Hatutan.com (11 Janeiru 2022) Díli—Parlamentu Nasionál (PN) iha sesaun plenária ordinária iha loron 11 fulan Janeiru tinan 2022, liu hosi eleisaun sekreta, hili ona Deputada Carmelita Caetano Moniz, (efetivu) ho Ivo Valente (suplente), hodi reprezenta Parlamentu Nasionál ba Konsellu Superiór Majistratura Judisiál.

PN iha 11 Janeiru 2022, liu hosi eleisaun sekreta, hili Deputada Carmelita Caetano Moniz, (efetivu) ho Ivo Valente (suplente), hodi reprezenta PN ba Konsellu Superiór Magistratura Judisiál. Foto/Média PN.

Sesaun plenária ne’e prezide hosi Prezidente Parlamentu Nasionál, Aniceto Longuinhos Guterres Lopes, akompaña hosi membru Meza sira no hetan prezensa hosi Ministru Asuntu Parlamentares no Komunikasaun Sosiál.

Notisia iha Relasaun:Prezidente Repúblika Veta Dekretu Estatutu Majistradu Judisiál

Antes ne’e, iha loron 16 Novembru 2021, Parlamentu Nasionál haruka ba Prezidente Repúblika Dekretu ida kona-bá Estatutu Majistratura Judisiais.

Hafoin tetu kle’an Dekretu ne’e, Prezidente deside veta no haruka fila diploma ne’e ba Parlamentu Nasionál, tuir artigu 88.o n.o 1 Konstituisaun Repúblika.

Liu hosi mensájen haruka ba Parlamentu Nasionál, Prezidente Repúblika husu ba deputadu sira atu hadi’ak Dekretu ne’e iha mós ámbitu Lei kona-bá Organizasaun Judisiária.

Tuir lei organizasaun judisiária, juíz sira iha Tribunál Administrativu, Fiskál no Kontas haktuir Estatutu Majistratura Judisiais no haktuir mós jurisdisaun hosi Konsellu Superiór Majistratura Judisiál.

Dekretu kona-bá Estatutu Majistradu Judisiál sira tenke haktuir regra-sira tama ona iha Lei Organizasaun Judisiária.

Iha mensájen haruka ba Parlamentu Nasional, iha 10 Dezembru 2021, Prezidente Repúblika fó-hatene mós fundamentu sira seluk relasiona ho ninia desizaun veta Dekretu kona-bá Estatutu Majistradus Judisiais.

Parlamentu Nasionál sei tetu fundamentu hotu-hotu hato’o hosi Prezidente Repúblika iha sesaun Plenária iha loron sia nulu nia laran (90 dias), hahú sura hosi loron ne’ebé órgaun soberania ne’e simu dekretu ne’e ho mensájen prezidensiál kona-bá veto.

Enkuantu, Tuir Konstituisaun RDTL, Prezidente Repúblika (PR), iha kbiit atu promulga ka veta Dekretu ne’ebé Parlamentu Nasionál (PN) aprova iha ninia sesaun Plenária ka Dekretu-Lei ne’ebé Governu aprova liuhusi Konsellu Ministru (KM).

Jornalista: Cipriano Colo