Hatutan.com, (09 Juñu 2022), Díli—Ministériu Administrasaun Estatál (MAE), sei hala’o prosesu resensiamentu eleitorál no halo atualizasaun baze dadus ba populasaun iha Postu Administrativu Atáuro, ho Hatulia B Ermera, Loré-Lautém nune’e bele hetan fali kartaun eleitorál foun iha fulan-jullu 2022.

Vise Ministru ba Administrasaun Estatál (MAE), Lino de Jesus Torrezão. Foto/Média MAE.

Populasaun sira sei hetan fila-fali kartaun eleitorál ne’ebé foun, tanba governu aprova ona estatutu Postu Administrativu Ataúro nakfilak ba munisipiu no Hatualia B ho Loré, transforma ba postu administrativu foun.

Lee Mós:Domingos Soares Simu Posse Nu’udár Administradór Munisípiu Ataúro

“Resensiamentu eleitorál, sei hahú iha fulan-jullu tanba munisipiu foun, ho mós iha postu administrativu foun rua ne’e, hosi Munisipiu Lautem ida, Loré, depois hosi Ermera, Hatualia B. Atu halo resensiamentu eleitorál ba baze de dadus ba eleisaun 2023 nian,” Vise Ministru ba Administrasaun Estatál (MAE), Lino de Jesus Torrezão, hateten iha Salaun Laline Larigutu, CNE, Caicoli, Dili, Kinta (09/06/2022).

Maski nune’e, sentru atendimentu ba prosesu sira resensiamentu eleitorál ho atualizasaun baze dadus ne’e sei hala’o de’it iha administrasaun postu administrativu sira.

Hatán kona-bá oinsá tratamentu governu nian ba sidadaun sira ne’ebé ho kondisaun defisénsia ne’e atu bele bá asesu, Lino Torrezão dehan governu sei buka solusaun, hodi kria kondisaun ida ne’ebé mak di’ak atu bele foti iha sira nia fatin, hodi bele ba halo resensiamentu eleitorál.

Defisiente sira ne’ebé antes ne’e iha ona kartaun eleitorál, ekipa téknika sira sei ba halo de’it atualizasaun baze dadus. Maibé, ba sira ne’ebé mak foun, governu bele buka meius hodi suporta sira.

“Sira seluk ne’e atualizasaun de’it ba baze de dadus. Agora, resensiamentu ne’e buat ida, atualizasaun ne’e buat ida. Atualizasaun ne’e ba ema ne’ebé mak sira nia kartaun lakon tiha ona no sira ne’ebé mak muda hela fatin. Resensiamentu, ba sira ne’ebé mak eleitóres foun, atinje ona tinan 17, konforme konstituisaun RDTL hateten,” Lino Torrezão esplika.

Totál populasaun iha Munisipiu Ataúro, hamutuk 11.000. Postu Administrativu Hatulia B, 8.000-resin, no Postu Administrativu Loré iha 6.000. Sira ne’e, iha kritériu mínimu atu prienxe ba eskalaun segundu nian. Tuir planu, iha Sábadu 11 juñu 2022 ofisialmente governu sei lansa Ataúro ba munisipiu, no Hatulia B ho Loré, sai postu administrativu foun.    

Jornalista: Rogério Pereira Cárceres