Hatutan.com (25 Setembru 2021), Díli—Prezidente Repúblika (PR), Francisco Guterres Lú Olo, hato’o profunda sentidu kondolénsia ba família asua’in, José António Gomes da Costa ‘Ma’huno Bulerek Karathayano. “Prezidente Repúblika hato’o profundas kondolénsias ba família enlutada, Teresinha Viegas ho nia oan sira, ba família tomak no mós família boot rezisténsia nian. Haku’ak boot ba família hotu!,” Mensajen Xefe Estadu, ne’ebé Hatutan.com asesu, iha sábadu ne’e.

Lú Olo espressa katak, horisehik, Timor-Leste lakon tan asua’in luta libertasaun nasionál espesiál ida. Espesiál tanba halo parte jerasaun fundadór movimentu ba Ukun rasik An dahuluk ho ámbitu nasionál.

Ho naran asua’in, Ma’Huno Bulerek Karathayano, tama iha istória luta libertasaun Patria, nu’udár Fundadór ASDT, membru Comite Central Fretilin, Chefe Conselho Político Militár Frente Armada, Secretário da Comissão Diretiva da Fretilin, Comandante das FALINTIL, Secretario Região 3, lider ida ne’ebé inspira no sai belun boot ba foin-sa’e klandestinu sira iha vila laran, iha Timor-Leste no iha Indonézia.

Iha periódu susar tebes, hafoin militár Indonézia kaer Comandante Superiór Luta, Kay Rala Xanana Gusmão, iha 1992, ema barak hanoin luta to’o ona nia rohan. Maibé, Ma‘Huno assume lideransa rezisténsia nian no funu kontinua.

Iha marsu 1993, forsa okupante kaer lider ne’e no hatama iha kadeia. Maibé la hamate ninia espíritu nasionalista.
Iha vila, Ma’Huno serbisu hamutuk ho Ma’Hodu kontinua mobiliza juventude sira iha luta hasoru okupasaun Indonézia.

Ma’Huno esforsa ba hametin rezisténsia iha zonas okupadas no nune’e kontribui ba luta klandestina sai mós frente prinsipál ida ba Timor-Leste nia independénsia.

“Ma’Huno nu’udár jerasaun fundadór husik ona ita. Triste tebes tanba ita lakon ita-nia lider boot ida. Maibé ita-hotu sei la haluha katak nia husik memória ba ita-nia Timor-Leste livre no independente. Ma’Huno nia obra sei hela rohan-laek bainhira valor no prinsípiu luta nian kontinua buras hamutuk ho ita, iha ita-nia moris loroloron ninian,” subliña.

Memória iha FALINTIL, ‘Ma’huno Bulerek Karathayano’ Sekretáriu Rejiaun III FALINTIL, Xefe Estadu Maiór FALINTIL (1992–1993).

Hanesan Vise-Prezidente Partidu CNRT hahú 2017 to’o hakotu-iis iha Sesta (24/09/21), hafoin sofre moras fuan iha Hospitál Nasionál Guido Valadares). (fya)