Hatutan.com, (27 Janeiru 2022), Díli–Prezidente Repúblika (PR), Francisco Guterres Lú Olo, prezide reuniaun Konsellu Superiór Defeza Seguransa (KSDS), hodi ko’alia kona-bá ezonerasaun, nomeasaun no promosaun jenerais Forsas Armadas.

Prezidente Repúblika (PR), Francisco Guterres Lú Olo, prezide reuniaun Konsellu Superiór Defeza Seguransa (KSDS), hodi ko’alia kona-bá ezonerasaun, nomeasaun no promosaun jenerais Forsas Armadas, Kinta (27/01/2022). Foto/Média PR.

Lú Olo loke reuniaun ne’e, hato’o proposta Governu nian no fó oportunidade ba Primeiru Ministru (PM) Taur Matan Ruak, esplika kona-bá desizaun Konsellu Ministru (KM) nian kona-bá ezonerasaun, nomeasaun no promosaun jenerais Forsas Armadas.

Notisia iha Relasaun:Governu Propoin ba PR Lú Olo Ezonera Lere no Nomeia Falur

Membru órgaun konsultivu ne’e, fó ona sira-nia hanoin no kabe kompeténsia Prezidente Repúblika atu deside.

“Bainhira esplika tiha situasaun ne’e idaidak mós fó hanoin. Fó hanoin barak, hanoin pozitivu. Órgaun konsulta, Prezidente mak sei deside,” Xefe Kaza Militár, António Soares Maukalo hateten iha Palásiu Prezidensiál, Bairru-Pité, Kinta (27/01/2022).

Hosi rezultadu reuniaun ne’e, Prezidente Repúblika sei halo análiza ba opiniaun sira no foti desizaun iha tempu badak nia laran.

“Bele loron ida, loron rua, bele oras mós bele. Estuda kuandu to’o ona nia fó-sai,” nia hateten.

Maukalo mós informa katak, ajenda ne’ebé ko’alia iha reuniaun liga direta ho ezonerasaun Xefe Estadu Maiór Jenerál Lere Anan Timur nian, tanba ne’e tuir regra membru Konsellu ne’e tenke husik fatin enkontru nian.

“Desde assuntu ne’e trata kona-bá Tenente Jenerál nia situasaun, regra regula dispensa tiha Tenente Jenerál hela iha li’ur. Tanba ne’e mak ohin Tenente Jenerál sai tiha ba li’ur,” nia esplika.

Lú Olo sei uza nia kompeténsia atu ezonera, nomea no promove xefias FALINTIL-Forsa Defeza Timor-Leste (FFDTL), hafoin rona membru Konsellu Superiór Defeza no Seguransa (KSDS) nia hanoin.

Proposta hosi Governu nian ne’ebé deside iha Konsellu Ministru, iha 21 Janeiru 2022, hodi ezonera Tenente Jenerál Lere Anan Timur, ezonera Majór-Jenerál Falur Rate Laek hosi kargu Vise-Xefe Estadu-Maiór-Jeneral, nomeasaun Majór-Jenerál Falur Rate Laek ba kargu Xefe Estadu-Maiór Jenerál Forsas Armadas, nomeasaun Brigadeiru Jenerál Calisto dos Santos Coliati ba kargu Vise-Xefe-Estadu-Maiór Jenerál Forsas Armadas no mantein nomeasaun Komodoru Pedro Klamar Fuik ba kargu Xefe Estadu Maiór Forsas Armadas.

Nu’udár Komandante Supremu Forsas Armadas nian, Prezidente Repúblika haktuir de’it prosedimentu legais kona-bá ezonerasaun, nomeasaun no promosaun ne’ebé hakerek iha Konstituisaun no Lei sira.

Membru Konsellu Superiór Defeza Siguransa ne’ebé marka prezensa iha reuniaun ho Xefe Estadu ne’e mak hanesan Primeiru Ministru (PM) Taur Matan Ruak, Ministru Defeza Filomeno da Paixão de Jesus, Tenente Jeneral Lere Anan Timur, Komisáriu Polisia Faustino da Costa, Deputadu David Dias Ximenes, Deputadu Abel Pires, José Manuel ‘Nakfilak’ no Vise Ministru Justisa José Edmundo Caetano.

Jornalista: Vito Salvadór