Hatutan.com, (13 Outubru 2021), Dili—Primeiru Ministru (PM) no Ministru Interiór (MI), Taur Matan Ruak, husu ba Estrutura Komandu Polísia Nasionál Timor Leste (PNTL), atu orienta membru sira hodi serbisu durante oras 24, no kuidadu didi’ak hodi labele abandona postu Tránzitu ne’ebé konstrui hosi Timoroan, Salvadór do Rego Martins ‘Mauhoka’ liuhosi kompañia Rudál.

Primeiru Ministru (PM) no Ministru Interiór (MI), Taur Matan Ruak hamutuk ho Vise Ministru Interiór António Armindo, no Komandante Jerál PNTL, Komisáriu Faustino da Costa hasai foto hamutuk hafoin inaugura postu Tránzitu neen (6) ne’ebé konstrui hosi Mauhoka, iha Bairru-Pité, Kuarta (13/10/21). Foto/Hatutan.com.

 “Ha’u husu ba Komandante, primeiru tenke okupa durante oras 24. Ha’u husu Vise Ministru Interiór atu tau-matan, lorloron mai iha ne’e, labele husik mamuk. Segundu, kuidadu didi’ak, tanba ida ne’e hanesan mós ita-nia uma, kuandu ita la hela, nia aat, na’ok-teen tama, no bele estraga hotu,” Taur Matan Ruak hateten ba jornalista-sira, hafoin inaugura postu Tránzitu neen (6) ne’ebé konstrui hosi Mauhoka, iha Bairru-Pité, Kuarta (13/10/2021).

Kona-bá ne’e, Komandante Jerál PNTL, Komisáriu Polísia, Faustino da Costa, hateten durante ne’e PNTL  hala’o kna’ar hanesan ramu ida hodi apoia seguransa rodoviária, liu-liu koloka membru-sira iha kada postu Tránzitu ne’ebé molok ne’e Governu liuhosi Sekretária Estadu Formasaun Profisionál Empregu (SEFOPE), konstroi ona no nunka abandona.

Nune’e mós ho postu Tránzitu ne’ebé emprezáriu Timoroan ‘Mauhoka’ oferese, sei kuidadu no utiliza ho di’ak atu bele tau matan ba kestaun rodoviária.

“Ita hotu akompaña, eventu ida ne’ebé simples, maibé ninia sentidu ba instituisaun PNTL boot tebes,” Komandante Faustino da Costa, hateten.

Nune’e mós ‘Mauhoka’ ne’ebé iha inisiativa ho osan rasik kontribui ba Governu hodi halo konstrusaun ba postu seguransa Tránzitu nian, hamutuk neen iha kapitál Dili, ‘lakohi’ temi ka pronúnsia ba públiku kona-bá valór orsamentu tanba nia konsidera ida-ne’e hanesan kontribuisaun kiik ba Estadu, nu’udár Timoroan.

“Ida-ne’e imi ba husu iha Komandante PNTL, sira mak hatene. Ha’u la hatene ida,” Salvadór do Rego Martins ‘Mauhoka’, rezeita atu fó-sai montante osan.

Mauhoka mós afirma katak, kontribuisaun ne’ebé nia halo, la’os buat ne’ebé boot, maibé hanesan sidadaun timoroan ida, iha dever atu ajuda Estadu no povu, liuhosi buat kiik-sira ne’ebé durante ne’e nia hetan.

Postu seguransa hamutuk neen iha Bairru-Pité rua (2), Terminál Bekora ida (1), Kolmera ida (1), Otél Timor nia oin iha ida (1) no ida iha Merkadu Lama.

Postu seguransa hirak-ne’e ho nia medida 5×5, kompleta ho sala ida, inklui haris fatin no mós varanda.

Antes ne’e Kompañia Elding, ne’ebé haree kona-bá petróleu no mina-rai nian, konstrui ona postu Tránzitu balun iha área Bairu-Pité.

Jornalista: Rogério Cárceres