele afeta ba engarafeamentu.

“Ministériu mós iha planu oinsá implementa oráriu ne’e, ezemplu loron labele sirkula, sira bele sirkula iha kalan, to’o dadeer. Maibé ne’e, oras ida, ita haree fali emenda diploma ministeriál ne’ebé mak durante ne’e vigóra,” José Agostinho hateten.

Jornalista: Rogério Pereira Cárceres