Hatutan.com, (17 Dezembru 2021), Dili—Governu Xina liuhosi ninia Embaixada iha Díli, oferese uma ida ho kuartu haat ba Polísia Nasionál Timor-Leste (PNTL), Komandu Munisípiu Díli (KMD), ne’ebé sei utiliza hanesan sala detensaun ba sidadaun ne’ebé komete krime ruma.

Governu Xina liuhosi ninia Embaixada iha Díli, oferese uma ida ho kuartu haat ba Polísia Nasionál Timor-Leste (PNTL), Komandu Munisípiu Díli (KMD), ne’ebé sei utiliza hanesan sala detensaun, Sesta (17/12/2021). Foto/Hatutan.com.

Sela detensaun ne’e, entrega direta hosi Embaixadór Xina iha TL, Xiao Jiangou’s, no simu hosi Vise Ministru Interiór (VMI), António Armindo ho Komandante Jerál  PNTL, Komisáriu Faustino da Costa, iha Komandu Jerál Caicoli, Sesta (17/12/2021).

Notísia iha Relasaun:Xina-TL Kontinua Hametin Kooperasaun Bilterál

António Armindo informa, sentru detensaun ne’ebé konstrui hosi Governu Xina ne’e gratuita no laiha troka akordu ruma. 

“Sentru detensaun ne’e apoiu hosi Governu Xina, liuhosi embaixada ho gratuita. Tanba haree ba kondisaun ida ne’ebé durante ne’e ladún di’ak, la favorese atu detein sidadaun sira iha ne’e la ho dignu,” António Armindo, hateten.

Iha tinan 2020, bainhira António Armindo hala’o vizita ba membru sira iha Komandu Munisípiu Dili, obserka katak, kondisaun sela iha Caicoli, presija tau atensaun.

“Ikus mia hetan resposta pozitivu hosi embaixada Xina iha ne’e, sira responde pozitivu no konstrui duni, ohin halo lansamentu hodi entrega mai Governu, nune’e instituisaun PNTL bele utiliza,” nia hateten.

Embaixadór Xina iha TL, Xiao Jiangou’s, dehan, iha tinan ida liubá, Xina iha ona kooperasaun entre instituisaun Polisia hosi nasaun rua nian, ne’ebé dezenvolve ona ho lais tebes.

Kooperasaun hosi Polísia ba polisia, sai hanesan parte importante ida ba amizade no ho kooperasaun ida pragmátiku entre nasaun rua.

Tanba ne’e, Governu Xina, sei iha nafatin komitmentu atu bele fó apoiu asisténsia nesesáriu sira ba PNTL.

Iha fatin hanesan, Komandante Jerál  PNTL, Komisáriu Faustino da Costa, konsidera sela ne’e nu’udár fatin atu asegura ema ho seguru.

Durante ne’e PNTL iha duni regra kona-bá halo detensaun ba suspeitu sira, maibé sentru detensaun sira ne’ebé iha uza dezde kedan tempu forsa Organizasaun Nasaun Unidas (ONU) nian sei iha Timor-Leste.

“Tanba ne’e, husu ba membru sira uza ho kuidadu, ho responsábilidade. Maski fatin ne’e la’ós PNTL mak atu utiliza, maibé ida-ne’e ba públiku, entaun PNTL mak tenke jere oinsa bele utiliza ba tempu naruk,” Komisáriu Faustino, fó hanoin.

Sentru detensaun ne’e konstrui ho orsamentu hosi Governu Xina, liuhosi embaixada iha TL ho montante hamutuk $60.000-resin.

Projetu ne’e implementa hosi Shandong International Economic & Technical Cooperation Group, hosi Xina ho área totál ba uma ne’e nia medida 16×11 no kada sala ho luan metru-kuadradu 32.

Konstrusaun ne’e hala’o durasaun fulan rua, komesa hosi fulan Setembru to’o Novembru.

Jornalista: Rogério Cárceres