Hatutan.com (17 Janeiru 2022), Díli—Tribunál Distritál Díli (TDD), kontinua hala’o julgamentu ba krime furtu agravadu, ne’ebé deskonfia involve eis Prezidente Parlamentu Nasionál (PPN), atuál deputadu bankada CNRT arguidu Adérito Hugo da Costa, relasiona ho dada ahi illegál iha tinan 2016.

Iha julgamentu kontinuasaun ne’e, sasin José Fernandes atuál Diretór Nasionál Apoiu Konsumidór deklara prega valór multa ba arguidu ho montante $2.000, hodi eduka no hanorin konsumidór-sira atu labele repete hodi halo ligasaun illegál tán iha futuru, tanba bele estraga sistema distribuisaun.

Notisia iha Relasaun:Kazu Adérito Hugo, Sasin Ida Tán Deklara iha Duni Ligasaun Eletrisidade Ilegál

Valór ne’e bazeia ba kontájen liu hosi Sistema ne’ebé kontadór mak sai hanesan komandu de gasta, maibé gastu enerjia hosi arguidu nian durante halo ligasaun illegál intrega hotu ona ba parte Ministériu Públiku.

“Sukat valór gastu enerjia liu hosi dalan rua. Primeiru, sukat karga no liu hosi kontadór ne’ebé prega ona Sistema. Tanba ne’e, kontadór mak determina gastu maibé objetivu hosi inspesaun ne’e atu eduka komunidade labele uza ligasaun illegál. Tanba ne’e, prega multa ho montante $2.000 ba arguidu ne’e atu eduka nune’e iha futuru labele repete,” sasin deklara iha audiénsia.

Hafoin rona sasin, Tribunál adi’a hikas julgamentu ba loron seluk, hodi kontinua rona sasin sira seluk.

Antes ne’e, tuir akuzasaun hosi Ministériu Públiku (MP), katak iha loron 02 fulan Maiu tinan 2016, bazeia ba relatóriu kontájen enerjia ne’ebé relata hosi EDTL hatudu katak, arguidu gasta enerjia normál $120 kada fulan, maibé realidade lista uza enerjia hahú fulan Juñu tinan 2016 to’o fulan Agostu 2017, arguidu gasta enerjia maioria entre $19 to’o $37.

Nune’e, depois de halo komparasaun kontájen ba gastu normál ho montante $120, konklui katak hahú periudu Juñu 2016 to’o Agusto 2017, arguidu nia konduta hamosu ona prezuizu ba Estadu ho montante globál $9,760.

Ho hahalok arguidu, MP akuza arguidu ba prátika krime furtu agravadu ne’ebé previstu iha artigu 251 no artigu 252 hosi kódigu penál TL.

Audiénsia julgamentu prezide hosi juis kolektivu Alvaro M. Freitas, Argentino Luísa Nunes, José Gonçalves, MP reprezentua hosi Prokuradór Rogério Viegas no arguidu hetan asisténsia legál hosi Advogadu Privadu Pedro Aparicio.

Jornalista: Carmelita Isaac