Hatutan.com, (19 Jullu 2022), Díli—Diresaun Nasionál Transporte Terestre (DNTT) hahú iha Segunda loron 18 fulan ne’e, halo distribuisaun voucher subsídiu kombustível ba transporte públiku hamutuk 1.129 ne’ebé antes ne’e hetan lisensa hosi Diresaun ne’e.

Diretór Nasionál DNTT, António da Costa. Foto/Hatutan.com.

Mekanizmu atribuisaun ne’e, primeiru DNTT rekolla dadus transporte públiku iha Timor laran tomak, segundu atribui voucher ne’e ba sira hodi ba enxe mina iha sentru kombustível sira.

Lee Mós: Benefisiáriu Sei Lori Voucher Enxe Kombustível Subsídiu iha Postu Abastesimentu 59

“Voucher ne’ebé Governu prepara iha $10, to’o $50, maibé tuir orientasaun hosi Diretór Jerál katak kada karreta loron ida Governu fó subsídiu kombustível litru 5 no ida ne’e la’ós osan. Nune’e, fulan ida kada karreta hetan subsídiu kombustível hamutuk litru 150. Tuir loloos aplika komesa fulan Maiu to’o Jullu, maibé agora tama ona fulan Jullu nune’e daudaun ne’e iha faze dahuluk nian, tanba sei iha faze daruak no datoluk,” Diretór Nasionál DNTT, António da Costa hateten ba Hatutan.com iha knaar fatin DNTT, Balide, Tersa (19/07/2022).

Motorista sira simu voucher subsidiu kombustível hosi Governu, Tersa (19/07/2022). Foto/Hatutan.com.

Atu asesu ba subsídiu ne’e ho kritéria maka lisensa tarjetu (ijin trek) tenki válidu, fotokopia na’in nia kartaun eleitorál inklui motorista no karta kondusaun ne’ebé válidu, karta inspesaun no STNK ho nune’e dokumentu hirak ne’e tau hamutuk lori ba hatama iha DNTT hodi simu fali voucher.

Atribuisaun voucher ne’e, seidauk bele realiza iha Munisipiu tolu hanesan Lospalos, Covalima, Maliana tanba kompañia fornesedór kombustível seidauk asina kontratu, nune’e presiza hadi’a no kompleta dokumentu, maibé ba hirak ne’ebé simu ona voucher mak bele ba ense mina iha sentru kombustível.

Sentru kombustível ne’ebé asina ona kontratu ho Governu hodi fornese kombustível mak hanesan Aidalan furak Unipesoal iha Manufahi, Belak Fuels, Gas Corperation, Sezoria Unipesoal, Mega Petroliu, Mekar Fuels no Miglen Unipesoal no Borala sei iha fallansu tékniku ne’ebé presiza hadi’a.

Jornalista: Carmelita Isaac