Hatutan.com, (18 Janeiru 2022), Díli— Xefe Negosiadór Adezaun Timor-Leste (TL) ba Organizasaun Mundial Komérsiu (OMK), atuál Ministru Koordenadór ba Assuntu Eknómiku (MKAE), Joaquim Amaral, ohin 18 Janeiru 2022 partisipa reuniaun virtuál ba Dasanulu (X) Meza Redonda Xina tinan 2022.

Ministru Koordenadór ba Assuntu Eknómiku (MKAE), Joaquim Amaral. Foto/MKAE.

Reuniaun ne’e ho tópiku  “Tinan sanulu Kapasitasaun hosi Programa Xina  nian” ho sub tópiku Reflesaun kona-bá Adezaun País Menus Dezenvolvidu sira (PMDs).

Notisia iha Relasaun:Ministru Joaquim ho Delegasaun Dezloka ba Jenébra Partisipa Konferénsia Altu Nível OMK  

Iha parte dahuluk, sesaun abertura  altu nível hosi enkontru ne’e sei modera hosi Embaixadór Xiangchen Zhang, atuál Adjuntu Diretór-Jerál OMK nian, ho ninia oradór sira mak hanesan Ngozi Okonjo-Iweala, Diretór-Jerál, OMK, Wang Wentao, Ministru  Komérsiu Xina, Reprezentante Koordenadór País PMD sira no Mawine G. Diggs, Ministru Komérsiu no Indústria  Libéria, atuál  Koordenadór  Grupu Adezaun OMK hosi  g7+.

“Iha sesaun daruak reuniaun  Meza Redonda ho  Ministru no Xefe Negosiadór sira hosi  PMDs nian ho tópiku Reflesaun kona-bá futuru adezaun PMDs nian, Xefe Negosiadór Timor-Leste, Joaquim Amaral ho ninia omólogu Mzé Abdou Mohamed Chanfiou, Ministru  Ekonomia no Indústria hosi nasaun Komores sei ko’alia kona-bá dezafiu prinsipais  ne’ebé pais  PMDs sira enfrenta iha prosesu adezaun,” Hatutan.com sita komunikadu.

Alende ne’e, aborda mós medida sira ne’ebé país hirak ne’e sei hala’o hodi ultrapasa situasaun hirak ne’e, ne’ebé sei modera hosi Maika Oshikawa, Diretora Divizaun Adezaun OMK nian.

Iha sesaun daruak hosi tópiku ne’e mós, Xefe Negosiadór Timor-Leste, Joaquim Amaral  sei koloka medidas balun ne’ebé TL  sei  halo  hodi ultrapasa situasaun hirak ne’e maka  Governu Timor-Leste liuhosi MKAE planeia harii  Sekretariadu  Nasionál OMK nian iha primeiru semestre tinan ne’e, hodi  garantia implementasaun adezaun nian ho rigór.

Nune’e mós sei intensifika reforma internál ne’ebé nesesáriu haktuir hosi akordu no  regulamentu sira OMK nian liuhosi masimiza apoiu disponível hosi  país observadór sira PMD nian.

Reuniaun Meza Redonda Xina ba Da-sanulu hodi selebra aniversáriu tinan 10 hosi  Programa Xina nian  nu’udár plataforma valioza ba país aderente sira liu liu  país  PMD sira, hodi hametin kapasidade liuhosi fahe esperiênsia atu kontribui  kona-bá prosesu adezaun ba OMK ho sistema multilaterál komérsiu nian.

Jornalista: Cipriano Colo