Hatutan.com, (24 Setembru 2021), Díli-Komandante FALINTIL, José António Gomes da Costa ho naran revolusionáriu Ma’huno Bulerek Karathayano, sesta (24/09/2021), putvolta tuku 17:30 Otl, husik hela ona mundu ne’e no husik família sira hotu.

Saudozu Komandante Ma’huno Bulerek Karathayano. Foto/Kontribuidór Eugénio Pereira

Saudozu Komandante  Ma’huno Bulerek Karathayano,  iis-kotu iha Ospitál Nasionál Guido Valadares (HNGV) hafoin halo tratamentu intensivu. 

Molok ne’e, Saudozu halo tratamentu iha Izolamentu Lahane tanba infetadu moras nakda’et COVID-19,  maske nune’e, iha teste ikus, hatudu rezultadu Saudozu negativu ona hosi COVID-19 no transfere fali ba HNGV hodi halo tratamentu  tanba moras seluk, maibé esforsu sira médiku no pesoál saúde sira la konsege salva  Saudozu hosi mistériu mate.

Purvolta tuku 18:20 Otl, família no amigu sira  transporta ona saudozu nia mate isin hosi HNGV mai nia rezidénsia iha Pantai Kelapa, Díli, hodi hein prosesu funerál tuir lisan no tuir Estadu nia orientasaun.

Saudozu Ma’huno Bulerek Karathayano, moris iha loron 14 Abríl 1949, nu’udar Komandante FALINTIL ne’ebé hamutuk ho komandante FALINTIL sira lubuk, inklui Komandante Em-Xefe FALINTIL, Kay Rala Xanana Gusmão, dedika sira-nia vida tomak ba luta ukun rasik iha dezde tinan 1975 to’o 1999.

Hafoin dezmobilizasaun FALINTIL iha tinan 2013 iha komemorasaun loron FALINTIL ba dala-36 (20 Agostu 1975-2013), Asuwa’in Ma’huno Bulerek Karathayano, envolve iha partidu Kongresu Rekonstrusaun Timorense (CNRT, sigla portugés) ne’ebé lidera hosi nia komandante Kay Rala Xanana Gusmão.  

Iha tinan 1987, Ma’Huno hentan nomeasaun  nu’udar Sekretáriu Komité Ezekutivu FRETILIN hafoin  Xanana Gusmão lori FALINTIL sai hosi FRETILIN hosi harii CNRM (Congreso Nacional Resistencia Maubere) iha tinan 1988.

CNRM ne’e nu’udar organizasaun rezisténsia Timor. Iha fulan-Maiu 1990, Ma’huno sai hanesan  Sekretáriu Jenerál FRETILIN no Xanana Gusmão hetan kapturasaun iha November 1992 hosi tropa no polisia Indonezia. Nune’e, Ma’huno asume responsabilidade hanesan Komandante FALINTIL to’o loron 05 Abríl 1993, Ma’huno mós hetan kapturasaun iha Díli. Nune’e, rota komandu FALINTIL asume fali hosi Komandante Nino Komis Santana.

Daurante fulan 18 iha bapak (militár Indonéziu)  nia mahan, Ma’huno  hetan torturasaun oioin no kastigu to’o nia hetan liberdade iha tinan 1995 tanba hetan amnistia. Iha tinan 2017, Ma’huno eleitu nu’udar Vise-Prezidente partidu  CNRT.

 Memória iha FALINTIL

• Sekretáriu Region III FALINTIL
• Xefe Estadu Maiór FALINTIL (1992–1993)

Memória iha Polítika

• Sekretáriu Jerál FRETILIN (1990–1992)
• Prezidente FRETILIN (1992–1993)
• Vise-Prezidente Partidu CNRT (2017–agora) (bit)