Hatutan.com, (27 Novembru 2021), Baucau—Prezidente Repúblika (PR), Francisco Guterres Lú Olo, husu ba povu Timor-Leste (TL) atu labele jeneraliza beibeik veteranu hotu-hotu hada’u-malu projetu, tanba de’it individu ida nia hahalok.

Ambiente diálogu ho Prezidente Repúblika (PR), Francisco Guterres ‘Lú Olo’, ho veteranu-sira iha salaun Centro Convenção Munisípiu Baucau, Sesta (26/11/21). Foto/Média PR.

PR Lú Olo husu ne’e, relasiona ho preokupasaun hosi veteranu Lagarto, liuhosi diálogu aberta iha Munisípiu Baucau, ne’ebé hato’o katak, ema duun veteranu hada’u projetu iha Munisípiu Likisá.

Notísia iha Relasaun: Ai-funan Nu’udár Sinál Rekoñesimentu ba Erói Sira iha Ossuário Baucau

Xefe Estadu husu ba populasaun tenke hanoin halo didi’ak, no buka hatene uluk molok hateten dehan veteranu hada’u-malu  projetu.

Advertisement

Tanba, dala-ruma la’ós veteranu hotu-hotu, maske iha ema ida ka rua de’it nia kazu, jeneraliza tiha ba veteranu hotu-hotu.

“Deskulpa mais, ha’u hanoin katak veteranu hotu-hotu la halo hanesan ne’e. Balun ne’e moris aat liu, balun moris hela iha to’os laran, ha’u hatene. Ha’u haree sira nia foto, ha’u haree sira ko’alia. Ne’ebé, kuandu ita ko’alia, labele ba ema hotu. Sé a mak halo, ko’alia ba a. sé b mak halo, ko’alia b,” Lú Olo hateten durante diálogu ho veteranu sira iha Centro Convenção Baucau (CCB).

Lú Olo, afirma tán, veteranu hotu-hotu la halo hanesan saida, mak ema dehan, maibé iha balun mós halo, tanba veteranu sira hada’u-malu projetu duni.

Iha Munisípiu Vikeke mós ema dehan katak, veteranu “Terra Mabulak” maka kaer projetu barak liu. Projetu loke estrada ida sa’e ba iha foho Builau tutun mós, dehan nia mak kaer hotu.

“Ida ne’e, ha’u hateten momós ba alin sira, maun sira. Ita ne’e ba uluk dehan tau projetu duni. Tanba ne’e, maka ema hateten. Mais ema hateten ne’e jeneraliza tiha ba ita hotu. Ita hotu la halo hanesan ne’e. Sé ita na’in-rua de’it mak hada’u projetu, prontu maka ida ne’e de’it ona,” Xefe Estadu ne’e subliña.

Advertisement

Atu evita deskonfiansa sira ne’e, Lú Olo sujere ba veteranu sira, importante liu maka tenke hamutuk nafatin.

Tanba, bainhira veteranu sira la’o ketak-ketak, maka ema sei hateten saida mak ema hateten ba nia veteranu maluk sira.

Prezidente Repúblika (PR), Francisco Guterres Lú Olo. Foto/Hatutan.com.

Iha fatin hanesan, Veteranu Nélio Maukinta “Lagarto” haree katak, ema sira ne’ebé uluk lakohi ukun-aan, komesa inkosta ona nia maun Xanana, Taur Matan Ruak, Lú Olo, Lere Anan Timur, no sira seluk tán  hodi hanehan veteranu sira iha kotuk.

“Ha’u la ko’alia buat barak. Ha’u hakarak hateten de’it, ema oportunista sira, inkosta maun sira, aman sira hodi hanehan fali veteranu. Sira ne’e dehan katak, ami veteranu mak ba hada’u-malu projetu,” Lagarto, alerta.

Lagarto mós rezeita ho informasaun hosi individu balun ne’ebé dehan veteranu sira impede projetu, tanba realidade veteranu sira rasik osan laiha.

“Ami maka impede projetu. Sira inkosta hela ba kompañia balun, impede projetu, dehan katak ami veteran mak impede projetu. Ami veteranu osan laiha liu. Ami bolu laran mamuk, ami ba impede projetu hosi ne’ebé,” Lagarto afirma.

Advertisement

Nune’e mós veteranu “Terra Maubulak”, preukupa katak, to’os ne’ebé sira mak halo, no kuda, ohin loron sira la hetan buat ida. Maske toos ne’e rasik iha kuantidade boot, ho kualidade produtu ne’ebé di’ak tebes.

“Ita mak kuda, hahan kualidade, kuantidade ne’ebé kuda iha to’os laran. Maibe ita bá, lutu metin fali. Ita ba besik de’it hamriik iha ne’ebá, atu presija buat ne’ebé ita hakarak, hato’o mós dehan, animal fuik duni fila-fali, dudu fila-fali ita, labele fó ba iha sira. Terseiru, ita ne’e devia ukun hotu karik, kala ita hetan dalan, maibe ukun na’in-rua, na’in-tolu de’it, ema mak barak, dalan ba ita laiha,” Terra Maubulak, preokupa.

Ba situasaun ne’e, “Terra Maukulak” dehan, tempu ruma ema sei haree veteranu la vale ona, tanba informasaun ne’ebé presija duni asesu, dala-ruma la labele hetan ho susesu.

Jornalista: Rogério Pereira Cárceres

Advertisement