Hatutan.com, (25 Outubru 2021), Dili—Liga Futeból Timor-Leste (LFTL) realiza technical meeting atu buka hadi’a no verifika uluk dadus jogadór hodi rezolve problema disputa ba jogadór sira ne’ebé klube sira reajustu hanesan, molok hakat ba abertura jogu primeira divizaun iha époka 2021.

Vise Prezidente Aitana FC, João Samanta de Sousa. Foto/LFTL.

Diretór relasaun públika LFTL, Diogo Neto Fraga, hateten servisu ohin ne’e nu’udár serbisu kontinuasaun husi servisu sira seluk ne’ebé halo ona.

Notísia iha Relasaun: Academica FC iha Esperansa Hakat ba Primeira Divizaun

Primeira divizaun tinan ne’e iha de’it klube hitu mak tuir tanba Boavista FC antes ne’e deside rejigna an husi liga époka ne’e.

Tanba ne’e, disputa jogadór hola parte iha prosesu ne’e, órgaun liga deside ona atu klube sira buka-malu rezolve tiha lai, molok liga ne’e hahú iha 12 Novembru.

“Atu solusiona problema disputa jogadór-sira, órgaun liga husu klube sira halo komunikasaun di’ak nune’e bele salva guarda jogadór sira,” Diogo Fraga, hateten iha D’city Hotel Villaverde, Dili, Segunda (25/10).

Relasiona ho disputa ne’ebé iha, diretór verifikasaun LFTL, José Carvalho hamutuk ho klube primeira divizaun sira halo uluk verifikasaun ba jogadór sira, hodi identifika atu labele mosu naran jogadór dupla iha kada ekipa husi klube sira ne’ebé iha.

Iha verifikasaun, lista jogadór mosu duni disputa entre klube sira iha primeira divizaun ne’ebé rejista jogadór ho naran hanesan.

Situasaun ne’e halo prezidente klube sira mós preokupa tanba disputa ne’e hamosu konfuzaun ne’ebé obriga órgaun liga tenke fó tan tempu adisionál atu klube sira rezolve disputa ne’e.

Prezidente As Ponta Leste, Osório Florindo, hateten klube dahuluk mak iha direitu ba jogadór tanba ne’e husu atu prezidente no manajementu klube ne’ebé foin selebra kontratu ho jogadór sira, atu buka meius hodi rezolve disputa ne’e.

“Ami husu atu klube sira ne’ebé foin mak selebra kontratu ho ami nia jogadór maka tenke buka ami atu rezolve. Se sira la buka, signifika jogadór ne’e na’in husi klube anterior,” nia hateten.

Disputa ba jogadór sira mai mós husi parte Lalenok United no Karketu Dili FC ne’ebé rejista jogadór hanesan ba iha órgaun liga. Jogadór ne’ebé ekipa rua rejista hotu maka Rofino Gama no Natanael dos Reis.

Maski nune’e, Lalenok United no Karketu Dili FC iha ona komitmentu atu solusiona problema ne’e liu husi dalan legál katak, sei buka atu hasoru-malu hodi fó solusaun ba problema disputa ne’e.

Alende ne’e, klube sira mós halo disputa ba eis jogadór sira husi klube Boavista FC ho razaun atu bele asegura futuru futebolista sira ne’ebé antes ne’e selebra ona kontratu ho Boavista.

Hatán ba preokupasaun sira ne’ebé klube sira enfrenta, órgaun liga sei fó tán tempu adisionál to’o Kuarta atu klube sira rezolve disputa ne’ebé  iha, hodi halo armonizasaun ba lista jogadór ne’ebé iha.

Aitana FC vs Karketu Dili FC sei Loke Primeira Divizaun

Liga Futeból Timor-Leste (LFTL) realiza technical meeting iha D’city Hotel Vila verde, Dili, Segunda (25/10). Foto/LFTL.

LFTL mós realiza ona Technical Meeting ho klube sira husi primeira divizaun hodi dada sorteiu ba jogu sira ne’ebé sei realiza iha fulan Novemru tinan ne’e.

Iha dada sorteiu ne’e, klube Aitana FC ho Karketu Dili FC mak sei hasoru malu iha 12 Novembru 2021 iha estádiu munisipál Dili.

Hafoin dada sorteiu Vise-Prezidente Aitana FC, João Samanta de Sousa, hateten klube hotu iha ambisaun atu konkista vitória iha kada jogu inklui Aitana FC rasik.

Tanba ne’e, Aitana FC sei esforsu liu husi treinu ho matéria jogadór ne’ebé iha atu nune’e bele asegura vitória iha minutu 90 nia laran.

“Ami iha jogadór estranjeiru na’in-haat, tanba ne’e ami iha esperansa atu halo jogu ida-diak kontra adversáriu sira iha kompetisaun liga epoka ne’e,” João Samanta de Sousa hateten ba jornalista sira, hafoin dada sorteiu iha D’city Hotel  Vila verde, Dili.

Nune’e  mós Diretór Tékniku Karketu Dili FC, António Timótio, hateten preparasaun klube ne’e nian ba époka ne’e minimu tebes, maibé garante sei halo jogu di’ak no kompetitivu.

Hosi parte Ezekutivu DIT FC reprezenta husi Estanislau Baptista deklara mós katak, ekipa ne’e preparadu atu enfrenta liga iha époka ne’e.  

Jornalista: Vito Salvadór