Hatutan.com, (21 Dezembru 2021), Díli-Kondisaun ahi eletrisidade “mate-lakan” beibeik iha Díli laran no munisípiu sira balun tanba liña distribuisaun ka fiu eletrisidade barak mak tuan ona. 

Tékniku EDTL,E.P hadi’a liña distribuisaun eletrisidade. Foto/Hatutan.com

Prezidente Eletrisidade  Timor-Leste, Empreza Publika (EDTL, E.P), Paulo da Silva, rekoñese, iha duni problema balu kona-bá manutensaun nian tanba dezde 2016 EDTL kontratu ona kompañia hamutuk 12 hodi halo manutensaun iha Díli laran, maibé to’o oras ne’e prosesu seidauk finaliza.

“Ita-nia problema agora daudaun, ita-nia liña distribuisaun ne’e, ko’alia kona-bá kondisaun liña distribuisaun kuaze tuan hotu ona,” Paulo da Silva, informa ba jornalista sira, iha ámbitu konsolidasaun servisu EDTL nian ne’ebé hala’o iha Salaun João Paulo II, Díli, Tersa (21/12/2021).

EDTL, E.P, halo esforsu ona hodi komunika ba kompañia sira, liuhosi kontaktu, enkontru inklui haruka karta xamada ba kompañia sira atu bele aselera servisu sira hodi konklui nia manutensaun ba liña eletrisidade sira. Maibé realidade kompañia barak iha limitasaun tebes liuliu iha situasaun pandemia Covid-19 no Estadu Emerjénsia atu bele hatama materiál sira hosu rai-li’ur.

EDTL, E.P rasik mós identifika katak sasán sira iha relasaun ho  rede distribuisaun durante ne’e uza sistema manuál hela. Nune’e bainhira akontese avaria, tékniku sira lori tempu naruk atu deteta, ezemplu iha fider 01, hosi Camea, liga ba to’o Liquiça, lori tempu atu deteta fiu ne’e kotu iha ne’ebé, lahatene isolator nakfera iha ai-riin ida ne’ebé. Entaun, lori tempu naruk para EDTL sira la’o atu deteta problema ne’e.

Paulo da Silva, hateten apezar ho difikuldade sira-ne’e, ekipa tékniku sira esforsu maka’as hela atu oinsá bele garante nafatin ahi ba iha populasaun ka kliente sira.

Esforsu ida ba tempu naruk nian atu mellora TL nia liña distribuisaun, Ministériu Finansas (MF) ho  Ministériu Obras Públika (MOP), Segunda (20/12/2021), asina ona akordu ho Banku Dezenvolvimentu Aziátiku (ADB) nian, hodi empresta osan ho montante hamutuk millaun $35 ba modernizasaun liña distribuisaun.

Dezafiu seluk ne’ebé EDTL, E.P rasik enfrenta, limatasaun rekursu umanu, no fasilidade servisu. Tanba ne’e, informasaun hosi komunidade kona-bá avaria téknika balun bainhira tékniku sira EDTL, E.P nian to’o atraza.

2020, EDTL, E.P rekolla taxa millaun $30-resin

Durante 2020, EDTL, E.P rekolla taxa hosi konsumidór eletrisidade sira ho valór orsamentu hamutuk millaun $30-resin.

Fontes hosi reseita sira-ne’e rekolla hosi konsumidór sira ne’ebé utiliza kontadór eletrisidade ho pulsa, penalizasaun ba sira ne’ebé kontra regra, ilegál, no rekolla mós hosi dokumentu sira tenderizasaun nian, no mós taxa ba rejistu nova-ligasaun sira.   

Ba tinan 2021, EDTL,E.P nia projesaun sei hetan millaun $33 no EDTL,E.P iha dadus katak oras ne’e suku hamutuk 70 resin (15%) iha territóriu TL mak seidauk hetan asesu ba naroman eletrisidade. Maibé daudaun ne’e, iha faze primeiru, projetu hamutuk 34 mak sira hahú promove, no faze daruak iha 44, ne’ebé sei rezolve, no introdús eletrisidade ba suku hamutuk 50 resin.

Ema Uza Naran Veteranu Impede Projetu EDTL

Prezidente EDTL, E.P, Paulo da Silva, informa mós katak, durante ne’e akontese  mós ema uza naran veteranu hodi impede projetu eletrisidade iha suku sira. Maibé, liuhosi prosesu aproximasaun, parte EDTL konsege konvense timoroan sira to’o hetan solusaun no konsensu.

Atu evita situasaun hodi naran veteranu nian ba prosesu konkursu iha EDTL,E.P, maka EDTL rasik iha ona fleksibilidade hodi simplifika rekizitu tékniku sira iha aprovizionamentu nian, hodi nune’e, timoroan sira hotu bele partisipa la’ós ema ho naran veteranu de’it.

Jornalista: Rogério Pereira Cárceres