Hatutan.com (29 Dezembru 2021), Díli—Konsellu Ministru (KM), 29 Dezembru 2021 iha Palásiu Governu, Dili, aprova projetu Dekretu Governu, ne’ebé aprezenta hosi Ministru Administrasaun Estatál (MAE), Miguel Pereira de Carvalho, substitui hosi Ministru Planu no Ordenamentu, José Maria dos Reis, ne’ebé ho objetivu atu estabelese Remunerasaun traballadór, kooerdenadór no titulár sira órgaun Ajénsia Dezenvolvimentu Nasionál, I.P (ADN).

Reuniaun Konsellu Ministru (KM), Kuarta (29/12/21). Foto/MPKM.

Projetu ne’e hanesan rezultadu re-estruturasaun ne’ebé halo liuhosi Dekretu-Lei númeru 60/2020, loron 25 fulan-Novembru, ne’ebé transforma ona ADN sai institutu públiku ida, integra iha Administrasaun Indireta Estadu.

Konsellu Ministru mós aprova proposta ne’ebé aprezenta hosi Ministru Koordenadór Assuntu Ekonómiku (MKAE), Joaquim Amaral, no hosi Ministru Petróleu no Minerais (MPM), Víctor da Conceição Soares, ba prorrogasaun prazu depózitu provizaun nian ba kompartisipasaun Estadu iha ámbitu Akordu Espesiál Investimentu nian, ne’ebé halo ona ho TL Cement, Lda to’o loron 31 fulan-Dezembru tinan 2021.

Akordu Espesiál Investimentu entre Estadu Timor-Leste no TL Cement, Lda, hala’o ona iha loron 17 fulan-Maiu tinan 2016, hafoin neé, liuhosi Rezolusaun Governu númeru 41/2016, loron 23 fulan-Novembru, aprova ona partisipasaun hosi Estadu iha sosiedade komersiál ida-ne’e.

Iha data hanesan, parte sira halo kontratu-promesa ida hodi aumenta kapitál no transforma sosiedade tuir kuota sai sosiedade anónima, hafoin kria konta bankária ida ne’ebé titulada hosi Autoridade Nasionál Petróleu no Minerais (ANPM), hodi garante fundu sira ne’ebé presiza ba investimentu.

Ikusliu, Konsellu Ministrus mós aprova projetu Dekretu-Lei ida ne’ebé aprezenta hosi Ministru Finansa, Rui Augusto Gome, ne’ebé ho objetivu atu kria no regula apoiu finanseiru temporáriu no estraordináriu sira ne’ebé sei fó ba empreza empregadór sira no ba traballadór individuál sira ne’ebé la servisu ba ema ka instituisaun seluk no rejista ona iha rejime konstributivu seguransa sosiál.

Diploma ne’e ho objetivu atu hamenus impaktu ekonómika pandemia no mós hodi kontribui ba manutensaun postu traballu no sobrevivénsia empreza sira.

Jornalista: Rogério Pereira Cárceres