Hatutan.com, (09 Novembru 2021), Dili—Órgaun Liga Futeból Timor Leste (LFTL), kontinua fó tempu ba klubu sira primeira divizaun iha époka ne’e, atu rezolve disputa jogadór hodi kompleta rejistrasaun molok abertura jogu.

Serimónia asinatura nota entendimentu entre kompañia Katuas Patrício Unip. Lda, Zeto Patricio ho Klubu Karketu Dili FC, Tersa (09/11/21). Foto/Hatutan.com.

Tuir kalendáriu ne’ebé órgaun Liga Timorense no Federasaun Futeból Timor Leste (FFTL) prodús, jogu primeira divizaun sei hahú iha Sesta (12/11) sei abertura hosi Karketu Dili FC ho Aitana FC.

Notísia iha Relasaun:Rezolve Uluk Disputa Jogadór Molok Abertura Primeira Divizaun

Diretór Verifikasaun no Lisensiamentu Klube, José de Carvalho, hateten disputa jogadór sei la’o namanas, nune’e órgaun LFTL deside atu fó tán tempu ba klube sira, hodi rezolve molok halo hikas rejistrasaun hodi tuir kompetisaun iha tinan ne’e.

“Ita sei fó tempu ba klube sira ne’ebé oras-ne’e iha hela prosesu atu buka solusaun ba disputa jogadór ne’e, hodi hein sira mai rejista hikas,” José Carvalho hateten ba jornalista-sira iha edifísiu LFTL, iha Bairru dos Grilhos Dili, Tersa (09/11/21).

Klubu tolu mak iha hela problema ba disputa jogadór hanesan Lalenok United FC, Karketu Díli FC no As Ponta Leste FC.

Hosi klube tolu ne’e, iha klubu rua mak rezolve ona disputa jogadór, hanesan Karketu Dili FC no Lalenok United FC, kona-bá jogadór Nataniel dos Reis.

“Prosesu rezolve disputa jogadór Nataniel dos Reis remata ona liu husi Klube rua aseita ho transferénsia ho montante ne’ebé klube rua konkorda. Karta transferénsia entegra ona ba LFTL,” Komunikadu ne’ebé Hatutan.com asesu iha pájina ofisiál Klubu Karketu Dili FC.

Iha parte seluk, As Ponta Leste FC no Lalenok United FC halo hela disputa ba jogadár estranjeiru Muhammad Mumi no to’o oras-ne’e parte rua seidauk iha solusaun, tanba ne’e parte LFTL sei nafatin hein desizaun hosi parte rua.

“Ami sei konsidera liu klube ida ne’ebé mai ho dokumentu komprovativu, tanba iha legalidade ne’ebé hatudu provas katak, jogadór refere pertense ba klubu ida ne’e,” José Carvalho, esplika.

Bazeia ba deklarasaun durante technical meeting iha D’City Hotel Bebora, Prezidente As Ponta Leste FC Osório Florindo hateten, Muhamad Mumi iha kontratu eskrita ho As Ponta Leste FC tanba ne’e konsidera Lalenok United FC mak tenke buka meius atu rezolve.

“Mumi ne’e ha’u-nia jogadór, tanba ne’e ha’u la disputa ho klubu ida,” Osório Florindo, deklara.

Maske nune’e, parte Lalenok United FC nafatin ho nia pozisaun no lakohi fó komentáriu ruma relasiona ho asuntu ne’e.

Katuas Patrício Sai Sósiu Foun ba Karketu Dili FC

Klubu Karketu Dili FC ho naran estimada ‘Matak Malirin’ hetan tán patrosinadór foun ne’ebé sai mós hanesan sósiu ba klubu, hodi haforsa finansiamentu klubu atu bele enfrenta époka ne’e ho susesu.

Vise Prezidente Karketu Dili FC Luis Obrai, konsidera klubu ne’e marka tán istória foun ho prezensa kompañia Katuas Patrício nu’udár patrosinadór, nune’e mós hanesan sósiu foun ba klubu.

“Ami espera katak, Katuas Patrício la’ós tinan ida-ne’e de’it, maibé ba oin sei nafatin hamutuk ho Matak Malirin,” Luis Obrai hateten ba jornalista-sira iha edifísiu kompañia Katuas Patricío Baia Leste Dili.

Iha biban hanesan na’in ba kompañia Katuas Patrício Unip. Lda, Zeto Patricio hateten, nia hili mai hamutuk ho Karketu Dili FC tanba iha razaun lubuk ida no buat importante maka oinsa tulun foin-sa’e sira lori futeból ba oin.

Dezenvolvimentu futeból iha Timor-Leste iha entidade hotu nia kabás, tanba ne’e kompañia Katuas Patrício mós sente iha responsabilidade.

Zeto Patrício konsidera futeból ne’e hanesan indústria boot ida, tanba ne’e presiza ema hotu nia tulun liu hosi investimentu ne’ebé iha, atu loron ruma futeból iha rai ne’e bele buras.

Nune’e mós  Prezidente Karketu Dili FC, Adilson Ribeiro konsidera apoiu hosi Patrosinadór sira ba iha mundu futeból imoprtante no ne’e hatudu ema nia komitmentu atu dudu futeból ba oin.

Hafoin serimónia  asinatura nota entendimentu entre parte rua, Prezidente Karketu Dili FC optimista no garante nia ekipa sei manan iha jogu dahuluk kontra adversáriu Aitana FC tanba iha ona preparasaun másimu.

Jornalista: Vito Salvadór