Hatutan.com, (03 Dezembru 2021), Díli–Ministériu Edukasaun Juventude no Desportu (MEJD), sei harii tán eskola hamutuk 22 iha territóriu nasionál atu bele kria kondisaun infraestrutura ba mellora kualidade ensinu aprendizajen.

MEJD Armindo Maia haree kondisaun eskola Ensinu Bázika Filial Molop, Munisípiu Bobonaro, fulan hirak liubá. Foto/Mídia MEJD

Ministru Edukasaun Juventude no Desportu (MEJD), Armindo Maia, esplika Orsamentu Jerál Estadu (OJE) 2021 nian ne’ebé Governu aloka ba MEJD iha transferénsia públika nian kona-bá atu halo konstrusaun ba infraestrutura edukativa nian, hamutuk millaun $20, inklui mós ba kapitál dezenvolvimentu ho fundu infraestrutura.

Iha transferénsia públika nian, oras ne’e MEJD termina ona kontratu ho grupu komunitáriu sira atu harii eskola hamutuk 203. Maibé, sei prosesu transferénsia osan hosi Ministériu Finansas ba iha Banku Sentrál Timor-Leste (BCTL) no Banku Nasionál Komérsiu Timor-Leste (BNCTL) hodi transfere ba iha grupu komunitáriu sira nia konta.

Hosi fulan ida liubá, MEJD iha ninia free balance ba ezekusaun to’o ona 63,5%. Maibé iha semana liubá, atinje ona ba 83%, tanba transferénsia públika ne’ebé mak ekivale kuaze 20%, mak ezekuta ona.

“Iha mós kona-bá kapitál dezenvolvimentu ne’ebé mak ita destina para atu harii no reabilita eskola hamutuk 22. Hakarak informa ba na’in no lou deputadu sira katak, ohin dadeer tuku 08:00 Otl, ha’u halo lansamentu primeira pedra iha Hera ba konstrusaun eskola hamutuk 12, ne’ebé mak finansia hosi kapitál dezenvolvimentu, eskola 10 presiza fali halo retender. Ita espera katak eskola 10 ne’e, bele halo mós lansamentu,” Ministru Armindo Maia, hateten iha ámbitu diskusaun OJE 2022  iha jeneralidade iha Parlamentu Nasionál, Sesta (03/12/2021).

Kona-bá fundu infraestrutura nian, Armindo Maia, haktuir, MEJD iha valór osan hamutuk millaun $200 ne’ebé tuir planu atu loke “Escola Café” hamutuk haat, ho sala de aula hamutuk 48. Tanba tuir estimativa MEJD nian katak, depois finaliza konstrusaun eskola kafé ne’e, nia rezultadu maka sei fó empregu ba ema kuaze rihun neen.

Iha kapitál menór hosi alokasaun OJE 2021 nian, liu-liu atu utiliza ba sosa meza no karteira ba eskola sira, iha valór millaun $2 hodi sosa kadeira no meza ho jogu hamutuk rihun 20.

“Kontratu ha’u aprova tiha ona, ida manán kontratu ne’e, manán ho orsamentu serka millaun $1,5, entaun ita haree took osan sira restu ne’e, karik bele uza para atu sosa tán adisionál meza ho karteira,” Ministru Armindo, informa.

Harii Tán Eskola 100-Resin iha OJE 2022-2023

Governante ne’e, haktuir tán, iha orsamentu tinan 2022, kapitál dezenvolvimentu, sira aloka de’it millaun $2.3 resin. Ho orsamentu ne’e, planeia hela atu harii tán eskola balu no iha orsamentu 2023 nian, iha projetu ida hanaran “best”, ne’ebé maka apoia orsamentu hosi banku mundiál hamutuk millaun $15-resin.

“Ida ne’e atu halo mós infraestrutura edukativa. Ita espera katak ho millaun $15 ne’e, ita bele halo eskola entre 100 to’o 150 eskola. Ho ida-ne’e hotu, sé ita konsege realiza, ami nia dadus, ita sei presiza tán serka 300 eskola mak ita presiza harii no reabilita iha territóriu Timor-Leste,” nia tenik.

Rekursu Umanu no Rekrutamentu

Governu liuhosi MEJD, oras ne’e halo hela prosesu rekrutamentu ba ajente administrasaun públika hamutuk na’in-93 ne’ebé mak ‘abandona’ hosi Governu anteriór.

“Karik na’i no lou sira iha informasaun katak Konsellu Ministru halo ona omologasaun ba kandidatu ne’ebé mak admitidu iha ezame eskrita, ho nota mínimu 60 ba leten, iha ezame eskrita, hamutuk 431 kandidatu, atu pasa ba ezame orál ne’ebé sei hala’o iha loron 09 to’o 21 fulan-Dezembru ne’e,” Ministru Armindo, hateten, hodi responde ba preokupasaun deputadu sira nian iha plenária PN.

Kona-bá rekrutamentu ba vaga 975, Armindo Maia informa, daudaun ne’e ekipa MEJD halo hela prosesu re-verifikasaun ba iha munisípiu, tanba munisípiu hotu-hotu konklui ona no tuir planu verifikasaun ba dadus hirak ne’e, sei remata iha loron 15 fualn-Dezembru 2021. Tanba dadus final to’o ohin loron, iha professor voluntáriu sira hamutuk 242, inklui iha tán lista adisionál ho professor voluntáriu hamutuk 342.

Bainhira prosesu verifikasaun ba dadus sira-ne’e tama hotu ona ba MEJD, maka sira sei kria tán tabela ida hodi halo klasifikasaun ba dadus. Ida-ne’e atu haree professor hirak-ne’e servisu duni ka lae, iha kualifikasaun duni ka lae, no haree mós kona-ba antiguidade, tanba iha profesór balu servisu liu ona tinan lima, maibé iha balu mós foin tama.

Maske nune’e, desizaun ba preokupasaun sira ne’e, tenke liuhosi Konsellu Ministru, dala-ruma mós solusaun polítika, maibé bele involve mós hosi Komisaun Funsaun Públika (KFP), tanba iha lei ida ne’ebé mak konjela kona-bá rekrutamentu ba funsionáriu permanente sira.

Iha parte rekursu umanu, durante ne’e INFORDEPE hala’o ona formasaun ba kursu baxarelatu ba profesór sira hamutuk na’in-2.595 mak foin lalais remata ona kursu. Nune’e mós iha projetu “Pro Portugés” MEJD servisu hamutuk ho Governu Portugés liuhosi Instituto de Camões, ne’ebé forma ona formadór hamutuk 106 ba lingua portugeza iha formasaun intensiva.

Proposta Orsamentu Jerál Estadu (OJE) tinan 2022 ba MEJD nian, ho montante $81,708,63, inklui orsamentu hosi INFORDEPE hamutuk millaun $963,188. Orsamentu hirak ne’e finansia ba programa tolu, sub-programa hamutuk 20, no atividade hamutuk 78.

Saláriu no vensimentu hamutuk $64,292,529. Bens no servisu iha $12,103,627. Kapitál menór, $124,200. Kapitál dezenvolvimentu, $2,331,469. Transferénsia públika, iha $2,219,798. Nune’e, total $81,708,632.

Jornalista: Rogério Pereira Cárceres