Hatutan.com, (05 Jullu 2022), Díli—Organizasaun Educating The Future sei tulun Governu liu hosi servisu hamutuk ho Ministeriu Edukasaun Juventude no Desportu (MEJD) hodi halo konstrusaun no rehabilitasaun ba edifisiu Pré-eskolár 350 iha Timor-Leste (TL) ho objetivu atu mellora di’ak liu tán kualidade edukasaun pré-eskolár.

Jestór hosi organizasaun Educating The Future hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato, Bairru-Pité, Tersa (05/07/2022).

Tanba ne’e, Jestór hosi organizasaun ne’e, hasoru-malu ona ho Prezidente Repúblika, José Ramos-Horta hodi aprezenta mós kona-bá sira nai ezisténsia iha TL liuliu apoiu ne’ebé sira oferese ba dezenvolvimentu Edukasaun TL nian.

“Ami iha-ne’e foku liu servisu hamutuk ho MEJD no mós autoridade munisipál sira hodi identifika fatin no atu hadi’a edifísiu pré-eskolár ne’ebé presiza tebes atu reahabilita. Tuir estimasaun, ami sei halo kada pré-eskolár ho sala de aula rua ba estudante no sala ida ba professór sira,” Fundadór Organizasaun Educating the Future, Adam Hegedus hateten, hafoin hasoru-malu ho Prezidente Republika iha Palásiu Prezidensiál Nicolau Lobato, Bairru-Pité, Tersa (05/07/2022).

Proframa espesifiku iha Timor Leste maka servisu hamutuk ho MEJD hodi halo pré-eskolár tanba ne’e importante mós ba labarik sira iha Timor Leste.

Educating the Future oras-ne’e halo hela servisu konstrusaun foun ba edifisiu pré-eskolár lima iha munisípiu Aileu, Baukau, Ermera, no Likisá.

Educating the Future sei ba halo identifikasaun no sosializasaun iha kada munisípiu hodi halo selesaun ba pré-eskolár sira ne’ebé presiza urjente atu halo rehabilitasaun no harii edifísiu foun.

Tuir planu iha tinan oin, Educating the Future sei halo edifisiu foun hamutuk 20, kona-bá orsamentu sei enkontru ho parseiru sira iha Austrália, inklui Governu Austrália rasik kona-bá orsamentu ne’ebé presiza.

“Ami nia vizaun misaun maka empodera edukasaun pré-eskolár iha TL liu-liu ba labarik sira hodi konstrui edifisiu ba pre-eskolar ne’e rasik tanba haree ba labarik sira pursentu 60 iha Timor laran ladún asesu ba pré-eskolár. Ho razaun ida ne’e mak ami fokus ba edukasaun pre-eskolar nune’e bele ajuda labarik sira asesu,” nia subliña.

Educating the Future enkoraza estudante sira kona-bá importánsia hosi pré-eskolár tanba edukasaun pre-eskolar hanesan edukasaun ida ne’ebé bázika oinsá atu forma labarik sira nia karatér no mentalidde tanba ida ne’e nu’udár parte ida esensiál liu ba dezenvolvimentu integradu labarik sira nian.

Agora daudaun Educating the Future finaliza ona konstrusaun pré-eskolár ida iha aldeia Fahi Ten Suku Tibar, Postu Bazartete, Munisípiu Likisa, ho kustu orsamentu tuir estimasaun kuaze rihun $45 to’o rihun $50.

Ida ne’e inklui ona eletrisidade, bee moos, saneamentu no fasilidade ba manorin na’in-sira, estudante no fasilidade adisionál seluk ba Jardin Infantil nian.

Serimónia inaugurasaun ba edifisiu pré-eskolár Fahi ten monu iha loron 12 fulan ne’e, maibé  Xefe Estadu José Ramos Horta la disponível atu partisipa tanba iha servisu seluk ne’ebé sei halo maibé promete atu haruka nia reprezentante ba iha serimónia inaugurasaun ne’e.

Jornslista: Vito Salvadór