Hatutan.com, (10 Janeiru 2022), Díli-Treinadór selesaun nasionál Timor-Leste nu’udar mós  diretór tékniku Federasaun Futeból Timor Leste (FFTL), Fabio Maciel nia kontratu sei termina iha  loron 31 fulan-Dezembru, tinan ne’e.

Notísia iha Relasaun: Kalbuadi, Francisco ho Nilton Kandidatu Forte ba Prezidente FFTL 2022–2026

Treinadór selesaun nasionál Timor-Leste nu’udar mós  diretor tékniku Federasaun Futeból Timor Leste (FFTL), Fabio Maciel. Foto/Espesiál FFTL

Adjuntu Sekretáriu Jerál FFTL, Frederico Martins ba Hatutan.com iha nia knaar fatin, FFTL, Díli, Segunda (10/01/2022), esklarese katak, oras ne’e Fabio Maicel nia kontratu ho FFTL to’o iha 31 fulan-Dezembru tinan ne’e, maibé FFTL iha kompeténsia atu hakotu kontratu ne’e bainhira la atinje alvu ne’ebé FFTL iha liuliu lori selesaun nasionál Timor-Leste haku’ur  ba semi final no di’ak liután ba final AFF Championship iha Cambodia.

“Ita ko’alia ona atu profesor Fabio Msicel tenke atinzi saida mak tau iha kontratu no karik falla ita iha dalan seluk atu foti,” Frederico Martins afirma.

Jogu AFF U23 Championship nu’udar jogu preparasaun ba Sea Games Vietnam ne’ebé sei hala’o iha fulan-Maiu mai ne’e, nune’e FFTL husu atu treinador ho nasionalidade Brazileiru ne’e tenke halo servisu másimu hodi hadi’a selesaun nasionál nia prestasaun iha nivel sudeste aziátiku.

Relasiona ho partisipasaun Timor-Leste iha kompetisaun AFF U23 Championship iha Cambodia, Timor Leste sei halo preparasaun iha Qatar no Tailándia depende ba konvite try out ne’ebé FFTL iha ho nasaun rua refere.

Adjuntu Sekretáriu Jerál FFTL ne’e hateten FFTL sei hein  konfirmasaun husi nasaun rua ne’e atu halo try out nune’e sei iha posibilidade selesaun nasionál sira halo preparasaun preliminariu liuliu fíziku iha Timor-Leste molok arranka ba diáspora iha meadu fulan-Janeiru ne’e.

Razaun FFTL eskolla  nasaun seluk ba preparasaun selesaun nasionál nian tamba kondisaun infraestrutura no fasilidade treinu iha Timor-Leste inkompletu, tetu ba kondisaun hirak ne’e mak FFTL hanoin atu lori jogador sira sai husi Timor-Leste nu’udar mós motivasaun ida atu jogador sira bele halo preparasaun másimu hamutuk ho treinador no ekipa tékniku hotu hodi fó rezultadu ida mais pozitivu ba Timor Leste.

Tuir oráriu kompetisaun AFF U23 Championship sei hala’o iha nasaun Cambodia hahú iha loron 15 fulan-Fevereiru no Timor Leste tama iha grupu A hamutuk ho nasaun uma nain Cambodia, Filipina no Brunei Darussalam.

Hatutan.com tenta halo konfirmasaun ho Treinador Selesaun Nasionál  ne’e maibé Adjuntu Sekretáriu Jerál informa katak treinador ne’e kona hela COVID-19 hafoin fila husi Brazil no oras ne’e halo hela auto izolamentu.

Jornalista: Vito Salvadór