Hatutan.com, (13 Dezembru 2021) Díli-Tribunál Distritál Díli (TDD), Segunda (13/12/2021), hala’o primeiru julgamentu ba krime burla agravadu ne’ebé deskonfia involve husi jerente kompañia BROTHER HOOD arguidu Mario Freitas relasiona ho projetu pakote referendum husi Ministériu Agrikultura no Peska hodi halo konstrusaun ba moru iha Baucau-Villa ne’ebé ikus mai fó prejuizu ba lezadu José Manuel dos Reis nu’udar diretór kompañia UNIPAZPRO Lda.

Akuzasaun husi Ministériu Públiku (MP) katak iha loron 23 fulan-Setembru 2009,  Ministériu Agrikultura no Peska hala’o enkontru ho emprezáriu hosi Munisípiu 13 hodi ko’alia kona-bá “Pakote Referendum”, ne’ebé deside katak projetu ne’ebé atu halo tenke termina iha fulan-tolu nia laran, maibé bele prolonga bainhira obra ne’e atinje ona 50% ka 80%, bainhira la kumpre maka Governu sei la fó tán lisensa.

lha enkontru deside mós bele iha kompañia rua hamutuk hodi kaer obra ne’e, maibé tenke halo akordu konjunta antes hahú asina kontratu no vistu hosi Koordenadór Munisípiu, tanba ne’e, iha loron 23 fulan-Setembru 2009, lezadu ho nia kompañia UNIPAZPRO hamutuk ho arguidu hanesan jerente hosi kompañia BROTHER HOOD Lda ho diretór kompañia Nelson Belo asina akordu hodi halo projetu ne’e.

Iha loron 4 fulan-Outubru 2009u lezadu hamutuk ho arguidu halo enkontru ida ho koordenadór Munisípiu Baucau, Abrão Gabriel dos Santos Oliveira, hodi ka’olia kona-bá osan adiantamentu 20% ho nia valor  $27,159.60, tanba ne’e sira dezloka kedan ba fatin konstrusaun hodi hasoru malu ho badaen Mateus da Silva Correia hodi halo kontratu traballu no selu badaen ho valor osan $5.000.00 no termina iha periods fulan-tolu nia-laran.

Iha loron 19 fulan-Outubru 2009, liuhosi loja Toko Lay fornese material konstrusaun ho valor  $27,000.00, maibé iha loron iha loron 30 fulan-Outubru tinan 2009 arguidu halo pedidu ba iha AECCOP sem koñesimentu husi lezadu, koordenadór Munisípiu hodi halo falsifikasaun hodi hetan  $135.000.00.

Iha loron 3 fulan-Novembru 2009, lezadu haree projetu ne’ebé sira halo, maibé bada’e sira informa katak labele halo obra, tanba material laiha, ho nune’e, nia mai husu iha Toko Lay atu fornese material, maibé sira hatán dehan, arguidu mai foti ona osan 15% ne’ebé iha ho valor $12.697.30 hodi fó informasaun falsu katak arguidu maka diretór ba kompañia Brodher Hood, maibé diretór loloos kompañia maka Nelson Francisco Assis Belo.

Arguido mós halo falsifikasaun kona-bá relatóriu halo obra liu hosi pedidu ba iha Sekretáriu Estadu Agricultura, Marcos da Cruz hodi informa katak obra ne’e termina ona hodi husu pagamentu, maibé realidade obra sidauk termina ho nune’e  koordenadór Pakote Referendu Munisípiu Baucau Abrão de Oliveira lakohi asina.

Ho arguidu nia hahalok ne’e, lezadu simu informasaun hosi José Coelho katak loos dunik arguidu falsifika dokumentu hodi ba foti xeke iha AECCOP hodi ba foti osan iha Banku sem koñesimentu hosi Iezadu no mós koordenadór Pakote Referendu Munisípiu Baucau.

Konsekuénsia husi arguidu nia hahalok fó prejuizu ba lezadu ho montante $53.322,80, tanba ne’e MP akuza arguidu ba pratika krime burla agravadu ne’ebé previstu iha artigu 267 husi kódigu penal TL.

“Ha’u nunka halo pedidu falsu ba levantamentu osan, tanba ha’u hanesan mandór de’it hodi haree obra iha terrenu maibé tuir orientasaun husi diretór kompañia rua ne’e,” arguidu Mario Freitas.

Maske nune’e, arguidu rekoñese nia parte sempre foti osan iha diretór kompañia BROTHER HOOD, Nelson Francisco Assis Belo hodi selu badaen sira.

Lezadu José Manuel dos Reis deklara osan ho montante $27.000 tama iha konta bankária kompañia BROTHER HOOD no diretór hateten osan ba kompañia UNIPAZPRO fó ona iha arguidu, maibé arguidu la fó osan ne’e ba lezadu nu’udar nain ba kompañia UNIPAZPRO.

Hafoin rona arguido ho lezadu, juiz prezide adia hikas julgamentu ba loron seluk hodi kontinua rona lezadu no sasin sira.

Audiénsia julgamentu preside husi juiz koletivu, Arjentino Luisa Nunes, José Gonçalves, Alvaro Freitas, MP reprezenta husi Prokuradór Reinato Berenahak no arguidu hetan asisténsia legal husi Defensor Públiku ida.

Jornalista:  Carmelita Isaac