Hatutan.com, (06 Dezembru 2021), Díli-Polisia Sientífika Investigasaun Kriminál (PCIC, sigla portugés), iha loron 02 fulan-Dezembru, foin lalais ne’e, detein Timoroan ida  ho inisiál GM tanba halo nia aan hanesan membru Polísia alias polísia falsu.

Notísia iha Relasaun: Membru PCIC Ida Komete Krime Obstrusaun Ba Autoridade Publika

Portavós PCIC, Octaviano da Costa. Foto/Hatutan.com.

Tuir kronolojia ne’ebé haktuir hosi vítima ho inisiál MA, katak iha loron -1 fulan-Dezembru ne’e, MA halo viajen hela ho motór. Derrepente, suspeitu GM bolu tuir vítima hodi aprezenta aan, katak nia membru Polísia no halo ameasa kedas ba vítima no hadau kedas vítima nia sasán balu.   

Portavós PCIC, Octavio da Costa Araújo, haktuir, hafoin ne’e, vítima hola inisiativa rasik ba halo keixa iha PCIC, nune’e PCIC elabora investigasaun no identifikasaun to’o ikus hetan duni suspeitu no halo detensaun ba suspeitu iha loron 02 fulan-Dezembru, foin lalais ne’e, iha área Tasi-Tolu, Díli.  

Tuir PCIC nia afirmasaun katak aktu suspeitu nian ne’e komete krime roubu (krime na’ok) no uzurpasaun ba funsaun.  Tanba ne’e, PCIC detein hela iha sala detensaun PCIC nian hodi submete ba investigasaun.  

Objetu ba krime sira hanesan motór ne’ebé maka suspeitu  uza hodi halo nia asaun, osan ho montante $1000.00-resin, inklui telemovel ne’ebé pertense ba iha vítima nian. Tempu ne’ebá, PCIC halo kedas flagrante de lito ba suspeitu.

“Ho objetu  krime iha hela vítima nia liman, entaun,  ami halo kedas detensaun flagrante de lito bai ha suspeitu. Daudaun ne’e suspeitu detein hela iha sala detensaun durante oras 72 nia-laran hodi komunikadu ho prokuradór no submete ba iha primeiru interrogatóriu judisiál,” Portavós PCIC, Octavio da Costa Araújo, informa ba jornalista sira liuhosi konferénsia imprensa iha sala auditóriu PCIC, segunda (06/12/2021).

Tuir denunsia hosi vítima dehan katak, momentu suspeitu halo ameasa ba vítima deskonfia utiliza hela ko-armas (kilat/pistola), maibé bainhira PCIC sira halo kapturasaun, la deteta arma ruma iha suspeitu nia liman.  

Jornalista: Rogério Pereira Cárceres