Hatutan.com, (07 Fevereiru 2022) Díli-Ministériu Públiku (MP) liuhusi Prokuradór Jacinto Babo, husu ba Tribunál Distritál Dili (TDD) atu aplika pena prizaun efetivu tinan-haat (4) ba arguidu ho inisiál FC ne’ebé deskonfia komete  krime obstrusaun autoridade públiku.

MP imputa krime ne’e ba arguidu tanba arguidu laiha karta kondusaun no ho kondisaun lanu impede servisu membru Polísia Nasionál Timor-Leste (PNTL) lezadu Gaspar Lopes ne’ebé destaka iha Ospitál Nasional Guido Valadares (HNGV).

Liuhusi audensia julgamentu iha TDD, Segunda (07/02/2022), Prokuradór Jacinto Babo esplika razaun nia husu pena efetivu tinan-hat ne’e, bazeia ba arguidu nia deklarasaun maske iha sala audiénsia arguidu nega katak nia lahatene saida maka akontese iha tempu ne’ebá tanba ho kondisaun lanu.

Maske nune’e MP konsidera arguidu nia deklarasaun ne’ebé antes ne’e fó ona iha MP hodi konfesa katak arguidu lori motor ba gas iha sala emerjénsia nia oin no baku ona lezadu  hanesan membru PNTL ne’ebé momentu ne’ebá destaka iha HNGV.

Parte Defensor Públiku (DP) João Carvalho la aseita ho alegasaun husi MP nian, tanba arguidu rasik la hatene saida maka nia halo iha tempu ne’ebá tanba nia ho kondisaun lanu no hemu tua litru 10, tanba ne’e parte defeza husu ba Tribunál atu tetu hodi foti desizaun ne’ebé justu ba nia kliente.

 Hafoin alegasaun juiz prezide marka fali audiénsia ba loron seluk hodi rona leitura sentensa.

Tuir akuzasaun husi MP katak iha loron 4 fulan-Maiu 2019 lezadu hanesan membru PNTL ne’ebé destaka iha HNGV, maibé hale’u  tuku 2:00 madrugada, arguidu ho kondisaun lanu ho nia kolega nain-rua ho motór tama iha área HNGV no to’o iha sala emerjénsia nia oin, arguidu gas motór halo lian maka’as, no sai fali ba li’ur no lezadu mós tuir arguidu ba li’ur ho intensaun atu esplika ba arguidu katak labele halo barullu tanba ema moras maibé lezadu foin hakat sai ba li’ur depoente arguidu haksoit tebe iha lezadu nia hirus matan, tanba ne’e lezadu nia kolega Venâncio Lopes kaer arguidu nia liman hodi tau kedas aljema no kontaktu nia kolega sira ba foti kedas arguidu.

MP akuza arguidu ba pratika krime obstrusaun autoridade públiku, laiha karta kondusaun no kondusaun perigozu ne’ebé previstu iha artigu 243, 207 no 208 husi kódigu penal TL.

Audiénsia julgamentu prezide husi juiz koletiva, José Gonçalves, Argentino Nunes no Alvaro Maria Freitas.

Jornalista: Carmelita Isaac