Hatutan.com, (25 Setembru 2021), Díli-Governu Timor-Leste halo esforsu hotu atu bele kria kondisaun infraestrutura báziku sira iha territóriu nasionál. Iha sidade Díli, Estadu investe hodi harii kondisaun infraestrutura  ne’ebé merese hanesan sidade kapitál nasaun nian.  Ironia liu, sei iha ema balun hatudu nia irresponsabilidade hodi la kontribui konserva no ajuda Estadu próteze fasilidade ne’ebé Estadu harii ona ho osan povu nian.

Karreta kontentór ida hakiduk to’o sama paving, trotoár iha área Lecidere, Díli. Foto/Hatutan.com

Akontese iha Sábadu (25/09/2021), iha área Lecidere nian,  purvolta tuku 11:00 Otl, karreta kontentór ida ho livremente halai sa’e to’o paving nia leten (trotoar) ne’ebé bele estraga hotu block paving ne’ebé Estadu harii ho osan povu nian.

Tuir observasaun Hatutan.com nian iha terrenu hatudu katak, karreta kontentór ida hakiduk iha estrada laran atu tama ba armazén Vinod Patel&Co.Ltd, área Lecidere, Postu Administrativu Nain Feto, Munisípiu Díli, maibé tanba estrada kloot, motorista obriga hakiduk hodi sa’e to’o trotoar-leten.

Akontesimentu dramátiku ne’e halo ema sira la’o ain hakfodak tanba haree karreta kontentór ne’e livre loos halai sa’e iha trotoar-leten hodi sama block paving ne’ebé Estadu selu ba empreza sira hada kabeer hodi fasilita abitante sira la’o ain.  

“Ne’e la bele akontese. Sé fatin ne’e laiha espasu  atu karreta kontentór hakiduk tama ka sai, di’ak liu buka fatin luan para hatún kontentór ka hasa’e kontentór. Beibeik hanesan ne’e block paving sira bele rahun no estraga trotoar,”  abitante ida hateten. (fya)