Hatutan.com, (28 Dezembru 2021), Díli-Governu liuhosi Ministériu Interiór (MI), prevee ona orsamentu millaun $3, iha Orsamentu Jerál Estadu (OJE) 2022, ne’ebé sei utiliza hodi sosa duni karreta hamutuk 60, hodi oferese ba Komandu Polísia Nasionál Timor-Leste (PNTL), nune’e bele fasilita membru-sira iha serbisu operasionál.

Vise-Ministru Interiór, António Armindo. Foto/Hatutan.com

“Karreta kuaze 60 ba eskuadra sira, ho unidade sira, 10 ba tránzitu, 14 ba jéneru, atu fahe ba diresaun sira iha munisípiu inklui departementu jéneru,” Vise Ministru Interiór, António Armindo, hateten ba jornalista sira, hafoin avaliasaun annuál, iha Centro Formação da Policia (CPF), Comoro, Tersa (28/12/21).

Notisia iha Relasaun:OJE 2022, PN Aprova Millaun $34 ba PNTL

Governu mós sei sosa tán, motorizada, komputadór ho printer, ba eskuadra hotu-hotu no Unidade Patrullamentu Fronteira (UPF), iha postu sira liña fronteira.

Tuir planu, entre Janeiru to’o Marsu 2022 bele sosa ona, tanba orsamentu ho montante millaun $3  ne’e sei utiliza ba sosa duni karreta.

Rehabilitasaun Eskuadra Ai-mutin Hein Tenderizasaun

Kona-bá prosesu rehabilitasaun ba edifísiu eskuadra PNTL Ai-mutin, ne’ebé kada tinan sempre sofre ba inundasaun, António Armindo informa nia halo ona aprezentasaun ba Conselho Administração Fundo Infraestrutura (CAFI), no parte CAFI rasik mós aprova ona, no hein de’it atu enkamiña ba iha CNA hodi halo tenderizasaun.

Progressu ezekusaun OJE 2021 nian ba Ministériu Interiór, oras-ne’e atinje 95%, ne’ebé barak liu gastu ba saláriu no vensimentu, kapitál menór.

Xefe Administrasaun PNTL, Superintendente Xefe Polísia, José Soares, haktuir orsamentu ne’ebé aloka ba PNTL iha OJE tinan 2022 nian, ho montante millaun $41, Komando PNTL sei uza hodi halo preparasaun festa demokrasia tuir mai, liu-liu atu sosa karreta membru sira nian hodi fó seguransa ba festa demokrasia ne’e.

Jornalista: Rogério Pereira Cárceres